کابل -- افغانستان ټایمز سې شنبه /د فبروري ۷ مه/ راپور ورکړ چې د کندوز ولایت د ښوونې او روزنې ریاست هغه ۴۰ ښوونځي چې د اورپکو او عسکرو تر منځ جګړه کې ویجاړ شوي ول بیا رغولي دي.
د کندوز د ښوونې او روزنې د ریاست سرپرست محمد رستم احمدي رسنیو ته وویل، یادې ادارې دا ښوونځي د هغو ۴۰.۳ میلیونه افغانیو (۶۰۲۳۲۳ امریکایي ډالرو) په لګښت جوړ کړل چې د ښوونې او روزنې وزارت او اغاخان فاونډیشن څخه یې ترلاسه کړي ول.
هغه زیاته کړه، فرنیچر او نور د اړتیا وړ شیان هم له همدغو پیسو څخه واخیستل شول.
د کندوز والي اسدالله امرخیل وویل، اورپکو ته به اجازه ورنه کول شي چې د کندوز ښوونځي ویجاړ کړي، او زیاته یې کړه چې د ټولو هلکانو او نجونو ښوونه او روزنه د هغه د سر لومړیتوب دی.
