![د آرشیف په دې عکس کې چې د زمري په ۱ اخیستل شوی، یوه داخلي امنیتي ګزمه په شمال ختیځه سوریه کې په الحول کمپ کې ښځې چې ادعا کیږي د داعش د جنګیالیو مېرمنې دي، بدرګه کوي. [دلیل سلیمان/ای اېف پي]](/cnmi_st/images/2019/10/17/20446-000_1le7ux-739_416.webp)
نیویارک -- د ملګرو ملتونو د امنیت شورا د چارشنبې په ورځ /د تلې ۲۴مه/ په یوه متفق علیه توګه تصویب شوې اعلامیه کې په سوریه کې د یاغي بندیانو «د تیتېدلو» د خطر خبرداری ورکړ.
یادې شورا وویل، «د امنیت شورا غړو د داعش په شمول د ملګرو ملتونو له خوا نومول شویو ډلو څخه د ترهګرو د تیتېدلو د خطرونو په هکله ژورې اندېښنې څرګندې کړې.»
د شورا ۱۵ غړو وویل چې هغوی په شمال ختیځه سوریه کې «د بشري وضعیت د لا نورې خرابۍ په هکله ژوره اندېښنه» لري.
د شورا اروپایي غړو -- بلجیم، برتانیا، فرانسې، جرمني او پولنډ -- په یوه جلا ګډه اعلامیه کې ټینګار وکړ چې د هغو کمپونو امنیت باید خوندي کړای شي چې هلته یاغي جنګیالي ساتل کیږي.
هغوی وویل، «د ترهګرو جنګیالیو خوندي توقیف لازمي دي څو له ترهګرو ګروپونو سره د هغوی د یوځای کېدلو مخه ونیول شي.»
د یکشنبې په ورځ، کوردي مقاماتو وویل چې په شمال ختیځه سوریه کې د کوردانو له خوا کنټرولېدونکي د عین عیسی په نامه د بې ځایه شویو کسانو له کمپ څخه د خارجي جهادستانو خواوشا ۸۰۰ خپلوان تښتېدلي دي.
داعش د پنجشنبې په ورځ /د تلې ۲۵مه/ وویل چې هغوی د سوریې د کوردانو له خوا ساتل شوې ښځې «خوشې» کړې، خو ګروپ د هغو ښځو شمېر یاد نه کړ او نه یې وویل چې آیا دغه ښځې د داعش غړې یا د جهادستانو مېرمنې وې که نه وې.
ترکیې د تلې په ۱۷مه په سوریه باندې پوځي برید پیل کړ.
د ملګرو ملتونو لپاره د متحده ایالاتو سفیر کیلي کرافټ خبریالانو ته د خبرو کولو پر وخت د واشنګټن دا غوښتنه تکرار کړه چې د ترکیې یرغل ودروي.
«متحده ایالات په ترکیه باندې غږ کوي چې خپل یرغل ودروي او سمدلاسه اوربند اعلان کړي.»
د ملګرو ملتونو لپاره د چین سفیر وویل چې د داسې کمپونو خوندي کول چې هلته یاغیان ساتل کیږي «په ریښتیا سره زمونږ د ټولو لپاره مهم دي،» په داسې حال کې چې د روسیې سفیر واسیلي نابینزیا وویل، «هیڅوک هم باید داسې ونه ګڼي چې دا یوازې د سوریې او عراق مسئله ده.»
