کابل -- په افغانستان کې په وروستیو جګړو کې لږ تر لږه ۸۳ تنه اورپکي او ۱۱ تنه سرتېري ووژل شول.
افغانستان ټایمز د دفاع وزارت د سپتمبر د ۲۰مې د اعلاميې په اساس خبر ورکړ چې د ۲۴ ساعتونو په دوران کې د افغانستان په بېلابېلو برخو کې ۶۸ تنه اورپکي چې ۴۲ تنه د داعش غړي په کې شامل ول ووژل شول.
د دفاع وزارت وویل چې ۱۱ تنه افغان عسکر هم ووژل شول.
د کندوز ولایت د والي ویاند سید محمود دانش د سپتمبر په ۲۰مه پژواک خبري اژانس ته وویل چې عسکرو د سپتمبر په ۱۹مه د یاد ولایت په دشت ارچي ولسوالۍ کې لږ تر لږه ۲۰ تنه اورپکي ووژل. ښایي چې هغوی د هغو ۶۸ اورپکو په ډله کې شامل وي چې د دفاع وزارت یې د مړینې راپور ورکړی وو.
د افغانستان ټایمز د راپور په اساس، د کورنیو چارو وزارت د سپتمبر په ۲۰ مه وویل چې د طالبانو د یوه مهم قوماندان په شمول لږ تر لږه ۵ تنه اورپکي د سپتمبر په ۱۹مه د غزني ولایت په پناه کې له عسکرو سره په جګړه کې ووژل شول. ښایي چې هغوی هم د هغو ۶۸ مړو اورپکو په ډله کې شامل وي چې مخکې یې راپور ورکړل شوی وو.
افغانستان ټایمز او خامه پرېس د کورنیو چارو د وزارت او د ملي امنیت د لوی ریاست له قوله لیکلي چې افغان ځواکونو په وروستیو وختونو کې څلور شکمن ترهګر؛ دوه په لغمان ولایت او دوه نور په خوست ولایت کې ونیول.