په کابل کې د مزاري په مراسمو د داعش برید په لسګونو کسان ووژل

کابل -- چارواکو وویل، لږ تر لږه ۲۷ کسان په یوه برید کې چې د جمعې په ورځ /د کب ۱۶مه/ په کابل کې په یوه میداني کې په روانو مراسمو باندې وشو، ووژل شول.‌ دا له طالبانو سره د متحده ایالاتو له خوا د یوې هوکړې له لاسلیکولو څخه وروسته په افغانستان کې تر ټولو خونړی برید دی .‌

بي بي سي وویل، د داعش اورپکو چې د برید مسؤلیت یې پر غاړه اخیستی دی، له مراسمو سره نژدې یوې ودانۍ څخه چې تر رغونې لاندې وه، ډزې پیل کړې.

د کورنیو چارو د وزارت ویاند نصرت رحیمي وویل، په مړو کې ښځې او ماشومان شامل دي او ۲۹ نور کسان ټپي شوي دي.‌

د روغتیا وزارت یوه چارواکي نظام الدین جلیل د ژوبلو کسانو شمېر یو څه زیات یاد کړ او ویې ویل چې ۲۹ کسان وژل شوي او ۳۰ نور ټپیان دي.‌

هغه وویل، «شمېر به تغیر وکړي.»

د برید کوونکیو شمېر معلوم نه دی خو رحیمي وویل چې لږ تر لږه «درې ترهګر» ووژل شول او عسکرو سیمه له شپږ ساعته ډزو څخه وروسته پاکه کړې ده.

طالبانو سمدلاسه په برید کې، چې د فقید عبدالعلي مزاري د یادونې په کلنیو مراسمو باندې وشو، لاس لرل رد کړل. نوموړی، د هزاره قوم چې اکثر یې شیعه ګان دي، یو سیاست وال وو.

طالبانو مزاري په ۱۳۷۴ کال کې وتښتاوه او بیا یې وواژه.‌

داعش تېر کال هم په دې ته ورته مراسمو باندې د برید ترسره کولو ادعا کړې وه. هغه وخت د هاوان د ګولیو په ورولو کې لږ تر لږه ۱۱ کسان وژل شوي ول.

دغه پېښه د ښار په داسې سیمه کې وشوه چې اکثر اوسېدونکي یې شیعه ګان دي.

په ټولنیزو رسنیو خپرو شویو عکسونو کې کارکوونکي لیدل کیږي چې وروسته ګڼ جسدونه ټولوي.

ولسمشر اشرف غني دغه ډله ییزه وژنه وغندله او «د بشریت پر ضد جنایت» یې وبلله.‌

په یادو مراسمو کې د اجرایه رییس عبدالله عبدالله په ګډون ډېرو سیاسي مشرانو برخه اخیستې وه.‌

د کورنیو چارو وزارت له خبریالانو سره په خبرو کې تایید کړه چې، «ټول جګپوړي چارواکي په خوندي توګه وتلي دي.»

هزاره مشر محمد محقق طلوع نیوز ته وویل،‌ «د ټوپک له ډزو څخه وروسته موږ له مراسمو څخه ووتلو او یو شمېر خلک ټپیان شول.»

دوامدار تاوتریخوالی

دغه برید، د کب په ۱۰مه د واشنګټن او طالبانو تر منځ د یوې لاسلیک شوې هوکړې په اساس د ټولو بهرنيو ځواکونو له پلان شویو وتلو څخه ۱۴ میاشتې مخکې د افغانستان په پلازمېنه کې چې کلک امنیتي ګامونه په کې اخستل شوی دي امنیت ته اړتیا په ګوته کوي.

د متحده ایالاتو وتل تر ډېره په طالبانو باندې متکي دی چې کولی شي د داعش په څېر ترهګرې ډلې مهار کړي.‌

که داسې ګروپونه پاتې وي، د امریکا عسکر به هم پاتې شي.‌

د هوکړې له لاسلیکېدلو راهیسې، په افغانستان کې جنګ روان دی، او په دې توګه یې هغه هیلې مړاوې کړي چې د هوکړې په نتیجه کې به تاوتریخوالی کم او د طالبانو او افغان حکومت تر منځ خبرو ته لاره هواره شي.

داعش، چې د افراطي سني تعبیر وړاندې کوي، په لومړي ځل په ۱۳۹۴ کې په افغانستان کې سر راپورته کړ او څو کاله یې په ننګرهار کې سیمې تر واک لاندې وه.‌

هغوی په کابل کې د شیعه ټولنې د په نښه کولو په ګډون، د یو لړ وحشیانه بمي بریدونو د ترسره کولو مسؤلیت پر غاړه اخیستی دی.

په وروستیو میاشتو کې یادې ډلې د امریکایي او افغان ځواکونو له خوا د بریدونو په نتیجه کې سختې ماتې وخوړې او تر څنګ یې د طالبانو بریدونو د هغوی جنګیالي په نښه کړل.

داعش اوس هم په افغانستان کې په ځانګړې توګه د پاکستان پولې سره نژدې په کونړ ولایت کې موجود دی، چې هم له ننګرهار او هم له کابل سره په ګاونډ کې پروت دی.