2017-12-06 | تروريزم

د داعش - طالبانو جګړه لغمان ته خپره شوه

د خالد زېري راپور

په ننګرهار او لغمان ولایتونو کې په روانو جګړو کې له دواړو خواوو څخه اورپکي وژل شوي دي.


د طالبانو او داعش د اورپکو تر منځ جګړې د ننګرهار ولایت له خوګیاڼو ولسوالۍ څخه له ۹۰۰۰ څخه ډېرې کورنۍ بې ځایه کړي دي. په دې عکس کې، چې د نومبر په ۲۸ مه اخیستل شوی، بې ځایه شوې کورنۍ په موقتي خېمو کې ژوند کوي. [خالد زېری]

د طالبانو او داعش د اورپکو تر منځ جګړې د ننګرهار ولایت له خوګیاڼو ولسوالۍ څخه له ۹۰۰۰ څخه ډېرې کورنۍ بې ځایه کړي دي. په دې عکس کې، چې د نومبر په ۲۸ مه اخیستل شوی، بې ځایه شوې کورنۍ په موقتي خېمو کې ژوند کوي. [خالد زېری]

ننګرهار -- د ځایي چارواکو په وینا، د داعش او طالب اورپکو تر منځ جنګ د ننګرهار ولایت له خوګیاڼو ولسوالۍ څخه د لغمان ولایت الینګار ولسوالۍ ته خپور شوی دی.

د افغان ملي اردو د ۲۰۱ سېلاب قول اردو ویاند ډګرمن شیرین اغا فقیري سلام ټایمز ته وویل، چې د داعش او طالبانو تر منځ جنګ د نورلام درې په کونډه ګل سیمه کې د نومبر په ۲۷ مه پیل شو.

هغه وویل، «په دې جنګ کې د مبارز او محراب په نومونو د طالبانو دوه قوماندانان ووژل شول، خو تر دې دمه د هغو تلفاتو په هکله، چې داعش ته وراوښتي دي، څه خبر نشته،»

هغه وویل، احتمال شته چې دواړو غاړو ته نور تلفات هم ور واوړي.

د ځایي چارواکو په وینا، د داعش او طالب اورپکو تر منځ جنګ د ننګرهار ولایت له خوګیاڼو ولسوالۍ څخه د لغمان ولایت الینګار ولسوالۍ ته خپور شوی دی. [خالد زېری]

د لغمان ولایت یوه چارواکي د نوم نه ښودلو په شرط سلام ټایمز ته وویل، چې دواړو خواوو ته اوښتي زیانونه له هغه څه نه، چې راپور یې ورکړل شوی دی، ډېر دي، او زیاته یې کړه چې داعش او طالبان له نورو سیمو نه خپل جنګیالي راټولويچې په پیل شوې جګړه کې برخه واخلي.

د سیمې د اوسېدونکیو لپاره ستونزې رامنځته کول

د نورلام درې یوه اوسېدونکي فقیرالله سلام ټایمز ته وویل، «داعش په دې بوخت دی چې د کونړ ولایت له چپې درې ولسوالۍ او نورو سیمو څخه خپل جنګیالي راټول کړي. بلې خواته بیا، طالبان په دې بوخت دي چې د لغمان له نورو ولسوالیو څخه خپل وسله وال سړي راټول کړي او داعش ته ماتې ورکړي.»

هغه وویل، «تر دې مخکې، دلته داعش نه وو، دلته په لیرې پرتو سیمو کې یوازې طالبان وو. اوس دواړه راغلي او د کلیو او د استوګنې د سیمو په منځ کې یې جنګ شروع کړی دی. هغوی خلکو ته مزاحمت جوړوي او مونږ ته ستونزې راولاړوي.»

د دغې سیمې یوه بل اوسېدونکي مجیب الرحمان سلام ټایمز ته وویل، «طالبان او داعش دواړه اورپکي ګروپونه دي، او هغوی خلکو ته تاوانونه ور رسوي، نو مونږ یې یو هم نه غواړو،»

د لغمان د والي ویاند سرحدي ځواک په دې هکله باور څرګند کړ چې افغان ملي دفاعي او امنیتي ځواکونه به ژر د دغې سیمې کنټرول بېرته په لاس کې واخلي.

هغه سلام ټایمز ته وویل، «حکومتي ځواکونه به له وضعې څخه ګټه واخلي او دواړه ګروپونه به له منځه وېسي،»

په ننګرهار کې جنګ روان دی

د ننګرهار ولایت په خوګیاڼو ولسوالۍ کې هم د داعش او طالبانو تر منځ جنګ لا روان دی.

د ننګرهار ولایت امنیه قوماندان ډګرجنرال عبدالرحمان رحیمي وویل، د خوګیاڼو ولسوالۍ په وزیرو تنګي کې په وروستۍ جګړه کې له ۲۰ څخه ډېر داعش او طالب اورپکي وژل شوي او لسګونه نور ټپیان شوي دي.

