پروان -- پژواک خبري اژانس د ځایي چارواکو له قوله راپور ورکړ، چې د پروان ولایت د ښوونې او روزنې د ریاست مرستیال د سې شنبې په ورځ /د نومبر ۱۴مه/ په یوه بمي چاودنه کې ووژل شو.
پولیسو وویل، چې دغه بم د شپې خواوشا ۱۱ بجې له چاریکار ولسوالۍ سره نژدې وچاودېد، چې د ښوونې او روزنې رییس زلمی شهید یې ټپي کړ، او د هغه مرستیال عطا محمد متین یې وواژه.
چارواکو وویل، چې د هغوی موټر پورې یو په لاس جوړ مقناطیسي بم نښلول شوی وو.
سمدلاسه چا د پېښې مسؤلیت پرغاړه نه دی اخیستی.