د کندوز بې وزلې ښځې په کوڅو کې لیلامي جامې خرڅوي

| 07-18-2023

پوهنتونونو ته د نجونو په زده کړو د بنديز په اړه وروستۍ پرېکړه خواشينوونکې او دردوونکې ده. په تاسف سره بايد ووايم چې په تېرو پنځه لسيزو کې مېرمنې تر بل هر چا ډېرې د ناسمو سياستونو قرباني شوي دي. زمونږ په تاريخ کې د استقلال، سولې، ملت جوړونې او شخصيتونو په روزنه کې د مېرمنو رول ډېر بارز او له هيچا کم نه دی. زمونږ د خويندو د زده کړو او کار په اړه د پرون او نن پرېکړې د عصري نړۍ د تقاضاوو او د افغانانو له غوښتنو سره په مغايرت کې دي. د سرپرست حکومت نه مو هيله ده چې له داسې تصاميمو ډډه وکړي کوم چې د ولس د لا ډېرو فاصلو سبب ګرځي. مونږ مطمين يو چې د سرپرست حکومت اکثريت شمېر کې غړو دا درک کړې ده. زه په سبا او راتلونکي باوري يم. په دې خاوره او ملت تر دې سختې او درنې غميزې راغلي دي. دا ملت نه ماتېدونکی دی. په دې باوري يم چې ډېر ژر به د ملت ارادې ته مراجعه کېږي. مطمين يو چې د ملت په ګټه او خوښه به د داسې فيصلو شاهدان و اوسو، چې افغانستان به د ټولو افغانانو ګډ کور وي. څو چې دا زمکه اسمان وي څو چې پاتې يو افغان وي څو چې دا جهان ودان وي تل به دا افغانستان وي

| 07-17-2023

بې وزله ښځې باید څه وکړي؟ هغوی بله لاره نه لري. په افغانستان کې شریعت نافذ دی. ښځې باید د سرک په سر کېني. دا کار په شريعت کې جواز لري، خو درس او کار په شريعت کې ناروا دی. دا زمونږ د هیواد قانون دی. مونږ باید ورسره عادت شو. نن ورځ د خپلو کورونو ډوډۍ ګټونکي خپلې جامې په لیلام کې پلوري. سبا به خپل لوښي او کالي خرڅوي. دوی باید څه وکړي ځکه چې دوی په یوه اسلامي هیواد کې ژوند کوي چې قانون دوی ته اجازه نه ورکوي چې زده کړې وکړي او په ورته دفتر کې په درناوي سره کار وکړي.

| 07-12-2023

نو ښځې به نور څه وکړي. مجبورې دي داسې کارونو ته مخه کړي. مخکې خو ښه وه میلیونونه په زده کړو بوختې وې او سل ګونه زره بیا منظم کار درلود. ښه په حیا او عزت کې به دفتر ته تللې او بېرته به خپل کور ته تللې، مګر اوس په لارو او کوڅو کې داسې په بد وضعیت کې ناستې وي. ولا چې انسان وي چې حتما به یې زړه دردېږي. مګر افغانستان نه یوازې دا چې د ښځو هیلې له خاورو سره خاورې شوې، د نارینه وو هم چندان قدر نشته، خو دا چې موږ ټول له ښځو پیدا او زېږولي یو، باید دومره سپک چلند ورسره ونه کړو. اسلام ښځو ته د زده کړو حق ورکړی، مګر دا حق ترې په افغانستان کې اخیستل شوی دی. تازه په تازه د ازموينو ملي ادارې لپاره د طالبانو چارواکو د سږنۍ کانکور ازموينې جزیات خپاره کړي دي. دغې ادارې ویلي، چې یاده ازموینه به د يوې مياشتې په موده کې د هېواد له ګوټ ګوټ څخه د ۱۰۰زرو داوطلبانو په ګډون پنځو پړاوونو کې واخيستل شي. د یادې ادارې مطبوعاتو برخې مسؤلان وايي چې دغې ازموینې لومړی پړاو به د چنګاښ میاشتې پر ۲۹مه او ۳۰مه نېټو ترسره شي. خو هم مهال یې ویلي چې د ۱۴۰۲ کال په کانکور ازموینه کې نجونې نه‌دي شاملې. د طالبانو له بیا واکمنیدو سره، د دوی د لومړۍ دورې واکمنۍ په شان، نجونې او ښځې له زده کړو، کار او ډېرو نورو فعالیتونو بیا منع شوي، چې د طالبانو رژیم د افغان ولس له سخت غبرګون سره مخامخ دی، خو دا چې رسنۍ په افغانستان کې سانسو او طالبان د وسلې په زور له خلکو سره خبرې کوي، نو څوک څه نه شي ویلی او نه خپل غږ پورته کولی شي، کنه د طالب له نوم څخه د خلکو کانګې راځي.

