په بغلان کې د حرفوي روزنې مرکز د فقر په له منځه وړلو کې مرسته کوي

بغلان -- په بغلان ولایت کې یو نوی تخنیکي او د حرفوي روزنې مرکز به له سلګونو بې وزلو ښځو او سړیو سره مرسته وکړي چې پر ځان د بسیاینې لپاره د اړتیا وړ مهارتونه ترلاسه کړي.

د خوړو نړۍ وال پروګرام (ډبلیو اېف پي) له اغاخان پرمختیایي شبکې (ای کی ډي اېن) سره په ګډه په پلخمري ښار کې دا روزنیز مرکز جوړ کړ چې د تلې په ۲۵مه پرانستل شو.

د ای کی ډي اېن د اقتصادي مشارکت د څانګې رییس محمد طاهر سلطاني وویل، «موږ یو تخنیکي او د حرفوي روزنې مرکز جوړ کړی چې په کې ۴۲۷ ښځې او ۷۳ سړي دا فرصت لري چې د شپږو میاشتو په ترڅ کې د خیاطۍ، خامک کولو، په څرمنه باندې د ګلدوزۍ او د موټرسایکلونو د ترمیم په څېر ساحو کې مهارتونه زده کړي.»

هغه وویل، «ګټه اخیستونکې غریب ښځې او سړي دي چې د بغلان ولایت په مرکز کې له بېلابېلو ناحیو څخه په ګوته شوي دي.»

هغه زیاته کړه، «هغوی به د روزنې په ترڅ کې د میاشتې ۷۰۰۰ افغانۍ (۸۰ ډالر)، د خوراکي توکو مرسته او د کار وسایل په وړیا توګه ترلاسه کوي.»

هغه وویل، «د تخنیکي او حرفوي روزنې د مرکز د جوړولو هدف دا دی چې هغو ښځو ته چې له اقتصادي ستونزو سره مخامخ دي، داسې یو مسلک ور وښودل شي چې له هغوی سره په راتلونکي کې د پرځان بسیاینې او د یوه عاید د ګټنې په برخه کې مرسته وکړي.»

سلطاني وویل، ای کی ډي اېن پلان لري چې د پروژې د لومړۍ مرحلې له بشپړېدلو څخه وروسته دویمه مرحله پیل کړي څو نورې منزوي شوط ښځې هم وکولی شي چې یو مسلک زده کړي او پر خپلو ځانونو بسیا شي.

د بې وزلۍ پر ضد مجادله

په بغلان ولایت کې د کار او ټولنیزو چارو رییس نصرت الله پارسا وویل، «لومړی موږ دا ښځې سروې کړې، او له په ګوته کېدلو او بایومتریک کېدلو څخه وروسته، هغوی خپل عملي او نظري درسونه پیل کړل.»

هغه وویل، «ښځې په ټولنه کې یو مهم رول لوبوي، او دا موږ پورې تړاو لري چې د هغوی لپاره کاري فرصتونه برابر کړو څو هغوی وکولی شي چې د ژوند څوری وګټي.»

هغه وویل، دغه ډول روزنیز کورسونه به د فقر په راکمولو او د ښځو په پیاوړي کولو کې مرسته وکړي.

په بغلان کې د مدني ټولنې یوه فعال روح الله قرباني وویل، «که ښځو ته په بېلابېلو برخو کې فرصت ورکړل شي، هغوی کولی شي چې تغیر راولي او په اقتصادي ننګونو برلاسې شي.»

قرباني وویل، «له کار څخه د ښځو ایسارول نه یواځې اقتصادي ستونزې زیاتوي،‌ بلکې دغه راز د افغاني کورنیو تر منځ د بې وزلۍ کچه هم لوړوي.»

هغه زیاته کړه، «د تېرو دوو لسیزو په ترڅ کې ښځو هم د سړیو په څېر زده کړې او پرمختګونه کړي دي. هغوی باید فرصت ولري چې بهر وځي او د دولتي او خصوصي سکتور په دوایرو کې کار وکړي.»

د ټولنې د اوږو بار نه کېدل

په دغه مرکز کې یو شمېر ګټه اخیستونکې، چې ډېرې یې د ښوونځي د عمر زده کوونکې دي، په روزنیز مرکز کې داسې یوه لاره ویني چې کولی شي د رواني فشارونو پر وړاندې، په ځانګړې توګه له دې امله چې هغوی ښوونځیو ته له تګ څخه ایسارې شوي دي، مقابله وکړي.

په بغلان ولایت کې د بي بي عایشې صدیقې د لېسې د دولسم ټولګي یوې زده کوونکې نصیرې محمدي چې ۲۱ کاله عمر لري، سلام ټایمز ته وویل چې د مسلکي کاري فرصتونو د نشتوالي له امله، هغې پرېکړه وکړه چې ګنډل زده کړي او خیاطه شي.

هغې وویل، «زه سږ کال فارغېدم، خو دا چې ښوونځي بند پاتې شول، ما په مرکز کې د اوبدلو په یوه کورس کې ځان شامل کړ او دا زده کوم چې څنګه ډول ډول جامې جوړې کړم.»

محمدي وویل، د کورس له بشپړولو څخه وروسته به هغه وکولی شي چې له اقتصادي پلوه د خپلې کورنۍ ملاتړ وکړي.

په پلخمري کې د بي بي حوا د نجونو د لېسې د یوولسم ټولګي یوې زده کوونکې روهینې سروري چې ۲۲ کاله عمر لري، وویل چې له دې امله چې ښایي هغه ښوونځي ته لاړه نشي، ګلدوزي زده کوي او دا مهارت د هغې ډېر خوښیږي.

هغې وویل، «که موږ ته صحيح فرصتونه راکړل شي، موږ کولی شو چې تر هر ډول شرایطو لاندې زده کړه او کار وکړو.»

زهره حقجو چې ۲۴ کاله عمر لري او په حرفوي مرکز کې یې شپږ میاشتې روزنه ترلاسه کړې ده، وویل، اوس چې هغې د خیاطۍ مهارتونه زده کړي دي، کولی شي چې له خپلو ترلاسه کړیو مهارتونو څخه داسې کار واخلي چې د خپلې کورنۍ اقتصادي ملاتړ پرې وکړي.

هغې وویل، «هره ورځ زه له خپل کور څخه راوځم او دلته راځم یو دلیل لري؛ چې څه زده کړم او د ټولنې په اوږو باندې بار نشم.»

هغې وویل، «په اوسنیو شرایطو کې د ګنډلو زده کول، په ځانګړې توګه د ښځو لپاره یواځینی انتخاب دی، او موږ یې باید زده کړو.»

هغې زیاته کړه،‌ «زما پلار ناروغ دی، او زما مور وظیفه نه لري. زه باید ګنډل وکړم او له خپل عاید څخه د خپلې کورنۍ د مالي ملاتړ لپاره کار واخلم.»

زهرې حقجو وویل، «دا د نجونو او ښځو لپاره یو غټ فرصت دی ترڅو په خپلو ځانونو باندې بسیا شي څو هغوی سره یوځای زده کړه وکړي او د یوه بهتر راتلونکي لپاره پلان ونیسي.»