2017-10-11 | تکنالوژي

ویکيپيډیا افغانانو ته د موبایل فون له لارې وړیا لاسرسی برابروي

سلام ټایمز

د آنلاین دایره المعارف او د موبایل فون د یوې کمپنۍ تر منځ د یوه نوښت له لارې به دا شونې شي چې د یوه کال په مخه معلوماتو ته د افغان ځوانانو لاسرسی پراخ شي.


په افغانستان کې خواوشا ۸ میلیونه خلک، اکثر په لویو ښارونو کې، انټرنټ ته لاسرسی لري.‌ [آرشیف]

په افغانستان کې خواوشا ۸ میلیونه خلک، اکثر په لویو ښارونو کې، انټرنټ ته لاسرسی لري.‌ [آرشیف]

کابل -- د ویکپیډیا او د موبایل فون د یوې کمپنۍ تر منځ د یوه نوښت له برکته به افغانان په لنډ وخت کې وکولی شي چې دغه آنلاین دایره المعارف ته د خپلو موبایل فونونو له لارې وړیا لاسرسی ومومي.

خواوشا ۸ میلیونه افغانان انټرنټ ته لاسرسی لري، په داسې حال کې چې د طالبانو د رژیم (۱۹۹۶-۲۰۰۱) د قیودو پر وخت تقریبا هیچا هم دغه وړ لاسرسی نه درلود.‌

خو اکثر دغه کار د موبایل فونونو له لارې کوي چې ډېټا مصرفوي، او معلوماتو ته لاسرسی اسانوي خو لږ کسان د هغې د منظم استعمال وس لري.‌

د ویکیمیډیا فاونډېشن، چې ویکيپیډیا چلوي،‌ او د افغانستان د موبایل فونونو د یوه لوی شرکت،‌ روشن،‌ تر منځ مشارکت اراده لري چې دغه حالت ته تغیر ورکړي او کاروونکیو ته د روانې میاشتې له وروستیو څخه نیولې تر یوه کال پورې یاد وېب سایټ ته د وړیا لاسرسي اسانتیا برابره کړي.‌

د روشن (Roshan) مرستیال اجرایوي رییس الطاف لادېک وویل، «له ویکیميډیا فاونډېشن سره مشارکت معلوماتو او پوهې ته، په ځانګړې توګه د افغانستان د ځوانانو لپاره چې د وګړو یو پر درې برخې تشکیلوي، لاسرسی پراخوي،»

دا شرکت دغه نوښت، چې د «ویکيپیډیا زیرو» نوم پرې اېښودل شوی دی او په نورو مخ پر ودې هېوادونو کې په ۲۰۱۲ کال کې پیل شوی دی، د افغانستان د پرمختګ لپاره مهم ګڼي.‌

د هېواد اکثر پوهنتونونه لا تر اوسه هم د ۱۹۸۰مو کلونو، د شوروي له یرغل څخه د وروسته او د ۱۹۹۰مو کلونو له کورنیو جګړو چې د افغانستان اکثره بېخبنا یې ړنګه کړه، څخه د مخکې وخت درسي کتابونه کاروي.‌

د طالبانو رژیم چې په هغو پسې وروسته راغی هم اکثر عصري ټکنالوجي بنده کړه او معلوماتو ته لاسرسی یې محدود کړ.‌

د افغان زده کوونکیو پیاوړي کول

د روشن ویاند شفیع شریفي وویل، «د افغانستان په بېلابېلو برخو کې په سلګونو زره ځوان زده کوونکي اوس هم د لسیزو پخوا زړو معلوماتو ته لاسرسی لري او دا د هېواد د بشري پرمختګ په پام کې نیولو سره تاثیر لري،»

هغه وویل، «ویکیپیډیا ته وړیا لاسرسی ځوانانو، په ځانګړې توګه د پوهنتون زده کوونکیو ته اجازه ورکوي، چې د خپلې علاقه په ساحه کې تر ټولو تازه معلومات ترلاسه کړي،»

د مخابراتو او معلوماتي ټکنالوجۍ د وزارت ویاند نجیب ننګیال د ویکیپيډیا او روشن تر منځ دغه «عالي نوښت» ته هرکلی وویل او د موبایل فونونو له نورو شرکتونو نه یې هم وغوښتل چې له دغه پروګرام سره یوځای شي.

هغه سلام ټایمز ته وویل، «ډېر افغان زده کوونکي نشي کولی چې انټرنېټ ته لاسرسی ولري. دا به له افغان ځوانانو سره مرسته وکړي چې خپلې پوهې ته وده ورکړي.»

په کابل کې د ګوهرشاد د لوړو زده کړو د موسسې یوه زده کوونکي ارش اشنا وویل، «د پوهنتون محصلان واقعاً انټرنټ، او په ځانګړې توګه علمي معلوماتو ته لاسرسي ته اړتیا لري،»

هغه سلام ټایمز ته وویل، «ویکيپیډیا داسې ده لکه یو نړیوال کتابتون او د روشن دغه ګام به له افغان زده کوونکیو سره مرسته وکړي،»

هغه وویل، «د مالي دلایلو په اساس، اکثر زده کوونکي انټرنټ ته د لاسرسي‌ وس نه لري، له دې امله، مونږ له روشن څخه غواړو چې دغه خدمت یوه کال پورې محدود نه کړي.»

[له کابل څخه سلیمان د دې راپور په برابرولو کې مرسته کړې ده.]

آیا دا لیکنه ستاسو خوښه شوه؟

Ca mobile no 4927130d4c712bee9a68b0f9ecb8cf9c05586640d62e35366654e46ff7e4c1f7 0

تبصره

* ضروري برخې ښيي
Captcha

1 تبصرې

جمال خان | 10-11-2017

دا ښه ګام دی، خو د ویکيپيډیا له خوا خپاره شوي معلومات ۱۰۰٪ باوري نه دي. هر څوک کولی شي چې ویکيپيډیا کې په موجودو معلوماتو کې له خپلې خوښې سره سم تغیر راولي. اوس چې روشن دا کار کوي په کار دی چې نورې موبایل کمپنۍ د داسې تدریسي موادو د ویب سایټونو خپرول پیل کړی چې معلومات یې د ویکیپيدیا په نسبت ډېر باوري وي.‌ او له تاسو نه ډېره مننه چې دا خبر مو خپور کړی دی.‌

د رایو شمېر

تاسو د متحده ایالاتو د نوې ژمنې په هکله، چې په افغانستان کې سرتېري پرېږدي، څه فکر کوئ؟‌

نتایج وګورئ