د متحده ایالاتو د څار موسسه وایي د سولې له خبرو سره سره په افغانستان کې تاوتریخوالی زیات شوی دی

کابل -- د متحده ایالاتو د څار یوې موسسې د پنجشنبې په ورځ /د لړم ۱۵مه/ خبرداری ورکړ چې، که څه هم چې حکومت او طالبانو د وږي په میاشت کې د سولې بې سابقې خبرې پيل کړې، لاکن په افغانستان کې په وروستیو میاشتو کې له تاوتریخوالي څخه ډک بریدونه ۵۰٪ زیات شوي دي.

په وړي کې د دوو موقتو اوربندونو په ترڅ کې له لنډو وقفو سره سره، د هېواد په بېلابېلو برخو کې جنګ زیات شوی دی ځکه چې طالبانو د ولایتونو په مرکزونو او امنیتي تاسیساتو باندې ویجاړوونکي بریدونه پیل کړي او داسې وېرې شته چې ښایي دغه تاوتریخوالی مذاکرات ګډوډ کړي.

د افغانستان د بیارغونې لپاره د متحده ایالاتو ځانګړي لوی مفتش (سیګار) په یوه راپور کې وویل، د تلې په لومړۍ لسیزه کې په پای ته رسېدلې ربعه کې د مخکې ربعې په نسبت په افغان ځواکونو او ملکي خلکو باندې بریدونه ۵۰٪ زیات شوي ول.‌

په ۳ میاشتو کې د ۸۷۶ ملکیانو مړینې

د متحده ایالاتو کانګرس ته د سیګار درې میاشتنی راپور زیاتوي چې، «په عمومي توګه په دې ربعه کې د دښمن له خوا شوي بریدونه 'له موسمي نورمالو بریدونو څخه زیات» ول.

څارونکې موسسې په خپل راپور کې ویلي چې د چنګاښ او وږي تر منځ د ۸۷۶ مړینو په ګډون ۲۵۶۱ ملکي کسانو ته تلفات ور اوښتي دي. د تلفاتو شمېر د مخکینۍ ربعې په نسبت ۴۳٪ لوړ وو.‌

د وږي په ۲۲مه د خبرو له پيلېدلو راهیسې، د افغان حکومت د مرکچیانو او طالبانو تر منځ په کتنو کې لږ پرمختګ شوی دی،‌ او مذاکرات د خبرو د ابتدایي چوکاټ په سر د اختلافاتو او د اجندا د نشتوالي له امله وځنډېدل.

د افغانستان د روغې جوړې لپاره د متحده ایالاتو ځانګړي استازي زلمي خلیلزاد چې د کب په میاشت کې یې له طالبانو سره یوه جلا هوکړه وکړه، په مکرر ډول خبرداری ورکړی چې،«په لوړه کچه جاري تاوتریخوالی کولی شي چې د سولې پروسه او هوکړه او هغه اصلي پوهاوی وګواښي چې د افغانستان شخړه پوځي حل نه لري.»