په عکسونو کې:‌ د افغان زعفرانو تولید او عواید ډېر شوي دي‌

کابل -- ځایي خبري ادارو راپور ورکړ، چې د افغان زعفرانوتولید په روان کال کې ۲۰٪ زیات شوی،‌ او له دغه طلایي ګل څخه د عوایدو ګټه ۳۳٪ ډېره شوې ده.‌

دا اعلان د دوشنبې په ورځ /د نومبر ۶ مه/ په کابل کې د زعفرانو په هکله په پنځم ملي کانفرانس کې وشو.‌

د پژواک خبري اژانس د راپور له مخې، د کرنې، اوبه لګولو او مالدارۍ سرپرست وزیر نصیراحمد دراني په کانفرانس کې وویل، چې «له نېکه مرغه، د هېواد اقلیم د زعفرانو د کرنې او تولید لپاره ډېر مناسب دی،»

هغه وویل،‌ افغان بزګرانو په ۲۰۱۷ کال کې د زعفرانو له تولید څخه ۸۲۴ میلیونه افغانۍ ګټه کړې ده، په داسې حال کې چې په ۲۰۱۶ کال کې یې ۶۱۸ میلیونه افغانۍ ګټه کړې وه.

سربېره پر دې، په زعفرانو کرل شوې ځمکه له ۲۵۰۰ اېکړه څخه له ۳۰۰۰ اېکړو نه ډېره زیاته شوې ده، چې په تولید کې یې د تېر کال په نسبت ۲۰٪ ډېرښت راوړی دی.‌

د راپورونو له مخې، تېر کال یوه کیلوګرام زعفران په ۱۰۰۰۰۰ افغانۍ خرڅېدل.

دراني د کانفرانس له برخه والو څخه، چې جیګپوړي افغان چارواکي او د زعفرانو د صنعت سهم لرونکي هم په کې شامل ول، وغوښتل چې په دې هکله خپل وړاندیزونه وکړي چې څنګه کېدای شي چې د زعفرانو کښت، تولید او کیفیت او همدارنګه د هغو پروسېس معیاري کړای شي.

د افغانستان د سوداګرۍ او صنایعو د خونې د رییس لومړي مرستیال الحاج خان جان الکوزي وویل، چې که د زعفرانو کیفیت بهتر شي او په معیاري توګه په پاکټونو او کارتنونو کې ځای پرځای شي،‌ کېدای شي چې د افغانستان په اقتصادي پرمختګ کې یو حیاتي رول ولوبوي.‌

هغه وویل، خصوصي سکټور تیار دی چې د زعفرانو په پروسېس کې د اړتیا وړ ملاتړ وړاندې وکړي.‌

په هرات ولایت کې د زعفرانو د یوه تولیدوونکي او صادروونکې شرکت اجرایوي رییس سید عبدالوهاب وویل، چې د افغانستان د زعفرانو تولید ورځ تر بلې زیاتېږي.‌

هغه وویل، چې د هغه شرکت تېر کال ۱۰۰ کیلوګرامه زعفران صادر کړل او تمه لري چې سږ کال به نیم ټن صادر کړي.‌

هغه وویل، ډېر وخت زعفرانو ته په افغانستان کې د اپین د بدیل په سترګه کتل کیږي، او زیاته یې کړه چې زعفران ښځو ته، چې اکثر لږ کاري فرصتونه ترلاسه کوي، کاري فرصتونه هم برابروي.‌

د پروان ولایت یوې بزګرې ګل اندام امېدوار چې په کانفرانس کې یې برخه اخیستې وه،‌ وویل، چې هغې سږ کال یو جریب (تقریبا نیم اېکړ) ځمکه باندې زعفران کرلي وو.‌

د طلوع نیوز د خبر له مخې، هغې وویل، «ما زعفران کرلي وو او یو شمېر ښځو راسره په کې کار وکړ،»