ننګرهار -- د ننګرهار ولایت د کامې ولسوالۍ اوسېدونکو د مشهورو افغاني خوږو یعنې ګوړې جوړول، چې د طالبانو د ۱۳۷۵ - ۱۳۸۰ د واکمنۍ پر وخت له منځه تللې وه، بیا پیل کړي دي.
مخکې له دې چې طالبان په ۱۳۷۵ کې قدرت ته ورسېږي، په کامه ولسوالۍ کې په لسګونو د ګوړې ګاڼیو فعالیت کاوه، خو د طالبانو د واکمنۍ پر وخت هغه ټولې ګاڼۍ ودرېدلې.
یو لوی علت یې د ارزانې پاکستانۍ ګوړې موجودیت وو.
خو د ننګرهار ولایت اوسېدونکي په کامه کې جوړه شوې ګوړه غوره ګڼي ځکه هغوی پاکستانۍ ګوړه له معیار نه ښکته بولي او وایي چې پاکستاني ګوړه جوړونکي د ګوړې په جوړولو کې مصنوعي خوږوونکی توکی یعنې شکرین استعمالوي.
دا وخت، په کامه کې څلور د ګوړې جوړونې ګاڼۍ فعالیت کوي چې تازه یې د دغو خوږو جوړول پیل کړي دي. هغوی ټول د شکرین پر ځای د ګنیو شربت استعمالوي.
شفیق الله، چې ۳۵ کاله عمر لري او د کامې ولسوالۍ د نورزي کلي اوسېدونکی دی، سلام ټایمز ته وویل، «په تېرو کلونو کې، دلته دومره ډېره ګوړه نه جوړېدله ځکه چې ګټه یې نه کوله. خلکو پاکستانۍ ګوړه چې شکرین په کې ګډ وو استعمالوله.»
هغه وویل، ځایي اوسېدونکيو، چې د روغتیا لپاره د شکرین د تاثیراتو په هکله شک لري، بېرته ځایي، طبیعي ګوړې ته مخه کړه.
د ننګرهار د کرنې ریاست مرستیال عبدالوارث تاند وویل، په ننګرهار کې، «ګني یوازې په کامه ولسوالۍ کې کرل کیږي،»
هغه وویل، له یوه کال څخه په لږ وخت کې، د کامې ولسوالۍ د ګنیو د حاصلاتو اندازه «اټکل ۹۰ مټریک ټنه وه. تمه ده چې سږ کال به د ګنیو کرنه او د ګوړې تولید د تېر کال په نسبت زیات وشي.»
تاند د ګوړې د تولید په هکله ارقام وړاندې نه کړل، خو ویې ویل، چې په کامه کې جوړه شوې ګوړه په افغانستان کې نورو ځایونو ته د خرڅ لپاره ځي.