یو ژوندی پاتې کس په دایکندي کې د داعش خراسان د وحشتناک برید کیسه کوي

کابل -- په دایکندي کې د داعش خراسان څانګې له وروستي برید څخه یوه ژوندي پاتې شوي کس د پیښې په اړه خپله دردونکې کیسه شریکه کړه.

۲۴ کلن مختار، چې د دایکندي په ولایتي روغتون کې بستر دی او څو مرمۍ لګېدلی دی، یو له هغو مسافرو څخه و چې په یوه مني بس موټر کې یې سفر کاوه او د وږي په ۲۲مه د وسله والو په یوه کمین باندې ور برابر شول.

د داعش خراسان څانګې د برید مسؤلیت منلی دی.

مختار څرګنده کړه چې څنګه څلورو موټرسایکل سپرو وسله والو د دوی موټر ودراوه او ټولو ته یې له بس څخه د ښکته کېدلو امر وکړ.

هغه سلام ټایمز ته وویل، «کله چې هغوی موږ له بس څخه ښکته کړو راته یې وویل چې د عکس اخیستلو لپاره په کتار ودرېږو. له ډاره موږ په کتار کې ودرېدو. يوه یې زموږ عکسونه او فلمونه اخیستل، نورو درې کسانو په کلاشينکوفونو او لاسي بمونو پر موږ ډزې وکړې.»

هغه وویل، «هغوی ټول کسان په سر او سینه وویشتل، او د ډزو غږونه تر ډېره روان ول،»

هغه وویل، «موږ ټول پر ځمکه ولوېدلو. ما ولیدل چې د ځینو کسانو ماغزه راوتلي وو او د نورو ډېری وینې بهېدې. ما داسې حس کړه چې څو ګولۍ زما په پښه او اوږه ولګېدې او زه هم پر ځمکه ولوېدم.»

مختار وویل، «د داعش بریدګرو د ډزو پر وخت خندل او ویل به یې چې هغوی کافران وژني. کله چې هغوی ولیدل چې ټول په ډزو لګېدلي او په ځمکه لوېدلي، ګومان یې وکړ چې موږ ټول مړه شوي یو، بیا په خپلو موټرسایکلونو سپاره شول او لاړل.»

هغه وويل، «ما غږ وکړ، خو هيچا ځواب رانه کړ. له ماسره نږدې یواځې يوه ځوان خپل لاس ښوراوه. له موږ ټولو څخه وینې روانې وې، او هیچا هم حرکت نشوای کړای. وروسته، د سیمې یو موټر راورسېد او موږ یې روغتون ته وېوړو.»

د داعش خراسان څانګې برید په روان کال کې په ملکي وګړو باندې تر ټولو ډېر خونړی برید و. په بريد کې لږ تر لږه ۱۴ کسان ځای پر ځای وژل شوي او شپږ نور ټپيان دي. ځايي اوسېدونکو ويلي، چې يو تن وروسته له هغه مړ شو، چې ورسره د مړو شمېر ۱۵ ته ورسېد.

د خلکو قهر

د خونړي برید ویډیوګانې او عکسونه په ټولنیزو رسنیو او خبرونو کې خپاره شوي چې د ځایي اوسیدونکو پراخه وېره او غوسه یې راپارولې ده.

د دایکنډي اوسېدونکی حسین عليزاده چې ۳۲ کاله عمر لري،‌ وايي، د قربانیانو د انځورونو له لیدلو وروسته ډارونکي خوبونه ویني، وېرېږي او سخت پرېشان دی.

هغه سلام ټایمز ته وویل، «هر کله چې د قربانیانو د جسدونو انځور ذهن ته راځي، زه خپل حسي ثبات له لاسه ورکوم. رواني فشار دومره شدید دی چې خوړو ته مې هم زړه نه کیږي،»

هغه وویل، «د بې ګناه او بې وزلو خلکو په ډله ایزو وژلو سره، د داعش خراسان څانګې یو ځل بیا خپل ظلم او جبر وښوده. دا ترهګره ډله د ټولو اسلامي او انساني ارزښتونو دښمنه ده.»

علیزاده وویل، د حکومتي چارواکو د ادعاوو پر خلاف، د داعش خراسان څانګې له خوا ګواښ د پام وړ وده کړې، او د ملکي وګړو ژوند په ځانګړې توګه د هزاره ګانو ژوند له جدي خطر سره مخامخ دی.

د دایکندي یوه بل اوسېدونکي محمد رضا صفدري چې ۲۶ کاله عمر لري، وویل، د داعش خراسان څانګې یو ځل بیا خپل وحشت او بربریت افغانستان او نړۍ ته په ډاګه کړ.

هغه وویل، «د بې‌ګناه خلکو وژل، چې ټول بې‌وزله بزګران وو، د وحشت او وحشت اوج دی. د افغانستان په مرکزي سیمو کې د داعش شتون، چیرته چې زیاتره وګړي هزاره او شیعه دي، په ژوره توګه اندېښمنونکی او وېرونکی دی.»

صفدري وویل، «خلک د هېواد په یوه ګوټ کې هم خوندي نه دي.»