افغانان په مهمو پارلماني انتخاباتو کې رایه اچونې ته مخه کوي

هرات -- افغانان دې ته چمتو دي چې دا شنبه /د تلې ۲۸مه/ رایې ورکړي او او د راتلونکې ولسي جرګې لپاره خپل استازي وټاکي.

له ۲۵۰۰ څخه ډېرو کاندیدانو، چې د ۲۴۹ چوکیو لپاره سیالي کوي، د تلې د ۶ مې او ۲۵مې تر منځ ۲۰ ورځې لپاره کمپاینونه وکړل چې وروسته ترې دوه ورځې چوپتیا وه. د انتخاباتو د قانون په اساس، کاندیدان اجازه نه لري چې د انتخاباتو له ورځې څخه دوه ورځې مخکې وخت نه تر رایه اچونې پورې وخت کې کمپاین وکړي.

افغان ملي دفاعي او امنیتي ځواکونو یو پلان ترتیب کړی چې په اساس به یې د هېواد په بېلابېلو برخو کې نژدې ۵۱۰۰ د رایه اچونې محلاتخوندي کړای شي.

غزني او کندهار یوازني دوه ولایتونه دي چې د امنیتي اندېښنو له امله به اوس په کې انتخابات ترسره نشي او یوه بله نېټه به ورته وروسته اعلان شي.‌

د ولسمشر غني دفتر د جمعې په ورځ په یوه اعلامیه کې وویل، وروسته له هغه، چې د کندهار ولایت امنیه قوماندان جنرال عبدالرازق په ډزو کې ووژل شو، غني، د انتخاباتو د خپلواک کمېسیون په غوښتنه، د جمعې په ورځ /د تلې ۲۷مه/ لږ تر لږه د یوې اونۍ لپاره په دغه ولایت کې انتخابات وځنډول.

په اعلامیه کې راغلي، چې د انتخاباتو خپلواک کمېسیون به په کندهار کې د انتخاباتو لپاره یوه نوې نېټه اعلان کړي.

د ۳.۵ میلیونو ښځو په ګډون، نژدې ۹ میلیونو افغانانو د دې لپاره خپل نومونه ثبت کړي چې د شنبې په ورځ رایه ورکړي. یوازې په هرات ولایت کې، خواوشا ۵۵۰۰۰۰ خلکو د دې لپاره خپل نومونه لیکلي چې رایې ورکړي.

د انتخاباتو خپلواک کمېسیون لږ تر لږه د مدني ټولنې ۱۸سازمانونو، ۲۸ سیاسي ګوندونو او ۳۶ د رسنیو استازو ته د دې جوازونه ورکړي چې د انتخاباتو پروسه وڅاري.

په دې لیکنه کې په هرات ولایت کې د انتخاباتو لپاره تیاري انځور شوی دی.