کابل -- د خامه پرېس د راپور له مخې، چارواکو وویل چې امنیتي ځواکونو اورپکي د فاریاب ولایت له غورماچ ولسوالۍ نه بېرته پسې واخیستل.
د غورماچ ولسوالۍ د امنیې قوماندانۍ یوه ویاند وویل، دغه امنیتي عملیات د افغانستان د ولسمشر د لومړي مرستیال جنرال عبدالرشید دوستم په مشرۍ ترسره شول، چې د ولسوالۍ د ادارې د ودانۍ، د ولسوالۍ د امنیې قوماندانۍ، او د غورماچ د بازار کنټرول یې له طالبانو څخه ترلاسه کړ.
هغه زیاته کړه چې دا عملیات د افغان هوایي ځواک له خوا هم حمایه کېدل.
په عین حال کې، پژواک خبري اژانس د اکتوبر په ۲۱مه راپور ورکړ چې افغان ولسمشر اشرف غني په یوه ۹ ماده ییز حکم کې چې د سولې د تړون د تطبیق لپاره یې صادر کړ امنیتي ځواکونو ته امر وکړ چې د افغانستان د اسلامي حزب د مورچلو، مرکزونو او بېسونو ویشتل دې بند کړي.
د ولسمشرۍ د فرمان په اساس، امنیتي ځواکونو ته لارښوونه شوې چې له اسلامي حزب سره د هغوی د بېسونو په هکله مشوره وکړي چې اوربند په مؤثره توګه نافذ کړي او د هرې بدې پېښې مخه ونیسي.
په فرمان کې راغلي، که د اسلامي حزب جنګیالي د بیا یوځای کېدنې په ترڅ کې د وسله والو مخالفانو تر حملو لاندې راشي، افغان امنیتي ځواکونه به په بشپړ ډول له هغوی سره مرسته وکړي.
فرمان زیاتوي، د افغان امنیتي ځواکونو رهبرۍ ته لارښوونه شوې چې د سولې د هوکړې د محتویاتو په تطبیق کې له بهرنیو ځواکونو سره بشپړه همغږي ولري.
افغان ولسمشر اشرف غني او د اسلامي حزب مشر ګلبدین حکمتیار تېره میاشت د سولې تاریخي هوکړه لاسلیک کړه.