هغه سلام ټایمز ته وویل، «دغه دواړه ترهګر ګروپونه غواړي چې ملکي خلک ووژني او په سیمه کې ګډوډي رامنځته کړي، خو هغوی به خپله دا هیله له ځانونو سره قبر ته وېسي.»

افغان ملي دفاعي او امنیتي ځواکونه هڅه کوي چې د اورپکو له جګړې څخه ګټه واخلي، او په دې لړ کې یې د نومبر په ۲۸ مه په وزیرو تنګي کې ځمکني عملیات پیل کړل.

په عین ورځ، د ننګرهار والي محمد ګلاب منګل په خرمنه سیمه کې له ژورنالستانو سره د خبرو کولو پر وخت د عملیاتو په هکله معلومات ورکړل.

هغه وویل، «مونږ به له دغو ګروپونو څخه یو هم ارام پرې نه ږدو. داعش او طالبان دواړه زمونږ دښمنان دي. مونږ به هغوی وځپو؛ بیا به یې له منځه وېسو.»

د ۲۰۱ سېلاب قول اردو قوماندان ډګر جنرال محمد زمان وزیري هم د عملیاتو د څارنې لپاره خوګیاڼو ولسوالۍ ته لاړ.

هغه خبریالانو ته وویل، «که داعش یا طالبان په کونړ کې راپورته شي، مونږ به یې هلته له منځه وېسو، او که هغوی په نورستان کې راپورته شي، مونږ به یې هلته له منځه وېسو. مونږ به تر هغه وخته پورې جګړه وکړو چې اورپکي او ترهګر ګروپونه له منځه وېوړل شي.»

وزیري زیاته کړه، اردو به په خوګیاڼو ولسوالۍ کې په هغو سیمو کې، چې له داعش او طالبانو څخه تصفیه کیږي، پوستې جوړې کړي او د سیمې اوسېدونکیو ته به دایمي امنیت برابر کړي.

'د قیامت د ورځې' احساس

والي منګل د نومبر په ۲۸ مه وویل، په تېرو دوه اونیو کې د وزیرو له تنګي څخه له ۹۰۰۰ څخه ډېرې کورنۍ راکډه شوي دي.

هغه وویل، «تر ۴۴۰۰ پورې کورنیو ته یوه اندازه مرستې ورکړل شوي دي،» او زیاته یې کړه چې ۵۳۰۰ نورې کورنۍ به هم ژر مرستې ترلاسه کړي.

منګل له نړیوالو مرستندویو ادارو څخه وغوښتل چې له خوګیاڼو ولسوالۍ څخه بې ځایه شویو کورنیو سره دې مرستې وکړي.

سید قیوم، چې ۲۲ کاله عمر لري او د وزیرو اوسېدونکی دی، یو له هغو زرګونو کسانو څخه دی چې د جګړې له امله یې خپل کور کلی پرېښی دی.

هغه سلام ټایمز ته وویل، «داعش راغی او د طالبانو پر ضد یې جنګ شروع کړ. سم چې مونږ واورېدل چې راغلل، مونږ خپل یو څه کالي راواخیستل او له سیمې څخه راوتښتېدو، ځکه چې مونږ د هغوی د ظلمونو په هکله خبر وو

هغه وویل، «هلته موټرونه یا لارۍ نه وې؛ توره شپه وه، او ماشومانو ژړل. هر چا کوشش کاوه چې وتښتي.»

قیوم له خپلې اوه کسیزې کورنۍ سره په ننګرهار کې د چمتلې سیمې ته راوتښتېد، او اوس هلته په سپین ډاګ ژوند تېروي.

قیوم وویل، «دلته، مونږ حتی خېمې هم نه لرو. مونږ نه پوهېږو چې څه وکړو او چېرته لاړ شو،»

د وزیرو سیمې یوې زړې ښځې شاه خانم سلام ټایمز ته وویل، «نه چا بوټانو ته کتل او نه ټیکریو ته. هر چا کوشش کاوه چې وتښتي.»

هغې وویل، «داسې وو لکه د قیامت ورځ -- ډزې وې، چیغې وې؛ دواړو خواوو ته د 'الله اکبر' نارې وې، خو کارونه یې بېخي د مسلمانانو په څېر نه دي.»

آیا دا لیکنه ستاسو خوښه شوه؟

Ca mobile no 2

تبصره

* ضروري برخې ښيي
Captcha

د رایو شمېر

د پاکستان - افغانستان د سرحد په اوږدو کې جوړېدونکي کټاره به د اورپکو د حرکت په کنټرول کې څومره مؤثره وي؟‌

نتایج وګورئ