جلال اباد -- د مدني ټولنې په سلګونو فعالانو او ځوانانو د چارشنبې په ورځ /د زمري ۱۷مه/ د ننګرهار ولایت په مرکز جلال اباد کې لاریون وکړ، او د جنګسالارانو او ځایي زورواکانو پر ضد د ولسمشر اشرف غني د وروستيو اقداماتو ملاتړ یې وکړ.
د دفاع وزارت د زمري په ۱۵ مه اعلان وکړچې د چنګاښ په میاشت کې په فاریاب، اروزګان او فراه کې د ناقانونه ملېشو درې قوماندانان نیول شوي دي.
د لاریون برخه والو له حکومت څخه وغوښتل چې په ننګرهار ولایت کې د جنګسالارانو پر ضد جدي ګامونه واخلي، او تور یې ولګاوه چې هغوی د نورو د ملکیتونو په غصب، اداري فساد، شکنجو او د عامه امنیت په کمزوري کولو کې لاس لري.
لاریونوالو همدارنګه په طالبانو غږ وکړ چې د ملت غوښتنې ومنياو د لوی اختر په ترڅ کې اوږدمهاله اوربند اعلان کړي.
د ننګرهار د اطلاعاتو او کلتور ریاست د ځوانانو د چارو آمر مطیع الله احمدزي خبریالانو ته وویل، «د ولسمشر په حکم په وروستیو کې په یو شمېر ولایتونو کې یو شمېر زورواکي ونیول شول. مونږ د دغه ګام هرکلی کوو، او په ننګرهار ولایت کې هم د دغه ډول زورواکو د نیولو غوښتنه کوو،»
د مدني ټولنې یوه فعال، نوراحمد نوراني، د زورواکو پر ضد د اخیستل شویو ګامونو ستاینه وکړه او پر حکومت یې تاکید وکړ چې د موجودو امنیتي ننګونو د دایمي حل لپاره یو تلپاتې پلان تیار کړي.
هغه سلام ټایمز ته وویل، «د داسې مسایلو د حلولو لپاره باید دایمي پلانونه چمتو کړای شي. مونږ د ولسمشر غني له خوا اخیستل شوي ګامونه ستایو،»
نوراني وویل، «دغه ولسمشر او زمونږ حکومت د زورواکو زور اوبه کړ چې په کې هغه زورواکي هم شامل دي چې د هغوی په مخکې به چا د خبرو کولو لپاره خوله نشوای پرانستلی. دا یو غټ کار وو چې وشو، او دا باید دوام ومومي،»
امنیت ښه شوی دی
د جلال اباد اوسېدونکیو همدارنګه په دغه ښار کې له یو لړ مرګونو بریدونو څخه وروسته د اضافي امنیتي ځواکونو توظیف وستایه.
د زمري په ۹ مه په جلال اباد کې د کډوالو او راستنېدونکیو د چارو په ریاست له یوه برید څخه وروسته، د ننګرهار د چارواکو په غوښتنه، غني افغان ملي اردو ته امر وکړ چې په جلال اباد کې د امنیت په برابرولو کې مرسته وکړي..
افغان ملي اردو د زمري په ۱۰ مه، په جزئي توګه په جلال اباد کې امنیتي مسؤلیتونه پر غاړه واخیستل. د زمري په ۱۶مه، د کورنیو چارو د وزارت د پولیسو د ځانګړیو واحدونو عمومي قوماندانۍ له اردو څخه دغه مسؤلیت واخیست.
د تېرو څو ورځو په اوږدو کې، د افغان ملي اردو عسکرو هغه تورې پردې پاکې کړې چې د موټرو د شیشو د رنګ د بدلولو لپاره کارول شوې وې، نه ثبت شوي موټرونه یې ونیول، او یو شمېر نور فعالیتونه یې ترسره کړل.
نوراني وویل، «زه په جلال اباد ښار کې د امنیت د ټینګولو لپاره د افغان ملي اردو د عسکرو د توظیف ستاینه کوم، دلته د هغوی د فعالیتونو هرکلی کوم، او غواړم چې هغوی د زورواکو پر ضد نورې هڅې وکړي،»
په ننګرهار کې د مدني ټولنې یوه فعال، عبدالرحمان معاون، وویل، «په ښار کې د افغان ملي اردو توظیف د امنیت د ټینګولو لپاره یو ګټور ګام دی، او مونږ یې ستاینه کوو،»
هغه وویل، «تاسو وینئ چې د افغان ملي اردو ځواکونه له دې خاورې څخه څومره په مېړانه دفاع کوي،»