په عکسونو کې:‌ د افغانستان ریښتنو اتلانو د کابل په نندارتون کې خپل مهارتونه نندارې ته وړاندې کړل

کابل -- په افغانستان کې د سرتېري د ورځې /د کب ۹مې/ د لمانځلو په مناسبت په کابل کې په دارالامان ماڼۍ کې د افغان ملي دفاعي او امنیتي ځواکونو په ملاتړ یو درې ورځنی نندارتون جوړ کړای شو.‌

د افغان ملي پولیسو، افغان ملي اردو او د ملي امنیت ریاست ځواکونو د کب له ۱۱مې څخه تر ۱۳مې پورې خپل تجهیزات او مهارتونه نندارې ته وړاندې کړل او عامو وګړو په وړیا توګه برخه اخیستی شوای.

د کورنیو چارو وزیر مسعود اندرابي د نندارې د پرانستې په ورځ وویل، د افغان ملي دفاعي او امنیتي ځواکونو لپاره دا مهمه ده چې خپلې وړتیاوې او دسپلین وښیي څو د افغانستان دښمنان پوه شي چې هغوی به بېرته تېر وخت ته ستانه نشي.

هغه وویل، «د سولې دروازې د هر چا او په ځانګړې توګه د طالبانو پر مخ پرانستې دي چې راشي او له موږ سره په سوله ییز ډول خبرې وکړي، خو که هغوی د سوله ییزو مذاکراتو لاره نه غوره کوي، بیا افغان ملي دفاعي او امنیتي ځواکونه دې ته چمتو دي چې له خپلې خاورې څخه دفاع وکړي.»

د نندارې په وروستۍ ورځ، اندرابي او د دفاع وزارت مرستیال شاه محمود میاخېل له خلکو نه د هغوی د ملاتړ له امله مننه وکړه.‌

میاخېل وویل، «د درې ورځو په ترڅ کې له ۱۰۰ زرو څخه ډېرو خلکو له نندارتون څخه لیدنه وکړه او ۱۷۵ زره سي سي [۱۷۵ لېټره] وینه یې ورکړه چې دا د خلکو او په ځانګړې توګه د افغان ملي دفاعي او امنیتي ځواکونو لپاره یوه غټه لاسته راوړنه ده.»

ریښتني اتلان

د ولسي جرګې د داخلي امنیت د کمېټې رییس خان اغا رضایي افغان ملي دفاعي او امنیتي ځواکونو ته په خطاب کې «د دې خاورې له هر انچ څخه د دفاع په خاطر د دې هېواد د ریښتنو اتلانو» په توګه د هغوی ستاینه وکړه.

هغه لومړی په ۱۳۹۲ کې له ایتلافي ځواکونو څخه افغان ملي دفاعي او امنیتي ځواکونو ته د امنیتي مسؤلیت لېږد ته په اشارې وویل، امنیتي ځواکونه «له ډېرو ازمېښتونو څخه تېر شوي» دي.‌

رضایي وویل، «دښمن هره ورځ داسې تبلیغات کول چې د انتقال په پروسې سره به ولایتونه سقوط وکړي.‌ ستاسو د سخت زیار او هوښیار مشرتابه له برکته له ټولو ستونزو سره سره تاسو اتلان په لومړۍ ازموینه کې بریالي شوئ.»

هغه زیاته کړه، «تاسو څو ځلې د ولسي جرګې او د ولسمشرۍ د ټاکنو امنیت په ښه توګه ټینګ کړ. د ولسواکۍ او عدالت واګي ستاسو په لاسونو کې دي.»

امین الله حاطمي چې له نندارتون څخه یې لیدنه کوله او له وسله والو ځواکونو سره یې عکسونه اخیستل، هغوی «زموږ د هېواد د داسې حقیقي اتلانو په توګه چې د ترهګرو پر ضد جنګ کوي ترڅو زموږ امنیت خوندي کړي او له هېواد څخه دفاع وکړي» په توګه یاد کړل.‌

یوې بلې کتونکې لیلا رحیمي وویل، «دا یو ډېر ښه نندارتون وو.‌ په هغو وسایلو سره چې زموږ اردو یې لري، هغوی له خپلو خلکو او هېواد څخه د دفاع په لاره کې یوه غټه وظیفه ترسره کړې ده.»

رحیمي وویل هغې له افغانستان څخه د دفاع په لاره کې ټپي شویو سره د مرستې لپاره ۵۰۰ سي سي (نیم لېټر) وینه ورکړه. لیلا وویل، «دا یو ډېر کوچنی کار وو چې ما وکړ څو د هغوی پر وړاندې خپل درناوی وړاندې کړم.»