کابل -- د ملي امنیت ریاست د دوشنبې په ورځ /د کب ۶ مه/ په یوه اعلامیه کې وویل، چې د ملي امنیت د ریاست ځانګړیو ځواکونو او افغان پولیسو په لوګر ولایت کې د حقاني شبکې پر ضد د ګډو عملیاتو په ترڅ کې تر اتو ټنو پورې چاودېدونکي مواد کشف کړل.
په اعلامیه کې راغلي چې دغه عملیات د ازرې ولسوالۍ په راغه سیمه کې ترسره شول، خو د وخت په هکله یې څه نه دي ویل شوي.
چارواکو وویل چې افغان ځواکونو د عملیاتو په ترڅ کې یو مشکوک کس ونیو.