متحدو ایالاتو د داعش په هغو غړو باندې بندیزونه ولګول چې د ماشومانو د استخدام شبکه چلوي

متحدو ایالاتو د دوشنبې په ورځ /د غوایي ۱۹مه/ د داعش د مالي اسانچارو د یوې شبکې په پنځو غړو باندې، چې په نورو جنایتونو سربېره یې له یادې ډلې سره په سوریه کې دننه د بې ځایه شویو کسانو له کمپونو څخه د ماشومانو په استخدام کې مرسته کوله، بندیزونه ولګول.

د متحدو ایالاتو د بهرنیو چارو او خزانې وزارتونو وویل، دغو پنځو کسانو یوې داسې شبکې پورې تړاو درلود چې په سوریه، ترکیه او اندونیزیا کې یې فعالیتونه کول.‌

د متحدو ایالاتو د بهرنیو چارو وزیر انتوني بلینکین په یوه اعلامیه کې وویل، دغو پنځو کسانو «سوریې او نورو سیمو ته چې داعش په کې فعالیتونه کوي د متشنجو افراطیانو سفرونه تسهیلول.»

هغه وویل، «په هغوی باندې له بندیز لګولوڅخه، زموږ هدف دا دی چې د داعش تسهیل کوونکې داسې یوه شبکه فاش کړو او مخه یې ډب کړو چې په سوریه کې د کم وسو ماشومانو په ګډون، د داعش استخدام یې تمویلاوه.»

د متحدو ایالاتو د خزانې وزارت په وینا، دغې شبکې په اندونیزیا او ترکیه کې د پیسو په راټولولو سره په سوریه کې د بې ځایه شویو کسانو په کمپونو کې د داعش د هڅو د ملاتړ لپاره مالي انتقالات ترسره کول.

وزارت وویل، له دغو پيسو څخه یوه برخه «د دې لپاره کارول کېدله چې ماشومان له کمپونو څخه بهر قاچاق کړي او د احتمالي جنګیالیو په توګه یې د داعش بهرنیو جنګیالیو ته په لاس ورکړي.»

د خزانې وزارت وویل، د الهول په ګډون چې د سوریې د الحسکه ولایت په دښته کې یو پراخ کمپ دی، د کمپونو په اوسېدونکیو کې داسې کسان شامل دي چې د داعش له خوا بې ځایه شوي، یا د داعش عناصر، ملاتړي او د هغوی د کورنیو غړي دي.

وزارت وویل، له ۴۰ څخه په ډېرو هېوادونو کې د داعش مینه والو په الهول او نورو کمپونو کې د داعش اړوندو کسانو ته پیسې لېږلي څو په راتلونکي کې د یوه بغاوت ملاتړ برابر کړي.

د امنیتي چارو شنونکي وایي، په افغانستان کې وروستي بریدونه ښیي چې داعش هڅه کوي څو په دغه هېواد کې خپل نفوذ پراخ کړي.

د روژې میاشتې په وروستیو ورځو کې په څو ولایتونو کې په جوماتونو او ښوونځیو باندې یو لړ خونړيو بریدونو چې افغانانو د کوچني اختر لپاره چمتووالی کاوه، هغوی له سخت وحشت سره مخامخ کړل.

د نیمروز ولایت په مرکز زرنج کې د حمزه بلوچ په نامه د پوځي چارو یوه شنونکي خبرداری ورکړ چې، په افغانستان کې د رامنځته شوې امنیتي تشې له امله، په داسې حال کې چې اوس دغلته د دې ګواښ د ځپلو لپاره اړتیا وړ پوځي او استخباراتي وړتیاوې نشته، د داعش ګواښ په زیاتېدلو دی.

د داعش ماشوم جنګیالي

یواځې د سوریې په الهول کمپ کې چې تر ټولو لوی کمپ دی، او د اکثریت ښځو او ماشومانو په ګډون ۷۰۰۰۰ کسان په کې ژوند کوي، د داعش ملاتړو د میاشتې تر ۲۰۰۰۰ ډالرو پورې د حوالو له لارې ترلاسه کړي دي.

حواله د پيسو د کمېشنکارانو د یوې داسې شبکې له خوا ترسره کیږي چې د پیسو له فزیکي خوځښت څخه پرته له مروج بانکي سیستم څخه بهر پیسې یا «ارزښت» انتقالوي.‌

د متحدو ایالاتو د خزانې وزارت وویل، په الهول کمپ کې د داعش ملاتړو ته د ورتلونکو پیسو ډېره برخه د سوریې له بهر یا د ترکیې په څېر د ګاونډیو هېوادونو له لارې ورغلې ده.

وزارت زیاتوي، له ۱۳۹۸ راهیسې داعش خپل ملګري له الهول څخه د سوریې ادلیب، دیر الزور او الرقه ولایتونو ته قاچاق کوي.

دغې ادارې وویل، «داعش په ځانګړې توګه د بې ځایه شویو خلکو له کمپونو څخه د ماشومانو په قاچاق کولو باندې تمرکز کوي ترڅو یې د جنګیالیو په توګه استخدام کړي.»

