کابل -- د کورنیو چارو وزارت د دوشنبې په ورځ /د وري ۵ مه/ په یوه اعلامیه کې وویل، چې د پولیسو د ځانګړیو واحدونو عمومي قوماندانۍ په ننګرهار ولایت کې څلور طالب اورپکي ونیول.
په اعلامیه کې راغلي، چې دغه برید د سره رود ولسوالۍ په چمتله سیمه کې ترسره شو.
د اعلامیې په اساس، په نیول شویو کې د ملا تراب په نامه د طالبانو یو مهم غړی هم شامل دی.
اعلامیه وایي، «ملا تراب په سره رود ولسوالۍ او د ننګرهار ولایت په بېلابېلو برخو کې د ترهګریزو او ویجاړونکو فعالیتونو، وسله والو بریدونو او چاودنو اصلي پلان جوړونکی وو،»
په همدې اعلامیه کې راغلي، له دې جلا، د پولیسو د ځانګړیو واحدونو یونټ د لوګر ولایت په پل عالم کې د ځانمرګو دوه واسکټونه شنډ کړل.
په اعلامیه کې د یوې پېښې هم د دقیق وخت په هکله یادونه نه ده شوې.