| 07-10-2023

خدای دې د طالب خونه ورانه کړي چې هېڅ یو وګړی ترې ښه ژوند نه شي کولی او نه یې ښه ژوند کولو ته پرېږدي. ښځې، سړي، ماشومان، لویان... ټول ترې پاذاب دي او کومې پالېسیانې چې دوی جوړوي د اکثرو خلکو (افغانانو) په زیان دي. دا اوس یې د لوړو زده کړو (پوهنتون لوستلو) برخه کې داسې یوه کړنلاره جوړه کړله چې کېدای شي کال دوو کې خصوصي پوهنتونونو او د لوړو زده کړو مؤسسات یې له امله وتړل شي. مګر دوی چې د بانکي سیستم پر ځای په بوجیو کې هره ورځ پیسې ټولوي او خېټې یې غوړي دي کیسه کې یې هم نه دي چې وطن کوم طرف ته روان دي او خلک په کوم وضعیت کې دي. وه د خدای بنده ګانو وطن مو غین په غین کړ. لږ د انسانیت کارونه وکړئ چې خلک درڅخه راضي او ترڅنګ مو ودریږي. ټول خلک درڅخه فرار او په تېښته کې دي. اول یې د ښځو د تعلیم دروازې بندې کړې بیا یې د کار حق ترې واخیسته. اوس یې سینګارتونونه هم بند کړل. تازه په تازه یې داسې طرحه جوړه کړې چې شاوخوا یو نهايي دوو کلونو کې به خصوصي تحصیلي بنسټونو خپل فعالیتونه ودروي. دا خو ولاکه حکومت داري وي او نه مشري ده چې یو څوک یې وکړي.

| 07-09-2023

په هر هیواد کې ښځې او نارینه کار کوي لاکن دا د حکومت مسؤلیت دی چې د ښځو لپاره مرستندوی پروګرامونه تطبیق کړي او د داسې ښځو لپاره چې غواړي کار وکړي، د پانګې اچونې په برخه کې همکاري وکړي. مثلا د داسې ښځو لپاره، حکومت او مرستندویې موسسې کولی شي چې د لرګي غرفې ورته واخلي چې دوی په کې کالي خرڅ کړي. نه یوازې کالي، بلکې دوی کولی شي چې ترکارۍ، د سیمسارۍ توکي او دغه راز خوراکي توکي خرڅ کړي. په دې برخه کې د افغانستان حکومت، خارجی موسسې او هغه داخلي شتمن خلک چې کافي اندازه پیسې لري، کولی شي چې له غریبو ښځو سره مرسته وکړي.

| 07-08-2023

په افغانستان کې ډیرې ښځې شته چې د خپلو کورنیو مشرانې دي او سرپرستي یې کوي. په افغانستان کې بېکاري خپل اوج ته رسېدلې ده، ځکه زموږ ځوانانو ته د کار کولو لپاره هېڅ نشته او بې روزګاره پاتې دي. ډیری ښځې لاسي صنایع پلوري. هغه ښځې چې د دوهم لاس سامانونه پلوري، هیڅوک نشته چې له دغو ښځو څخه یاد توکي واخلي، ځکه خلک پیسې نه لري چې غیر خوراکي توکي واخلي. په ښار کې د ښځو او نارینه وو تګ راتګ ډېر دی، خو څوک یې نه اخلي. خلک کار نه لري، له کوره ووځي، له دې لارې ځانونه مصروفوي. که څوک د افغانستان د ولایتونو په ښارونو او یا د کابل ښار کې کار کوي، ټول یې پوروړي دي. دا دوکانداران دومره سپما نه کوي چې د خپل دوکان کرایه او د کلنۍ مالیې پیسې ورکړي، د کورنۍ لګښتونه خو په ځای پرېږده. که په کابل کې له قصاب څخه وپوښتئ چې ورځ دې څنګه ده؟ ښايي هغه به درته ووايي چې زه په سلګونو زره افغانۍ پوروړی یم. که د مېوې له پلورونکي وپوښتې، هغه هم په سلګونو زره افغانۍ پوروړی دی، ځکه څوک یې نه اخلي. هیڅ کار نشته. دوکاندار ایله دومره څه پلوري چې خپل پور پرې بېرته تادیه کړي. د سواد د نشتوالي له امله خلک خپل جایدادونه په لږو یا هیڅ پیسو پلوري. په پای کې باید ووایو چې ملګري ملتونه باید د افغانستان د اوسني حکومت په رسمیت پېژندلو کې ډېره هڅه وکړي. که دا حالت دوام وکړي، د افغانانو راتلونکی به ورځ تر بلې خرابیږي.

| 07-07-2023

افغانانې په اوسني ستونزمن حالت کې له ګڼو ستونزو سره مخامخ دي او دا وضعیت ډېر کړکېچن دی. دا یوازې کندوز نه دی. د هېواد په بېلابېلو ولايتونو کې ښځې له دې ډول کړاوونو سره مخامخ دي. هغه ښځې چې د کور نارینه مشر نه لري، مجبورې دي چې د خپلو ماشومانو پالنه وکړي. که څه هم په کار او مزدورۍ کې شرم نشته، لاکن نړۍ واله ټولنه او واکمن حکومت بايد له دې حالت څخه د دوی د را ايستلو لپاره چټک ګامونه پورته کړي.