یوه له هغو کسانو څخه چې بندیز پرې لګېدلی، دوي داهلیه سوسانتي ده چې لږ تر لږه له ۱۳۹۶ راهیسې د داعش د یوې مالي اسانچارې په توګه فعالیت کوي او د داعش له نورو عناصرو سره یې د پیسو د انتقال په برخه کې مرسته کړې ده.‌

د خزانې وزارت وویل، د ۱۳۹۶ په وروستۍ ربعه کې، سوسانتي له خپل مېړه سره مرسته کړې وه چې د داعش یوه مشر ته ۴۰۰۰ ډالر او وسلې ور ولېږدوي او په خپله شبکه کې یې د داعش جنګیالیو ته شاوخوا ۵۰۰ ډالر ځانګړي کړي ول.‌

وزارت وویل، «سوسانتي د ۱۳۹۹ له وروستیو راهیسې، له اندونیزیا څخه سوریې ته د پیسو انتقال اسان کړی وو څو د بې ځایه شویو خلکو په کمپونو کې اړوندو کسانو ته پیسې ور ورسیږي.»

هغوی وویل، «په ځینو مواردو کې، له دغو پیسو څخه داسې استفاده شوې چې په وسیله یې ماشومان له کمپونو څخه دښتې ته اېستل شوي او هلته د داعش بهرنیو جنګیالیو هغوی تسلیم کړي او د داعش د ماشومو جنګیالیو په توګه یې استخدام کړي دي.»

د کم وسو خلکو په نښه کول

د ملګرو ملتونو د کوچنیانو مرستندوی صندوق (یونیسف) الهول «د ماشومانو لپاره د یوه سخت ځای» په توګه یاد کړی دی. ماشومان د دغه کمپ د اوسېدونکیو تر نیمایي پورې برخه جوړوي.

د کمپ اکثر ماشومان له ۱۲ کالونو څخه کم عمر لري.

سیف دي چایلډرن د وري په میاشت کې په یوه راپور کې وویل چې په تیرو ۱۲ میاشتو کې، په الهول کې ۷۴ ماشومان مړه شوي چې ۸ یې د تاوتریخوالي په پېښو کې وژل شوي دي.

په ۱۳۹۶ کې د داعش له ماتې څخه وروسته، دغه کمپ د افراطي ایډیالوژۍ مرکز پاتې شوی او داعش پرې د بیا پاڅون او استخدام لپاره تمرکز کوي.

په الهول کمپ کې دننه د داعش سخت دریځو ښځو د مذهبي پولیسو واحدونه جوړ کړي چې د داعش د تفسیر په اساس شرعي سزاګانې ورکوي او د کمپ ماشومانو ته ذهني روزنه ورکوي.

د نظم د ساتنې لپاره د کمپ د کردي ادارې له ډېرو هڅو سره سره، په الهول کې تاوتریخوالی، افراطیت او صحرایي سزاګانې عامې پېښې دي.

د سوریې د دیموکراتیکو ځواکونو افسر فرهاد خوجه د ۱۳۹۹ د مرغومي په میاشت کې المشارق ته وویل،‌ دغه کمپ «د داعش لپاره وروستی فرصت دی ترڅو ماشومان استخدام او د داسې وسیلې په توګه یې وروزي چې هر وخت وغواړي و یې کاروي.»

هغه یادونه وکړه چې، ډېر ماشومان اوس هم له خپلو میندو سره، چې د داعش له تاوتریخوالي څخه ډکه ایډیالوژي ترویجوي، «او د بیرته ظهور او پراختیا خوب ویني» ژوند کوي.‌

په الهول کمپ کې د کردستان د سرې میاشتې ټولنې خیریه کارکوونکې نارمین عثمان وویل، وروسته له هغه چې په الهول کې، چې ډېر کم سړي په کې دي، یو شمېر نوي زېږېدلي ماشومان راښکاره شول، یوه د اندېښنې وړ بهیر را څرګند شو.

هغې وویل، ابتدایي څېړنو وښودله چې د کمپ سخت دریځو ښځو تنکي ځوان هلکان مجبور کړي وو چې نکاح ګانې وکړي او بچیان وزېږوي، د داعش په ایډیالوژۍ یې لوی کړي او «د خلافت د اعادې» لپاره یې ولیږدوي.

په داسې حال کې چې دغه تنکي زلمیان په الهول کې دننه له ذهني تلقین، ناوړه استفادې او د ابتدایي خدمتونو او مصؤنیت د نشتوالي په څېر سختیو سره مخامخ دي، أه کمپ نه بهر د داعش عناصرو هڅه کړې ترڅو هغوی وباسي او د یادې ډلې په خطرناکو لیکو کې یې استخدام کړي.

د داعش له خوا د بیا منظمېدلو په وروستیو هڅو کې په الحسکه کې د مرغومي د میاشتې خونړۍ حمله هم شامله وه چې په ترڅ کې یې هغوی هڅه وکړه ترڅو «د سلګونو ماشومانو په ګډون» افراطیان له زندان څخه راخوسې کړي.

اېس ډي اېف په داعش باندې تور ولګاوه چې ماشومان یې یرغمل نیولي او هغوی د پېښې په ترڅ کې له یوه متقابل برید څخه «د ځانونو د خوندي کولو لپاره د انساني سپر په توګه کاروي».

اېس ډي اېف هغه زندان د امریکایي او نورو بهرنیو ځواکونو په مرسته چې د کردي وتلیو واحدونو د ملاتړ لپاره یې ور دانګلي وو، له څو ورځني جنګ څخه وروسته بېرته ترلاسه کړ.