کابل -- د القاعدې سره تړلو مشرانو په نښه کولو لپاره د متحده ایالاتو وروستي بریدونه د لوړې کچې دقت ښیې، او پرته له دې چې نورو ته تاوان ورسوي، په مستقیم برید کې هدف له منځه وړي.
امریکایي ځواکونو د کب په ۵مه د سوریې په ادلیب ولایت کې د حراس الدین لوړ پوړی پوځي مشر محمد یوسف ضیاء تلای (مشهور په جعفر الترکي) له تعقیبولو څخه وروسته وواژه.
د متحده ایالاتو د پوځ له خوا خپره شوې یوه ۱۳ ثانیه یي ویډیو ښيي چې تلای د برید پر مهال په یوه کلیواله سیمه کې په یوه خالي سړک موټر چلاوه.
وېډیوي فلم او وروسته هغه عکسونه چې د سوریې د ملکي دفاع غړو د صحنې د معاینه کولو پر وخت اخیستي، ښیي چې د موټر چلوونکي چوکۍ په دقت سره په نښه شوې وه، او د موټر پاتې برخه تقریبا روغه پاتې ده.
د حراسالدین لوړپوړی نظامي مشر، محمد یوسف ضیا طلایی، چې د کب په ۵مه د امریکا په هوایي برید کې د سوریې د ادلب په ولایت کې ووژل شو، په دې انځور کې لیدل کیږي، چې په ټولنیز شبکه ایکس کې خپور شوی دی.
رسنیزو سرچینو وویل چې تلای په پټه هڅه کوله د حراس الدین له منحل کېدلو څخه وروسته یوه جلا ډله جوړه کړي.
دوه ورځې وړاندې، امریکایي ځواکونو په ورته سیمه کې د القاعدې سره تړلې حراس الدین یو بل لوړ پوړی مشر وسیم تحسین بیرقدار په یوه «دقیق هوايي برید» کې له منځه یوړ.
د متحده ایالاتو د مرکزي قوماندانۍ (سېنټکام) مشر جنرال مایکل ايرېک کوریلا وویل، «موږ به د خپل هیواد او په سیمه کې د متحدو ایالاتو، متحدینو او شریکانو د دفاع لپاره د دغو ترهګرو جدي تعقیب ته دوام ورکړو،»
د سیمه ییزو امنیتي کارپوهانو په وینا، دا عملیات د القاعدې د ملګرو د نیولو لپاره د یوه پراخ کمپاین برخه ده چېرې چې دوی هڅه کوي په افغانستان او پاکستان کې د خپلو دودیزو اډو هاخوا پښې ټینګې کړي.
هدفمند بریدونه
په تاشکند کې مېشت افغان پوځي شنونکی محمد موسی هدفمند یادونه وکړه چې «متحده ایالات د هدفي بریدونو ترسره کولو لپاره پرمختللې ټیکنالوجي رامنځته کړې، او د ترهګرو مشران یې ملکي وګړو ته د حد اقل زیان رسولو پرته له منځه وړي دي.»
هغه سلام ټایمز ته وویل، «دا بریدونه معمولا د لږې ګڼه ګوڼې ساعتونو په جریان کې یا په غیر استوګنو سیمو کې ترسره کیږي، او یادونه یې وکړه چې دا د هوایي بریدونو او استخباراتي مالوماتو د شراکت له برکته دي.
هغه وویل، «د داسې دقیقو بریدونو بریالیتوب د متحده ایالاتو د ترهګرۍ ضد وړتیاوو ارتقا ښیي،»
په جرمني کې مېشت د ترهګرۍ ضد شنونکی غلام رسول توحیدي وویل، «دغو بریدونو نه یواځې د دې ډلو عملیاتي وړتیاوې کمې کړي، بلکې د هغوی د مشرتابه او همغږۍ شبکې یې هم ګډې وډې کړې دي،»
هغه سلام ټایمز ته وویل، «د تلای له منځه وړل د القاعدې او د هغې پورې تړلو څانګو د کمزوري کولو په لور یو مهم ګام دی،»
توحیدي وویل، د هغه مړینه «په سوریه کې د القاعدې عملیاتو ته یو جدي ګوزار دی، ځکه چې حراس الدین د دې ډلې یو له مهمو سیمه ایزو مټونو څخه و،» او یادونه یې وکړه چې متحده ایالاتو «له ترهګرۍ سره د مبارزې لپاره خپله ژمنتیا ښودلې ده.»
دا د ټولنې د تفریح لپاره ډېر ښه دی.
ځواب ورکړئ4 تبصره
هو
ځواب ورکړئ4 تبصره
عالیه
ځواب ورکړئ4 تبصره
ډېر ښه
ځواب ورکړئ4 تبصره