متحده ایالات د القاعدې د نړیوال ګواښ پر وړاندې د مقابلې لپاره تر ۱۰ میلیونو ډالرو پورې جایزې ورکوي

متحده ایالات د القاعدې د عربي ټاپووزمې څانګې د مهمو مشرانو او د هغوی د مالي شبکو په اړه د مالوماتو د شریکولو په بدل کې تر ۱۰ میلیونو ډالرو پورې انعامونه وړاندې کوي، په داسې حال کې چې دا ډله له یمن څخه د پام وړ نړۍ وال امنیتي ګواښ رامنځته کوي.

د متحده ایالاتو د بهرنیو چارو وزارت د عدالت لپاره انعامونه پروګرام (آر اېف جي) د القاعدې د عربي ټاپووزمې څانګې د مشر سعد بن عاطف العولقي (چې د سعد محمد عاطف په نامه هم یادیږي) په اړه د مالوماتو شریکولو په بدل کې تر ۶ ملیونو ډالرو پورې انعام وړاندیز کوي.

د القاعدې د عربي ټاپووزمې څانګې د بنسټګر غړي ابراهیم البنا (چې د ابو ایمن المصري په نامه هم یاديږي) په اړه د مالوماتو لپاره تر ۵ ملیونو ډالرو پورې وړاندیز کیږي، او د ابراهیم احمد محمود القوصي (چې د شیخ خبیب السوداني محمد صلاح احمد په نامه هم یادیږي) لپاره تر ۴ ملیونو ډالرو پورې وړاندیز کیږي.

د عدالت لپاره انعامونه پروګرام (آر اېف جي) به د داسې مالوماتو د شریکولو په بدل کې چې د عباس حمدان او ثبیت بن حارث تر کنټرول لاندې مالي شبکو د ګډوډولو لامل شي، تر ۱۰ میلیونو ډالرو پورې انعام ورکړي.

د القاعدې د عربي ټاپووزمې څانګه چې په ۱۳۸۸ لمریز کې د القاعدې د سعودي او یمني څانګو له یوځای کېدلو څخه رامنځته شوه، د یادې شبکې له خطرناکو ډلو څخه ګڼل کیږي.

دې څانګې، د ۱۳۸۸ د هغه «نېکر بمي بریدګر» چې هڅه یې کوله د متحده ایالاتو د یوه هوایي شرکت الوتکې ته چاودنه ورکړي، او د ۱۳۸۹ یوې هڅې چې غوښتل یې د کمپیوټر په پرنټرونو کې پټو اېښودل شویو چاودېدونکو توکو له لارې د کارګو الوتکو کې چاودنې وکړي، په څېر غټو دسیسو تر شا لاس درلود.

او هغه په منظم ډول ښیي چې هغه د خپلې سیمه ایزې اډې اخوا د بریدونو ترسره کولو نیت او وړتیا هم لري.

شنونکي خبرداری ورکوي چې دا ډله له ناکامۍ سره سره، له سیمه ییزې حکومتولۍ او بې ثباتۍ څخه ګټه پورته کوي او د یمن له اډې څخه د خپلو پلانونو تطبیقولو ته دوام ورکوي.

د سیاسي چارو شنونکي فیصل احمد، د ایران رژیم له خوا په خپله خاوره کې د القاعدې مشرانو ته د پناه ورکولو راپورونو ته په اشارې سره، وویل،د القاعدې د مشرانو د ملاتړي په توګه د ایران ښکېلتیا ته په پام سره، اوسنی ګواښ په ځانګړې توګه د اندیښنې وړ دی.

په داسې حال کې چې د متحده ایالاتو هڅې د القاعدې د عربي ټاپووزمې څانګې په کمزوري کولو کې بریالۍ شوې، وروستي استخباراتي مالومات ښیي چې دا ډله فعاله پاتې ده، په نړۍ واله کچه د بریدونو لارښوونه کوي او هڅوي.

د القاعدې د عربي ټاپووزمې څانګې د لړم په میاشت کې په یوه اعلامیه کې چې د خپلو رسنیزو چینلونو له لارې یې خپور کړ، د سیمې د بې ثباته کولو لپاره خپلې روانې هڅې وښودلې او د نويو غړو د استخدام لپاره یې د مذهبي حساسیتونو په کارولو باندې خپل دوامدار تمرکز څرګند کړ.

هر اړخیزه ستراتیژي

د آر اېف جی وروستۍ هڅونې د ترهګرۍ پر وړاندې د مبارزې په برخه کې د لسیزو د ثابتو پایلو پر بنسټ ولاړې دي.

دغه پروګرام له ۱۳۶۳ لمریز کال راهیسې، له ۲۵۰ ملیون ډالرو څخه زیاتې پیسې هغو ۱۲۵ کسانو ته وېشلي چې مالوماتو یې د بریدونو په مخنیوي یا د ترهګرو شبکو په له منځه وړلو کې مرسته کړې ده.

د پام وړ بریالیتوبونو کې هغه ۲ ملیون ډالري انعام هم شامل دی چې په ۱۳۷۲ کال د نړۍ وال سوداګریز مرکز د بمي برید متفکر مغز رمزي یوسف د نیولو لامل وګرځېد.

د القاعدې د عربي ټاپووزمې څانګې د مالي شبکو په اړه د مالوماتو ورکولو په بدل کې فعال انعامونه د متحده ایالاتو ستراتیژي روښانه کوي چې د ترهګریز سازمان پر وړاندې د مبارزې لپاره د مشرتابه او تمویل سرچینې دواړه په نښه کوي.

د بهرنیو چارو وزارت خلک، په ځانګړې توګه هغه کسان چې په هغو سیمو کې چې د القاعدې د عربي ټاپووزمې څانګېه فعالیت کوي، هڅوي چې د آر اېف جی د خوندي چینلونو له لارې مالومات وسپاري.

لارښوونې کېدی شي چې په بې نومه بڼه د رسمي وېب سایټ (www.rewardsforjustice.net)، +1-202-297-8695 نمبر سېګنال، ټیلیګرام، وټس آپ یا د Tor (چې Tor براوزر ته اړتیا ده) له لارې په (he5dybnt7sr6cm32xt77pazmtm65flqy6irivtflruqfc5ep7eiodiad.onion) ادرسوسپارل شي.