کابل -- ولسشمر اشرف غني د دوشنبې په ورځ /د سلواغې ۲۲ مه/ له طالبانو سره د سولې د پروسې لپاره د مشورتي لویې جرګې د راغوښتلو غوښتنه وکړه .
د هغه له دفتر څخه د یوې خپرې شوې اعلامیې په اساس، غني په ولسمشرۍ ماڼۍ کې د سولې په هکله په یوه ملي مشورتي غونډه کې وویل چې دغه جرګه به په هېواد کې د یوې با وقاره سولې د رامنځته کولو په برخه کې مرسته وکړي.
هغه وویل چې د جرګې غړي «به د سولې د څرنګوالي او په افغانستان کې له سولې څخه د وروسته حکومت په هکله بحث وکړي».
په پام کې ده چې جرګه را روانه میاشت په کابل کې ترسره شي. دقیقه نېټه به وروسته اعلان شي.