امنیت

جیګپوړو پوځي مشرانو په کابل کې د سیمه ییز امنیت په هکله د خبرو اترو کولو لپاره سره وکتل

سلام ټایمز

د ناټو د قاطع ملاتړ ماموریت قوماندان جنرال جان نېکلسن، د سیمې او متحده ایالاتو له یو شمېر پوځي چارواکو سره یوځای، د سې شنبې په ورځ /د جنورۍ ۱۳ مه/ په کابل کې په یوه امنیتي کانفرانس کې د پاکستان د پوځ لوی درستېز جنرال قمرجاوېد باجوه خبرو ته غوږ نیولی دی. [آی اېس پي آر]

د ناټو د قاطع ملاتړ ماموریت قوماندان جنرال جان نېکلسن، د سیمې او متحده ایالاتو له یو شمېر پوځي چارواکو سره یوځای، د سې شنبې په ورځ /د جنورۍ ۱۳ مه/ په کابل کې په یوه امنیتي کانفرانس کې د پاکستان د پوځ لوی درستېز جنرال قمرجاوېد باجوه خبرو ته غوږ نیولی دی. [آی اېس پي آر]

راولپنډۍ -- د افغانستان، پاکستان، متحده ایالاتو او د منځنۍ اسیا د یو شمېر هېوادونو جیګپوړو پوځي مشرانو د سې شنبې په ورځ /د فبرورۍ ۱۳ مه/ په کابل کې سره ولیدل چې د یو لړ امنیتي مسایلو په هکله سره خبرې اترې وکړي.

په غونډه کې د نورو تر څنګ د متحده ایالاتو د مرکزي قوماندانۍ قوماندان جنرال جوزف ووټېل، د ناټو د قاطع ملاتړ ماموریت قوماندان جنرال جان نېکلسن، د پاکستان د پوځ لوی درستېز جنرال قمر جاوېد باجوه، او د افغانستان د پوځ لوی درستېز ډګر جنرال محمد شریف یفتلي برخه اخیستې وه.

په غونډه کې همدارنګه د قزاقستان، قرغزستان، تاجکستان او ازبکستان په شمول د منځنۍ اسیا د ګڼو هېوادونو پوځي مشرانو، او د ناټو یو شمېر چارواکو برخه اخیستې وه.

طلوع نیوز د افغان چارواکو له قوله راپور ورکړ، چې د کانفرانس تمرکز په دې وو چې د یاغیتوب پر ضد خبرې اترې وکړي او د هېوادونو تر منځ پوځي همکاري پیاوړې شي.

د پاکستان د پوځ د عامه اړیکو د ادارې (آی اېس پي آر) په وینا، باجوه د کانفرانس برخه والو ته وویل، «سیمه ییزې سولې او ثبات ته تللې لاره له افغانستان څخه تېرېږي».

د آی اېس پي آر په وینا، باجوه وویل، «همکاري او استقامت د ټولو ننګونو یا چلینجونو ځواب دی، چې پاکستان تیار دی په دې برخه کې خپل رول ترسره کړي،»

د افغانستان د دفاع وزارت ویاند جنرال دولت وزیري ازادۍ راډېو ته وویل، «زه باور لرم چې بالاخره پاکستان به نړیوال فشار ته سر ټیټ کړي او د ترهګرۍ پر ضد جګړې سره به یوځای شي.»

د سې شنبې د ورځې مجلس په داسې حال کې ترسره کیږيچې د افغانستان په بېلابېلو برخو کې د طالبانو او د داعش د اورپکو په بریدونو کې زیاتوالی راغلی دی.

همکاري 'کولی شي چې سوله تضمین کړي'

په پېښور کې د امنیتي چارو تحلیلګر متقاعد جګړن محمودشاه وویل، پاکستان او افغانستان نشي کولی چې له همکارۍ څخه پرته په سیمه کې د ترهګریزو عملونو د ناپایه سلسلې په وړاندې مقابله وکړي.

هغه سلام ټایمز ته وویل، «د پاکستان، افغانستان او د متحده ایالاتو تر منځ یووالي ته عاجل ضرورت دی... چې د پولې دواړو غاړو ته اورپکو ته ماتې ورکړي،»

هغه وویل، «د افغانستان او پاکستان ترمنځ قوي همکاري کولی شي چې بشپړه سوله تضمین کړي،»

محمودشاه وویل، د کابل د سې شنبې د ورځې کتنه مهمه ده.

هغه وویل، «دواړه هېوادونه باید داسې لارې او وسیلې ومومي چې خپلې سرحدي سیمې خوندي کړي او د اورپکو د موجودیت او فعالیتونو په هکله استخباراتي معلومات شریک کړي،»

هغه وویل، هغوی له اورپکۍ څخه ډېر متاثر شوي او له ډېر وخت راهیسې هغوی دا درک کړې چې ترهګر د سرحد دواړو غاړو ته د ویجاړتیا سبب شوي دي.

هغه وویل، «د دواړو هېوادونو خلک سوله غواړي او له ترهګرۍ څخه کرکه کوي،»

[له پېښور څخه اشفاق یوسفزي د دې راپور په برابرولو کې همکاري کړې ده.]

آیا دا لیکنه ستاسو خوښه شوه؟

0 تبصره

د تبصرو تګلاره * ضروري برخې ښيي 1500 / 1500