په زرګونو افغانان له امنیتي ځواکونو سره د یوځای کېدلو لپاره نوم لیکنه کوي

کابل -- د دفاع او کورنیو چارو د وزارتونو د چارواکو په وینا، په زرګونو افغان ځوانان د دې لپاره نوم لیکنه کوي چې له افغان ملي اردو او افغان ملي پولیسو سره یوځای شي.

د دفاع وزارت ویاند، غفوراحمد جاوېد، سلام ټایمز ته وویل، «په هېواد کې د افغان ملي اردو د استخدام ټول ۴۰ مرکزونه دي، چې درې په کابل ولایت کې، دوه دوه مرکزونه په ننګرهار،‌ کندوز او بلخ ولایتونو کې، او یو یو مرکز په پاتې ۳۰ ولایتونو کې موجود دي،»‌

هغه وویل، «د استخدام پروسه نورماله ده او په ښه ډول پرمخ ځي،» او زیاته یې کړه چې افغان ملي اردو په منظمه توګه خپل د استخدام هدفونه پسې پراخوي.

جاوېد وویل، «د افغان ملي اردو د استخدام مرکزونه هره میاشت له ۶۰۰۰ څخه ډېر کسان استخداموي،»

په دفاع وزارت کې د افغان ملي اردو د استخدام پرسونل اکثر وختونه ځوانان دې ته هڅوي چې د ټولنیزو رسنیو د پاڼو او له قومي مشرانو، د جوماتونو امامانو، د مدني ټولنې غړو او د پارلمان استازو سره د کتنو له لارې له ملي اردو سره یوځای شي.

د کورنیو چارو د وزارت د ویاند مرستیال، نصرت رحیمي، وویل، د افغان ملي اردو د استخدام مرکزونو ته همدارنګه په کابل او نورو ولایتونو کې زیات شمېر سړي او ښځې راځي چې غواړي له پولیس ځواک سره یوځای شي.

هغه سلام ټایمز ته وویل، «زمونږ د ځوانانو دا غوښتنه، چې له افغان ملي پولیسو سره یوځای شي، دومره زیاته ده چې حتی مونږ دې ته اړتیا نه لرو چې د استخدام کوم اعلانونه خپاره کړو،»‌

هغه وویل، «اوس مونږ ۲۰۰۰۰ نوي تیار سرتېري لرو چې د نوم لیکنې لومړۍ مرحله یې بشپړه کړې او دې ته تیار دي چې زمونږ د امنیتي ځواکونو تر څنګ کار کول پیل کړي،»

هغه وویل، «دا ۲۰۰۰۰ کسان چمتو دي او سم چې د امنیتي ځواکونو په لیکو کې تش ځایونه پیدا شي هغوی به کار کول پیل کړي،»

که څه هم چې افغان ځواکونو ته ځاني زیانونه ور رسیږي، لاکن د راپورونو په اساس، د استخدام زیاتېدونکی شمېر د دې لپاره کفایت کوي چې په هېواد کې د ځواکونو ټول شمېر د پایښت وړ سطحه کې زیاتېدونکی وساتل شي.

د افغانستان خدمت ته چمتووالی

په کابل کې د پوځي چارو تحلیلګر، متقاعد جنرال عتیق الله امرخېل، سلام ټایمز ته وویل، «زمونږ خلک له خپل وطن سره مینه لري او غواړي چې د امنیتي ځواکونو د غړو په توګه د خپل هېواد خدمت وکړي، او دا یو حقیقت دی،»

د میدان وردک ولایت یو اوسېدونکی، ګل محمد چې ۲۶ کاله عمر لري، په وروستیو کې کابل ته د دې لپاره راغلی چې د افغان ملي اردو لیکو سره یوځای شي.‌

هغه سلام ټایمز ته وویل، «زه غواړم چې له افغان ملي اردو سره کار پیل کړم او د خپل هېواد او خپلو خلکو خدمت وکړم،»

هغه وویل، «ان له هغه وخته چې زه ماشوم وم، ما غوښتل چې نظامي سړی رانه جوړ شي چې د خپل هېواد خدمت وکړم، خوندي یې کړم او دفاع ترې وکړم. زه ډېر خوشحال یم چې اوس راته شرایط برابر دي.»

۲۷ کلن غلام سخي، چې اصلاً د بامیان ولایت اوسېدونکی دی خو له خپلې کورنۍ سره په کابل کې ژوند کوي، وویل، چې هغه هم فیصله کړې چې له افغان ملي اردو سره یوځای شي.

هغه سلام ټایمز ته وویل، «افغانستان او زمونږ خلک امنیت ته ضرورت لري. زه غواړم چې له افغان ملي اردو سره یوځای شم او د خپل هېواد خدمت وکړم او د خپلو خلکو او خپل هېواد په وړاندې خپل مسؤلیتونه ترسره کړم.»‌

هغه وویل، «کله چې تاسو غواړئ چې په جدي او صادقانه توګه د خپلو خلکو او خپل هېواد خدمت وکړئ،‌ تاسو باید د خپل ژوند قرباني ورکړئ، او زه دې ته تیار یم چې دا کار وکړم،»

د استخدام لپاره شرطونه

هغه افغانان، چې غواړي له خپلو امنیتي ځواکونو سره یوځای شي، هغوی باید ځانګړي شرطونه پوره کړي.

رحیمي وویل، «د عسکرۍ لپاره نیول کېدونکی کس باید د افغانستان تبعه وي، افغاني تذکره ولري او له اړتیا سره سم فزیکي قوت ولري او جرم یې نه وي ترسره کړی،»

هغه وویل، نیول شویو کسانو ته به له شپږو څخه تر نهو میاشتو پورې روزنه ورکول کیږي.

د دفاع وزارت ویاند جاوېد وویل، یوه اندېښنه د امنیتي ځواکونو په منځ کې د دښمن د نفوذي کسانو حضور دی، چې په تېر وخت کې داسې پېښې شوي دي.

د داسې کسانو د نفوذ دمخنیوي لپاره په کار ده چې د افغان ملي اردو هر نوی سرتېری دوه داسې حقوقي سندونه وړاندې کړي چې په کې دوه بېلابېل کسان د عارض د شخصیت او د وظیفې لپاره مناسبت تضمین کړي.

دغه اسناد د استخدام د یوه څېړونکي ټیم له خوا، چې د ملي امنیت د ریاست او د دفاع وزارت د استخباراتو او تفتیش د ادارې استازي په کې شامل دي، ارزول کیږي.

نوي جذب شوي افراد به بیا د پوځي روزنې مرکز ته ولېږل شي چې هلته به هغوی روزنیز پروګرامونه بشپړ کړي او عملي درسونه به واخلي.