کابل -- پژواک خبري اژانس د یکشنبې په ورځ (د ډسمبر۱۸مه) راپور ورکړ چې په افغانستان کې د اورپکو بریدونو د اکتوبر په نسبت په نومبر میاشت کې ډېر کم تلفات اړولي دي.
پژواک خبري اژانس راپور ورکړ چې د نومبر په میاشت کې په ټول هېواد کې د اورپکو په ۱۲۷ بریدونو کې ۱۳۵۹ کسانو ته تلفات رسېدلي دي چې د بریدونو په شمېر کې ۳۴٪ او د تلفاتو په شمېر کې ۵۹٪ کمی راغلی دی.
د دفاع وزارت ویاند تورن جنرال دولت وزیري پژواک خبري اژانس ته وویل، د حکومتي ځواکونو له خوا بې وقفې فشار او سړې هوا د اورپکو د فعالیت مخې ته خنډونه جوړ کړي دي.
