امریکا هغه د کریپټو شبکې په نښه کوي چې د داعش خراسان د تمویل تر شا دي

د امریکا د خزانې وزارت روانه میاشت "د داعش (د عراق او سوریې اسلامي دولت) د خراسان څانګې اړوند د کریپټوکرنسۍ ۱۳۴ والېټ ادرسونه د بندیزونو په لېست کې شامل کړل.

دغه اقدام چې د بهرنیو شتمنیو د کنټرول دفتر (OFAC) له خوا تر سره شوې، په ټرون بلاکچېن کې ۱۳۱ ادرسونه او پر محرمیت باندې متمرکزه مونېرو شبکه کې درې ادرسونه رانغاړي.

OFAC لومړی ځل په د ۲۰۱۵ کال په سپټېمبر کې داعش خراسان د ترهګرې ډلې په توګه وټاکه. دا ډله لا هم په افغانستان، پاکستان او مرکزي اسیا کې فعاله ده.

د بلاکچېن د شننې شرکت چېن انلسس وموندله چې له ۲۰۲۳ کال راهیسې تر بندیز لاندې د ټرون دغو والېټونو تر ۱.۴ میلیونه ډالرو ډېرې مرستې ترلاسه کړې دي.

د یاد شرکت د راپور له مخې، د همدې والېټونو له لارې تر ۸۸۰ زره ډالرو ډېرې پیسې د داعش خراسان د عملیاتو د تمویل لپاره لېږل شوې دي.

چېن انلسس وايي، دا پیسې د افغانستان، پاکستان او د مرکزي اسیا ځینو برخو ته د شبکو له لارې لېږدول شوې دي.

د په نښه شوو ټرون والېټونو کنګلول

د سټېبل کوین خپروونکي شرکت تېتر د OFAC له اعلان لږ وروسته د ټولو ۱۳۱ په نښه شوو ټرون ادرسونو بيلانسونه کنګل کړل.

دا کنګلول ښيي چې اوس مرکزي خپروونکي د حکومتي بندیزونو په پلي کولو کې فعاله ونډه لري.

اوس مهال په امریکا کې داسې کوم قانون نشته چې د سټېبل کوین شرکتونه دې اړ کړي چې د OFAC پرېکړې په سمدستي ډول عملي کړي، خو ډېری شرکتونه دا کار په خپله خوښه ترسره کوي.

د امریکا د خزانې وزیر سکاټ بېسنت د جون په ۲۲مه په یوې اعلامیې کې چې د داعش د مالي بندیزونو په اړه وه، د دې پراخې مبارزې یادونه وکړه.

بېسنت وویل، «داعش لا هم هڅه کوي چې د ترهګریزو بریدونو د تمویل لپاره نوې لارې او وسایل ومومي.»

«متحده ایالات به له ټولو شته وسایلو څخه کار واخلي تر څو د داعش پاتې وړتیاوې له منځه یوسي او د امریکايي وګړو ژوند خوندي کړي.»

پراخ کمپاین

د والېټونو بندیزونه د جون د ۲۲مې نېټې له هغې اقدام وروسته ترسره شول، چې په اروپا، منځني ختیځ او لوېدیځه افریقا کې د درېیو کسانو او شپږو بنسټونو پر ضد ترسره شوي وو.

په دې اقدام کې اسانتیا برابروونکي په نښه شول، چې پکې په سوریه کې مېشت بېټکوېن اېکسچېنج او د ترکیې د پیسو د خدمت یوه اداره چې سپایډر نومېږي هم شامل وو.

د داعش خراسان رسنیزه څانګه، العزایم مېډیا فاونډېشن، د خپلې خپرونې د خراسان غږ له لارې په ټرون، مونېرو او بټکوین کې د مرستو غوښتنه کړې ده.

شنونکي وایي چې دې ډلې د قانون پلي کوونکو د فشار د زغملو لپاره د خپلو مرستو راټولولو جوړښت په بېلابېلو غیر متمرکزو واحدونو باندې وېشلی دی.

د امریکا د خزانې وزارت چارواکي وایي چې دوی به د داعش خراسان مالي شبکې له منځه وړلو ته دوام ورکړي، که څه هم وسله‌ وال ښايي د ملاتړ د پټولو لپاره هر ډول وسایل وکاروي.