![افغان امنیتي پرسونل د سپتمبر په ۱۳مه په کابل کې د کرکټ یوه ځایي لوبغالي سره نژدې له یوې چاودنې څخه وروسته تیارسۍ ولاړ دي. یوه ځانمرګي بمي بریدګر د یوه پولیس په شمول درې کسان ووژل. [وکیل کوهسار/ای اېف پي]](/cnmi_st/images/2017/09/13/9599-000_se0f4-739_416.webp)
کابل -- پولیسو وویل، چې یوه ځانمرګي بمي بریدګر هغه وخت ۳ کسان ووژل او ۵ نور ټپیان کړل چې ځان یې د چارشنبې په ورځ /د سپتمبر ۱۳مه/ په کابل کې د کرکټ یوه لوبغالي سره نژدې والوزاوه.
بریدګر وروسته له هغه بم ته چاودنه ورکړه چې هغه د لوبغالي په لور، چې مېچ په کې روان وو، ور روان وو او د تلاشۍ په یوه امنیتي پوسته کې ودرول شو.
د پولیسو ویاند بصیر مجاهد ای اېف پي ته وویل، «امنیتي ځواکونو د خپلو ځانونو په قرباني کولو سره د دې مخه ونیوله چې بریدګر په لوبغالي کې دننه ګڼو خلکو ته ځان ور ورسوي او یو ناورین رامنځته کړي،»
یو پولیس افسر ووژل شو او دوه نور ټپیان شول.
د ای اېف پي یوه خبریال وویل، چې ګڼ شمېر امبولانسونه ولیدل شول چې له سیمې څخه روان ول، او داسې ښکارېدل چې ټپیان روغتونونو ته لېږدوي.
د افغانستان د کرکټ بورډ یوه ویاند فرید هوتک ای اېف پي ته وویل، چې چاودنه په داسې حال کې وشوه چې په لوبغالي کې دننه د کرکټ مېچ روان وو.
هوتک وویل، چې مېچ د لنډ وخت لپاره ودرول شو، او زیاته یې کړه، چې «ټول لوبغاړي او د کرکټ بورډ چارواکي خوندي دي».
