![دا عکس چې د وږي په ۴مه اخیستل شوی د بلخ ولایت په بلخ ولسوالۍ کې د طالبانو په یوه برید کې یو ویجاړ شوی کور ښیي. [۲۰۹ شاهین قول اردو]](/cnmi_st/images/2020/08/25/25705-balkh-739_416.webp)
مزارشریف -- یوه ځانمرګي برید چې مسؤلیت یې طالبانو په غاړه اخیستی دی د سې شنبې په ورځ /د وږي ۴مه/ په بلخ ولایت کې لږ تر لږه درې کسان ووژل. دا په داسې حال کې ده چې ګاونډي پاکستان فشار اچولی دی چې ځنډېدلې د سولې خبرې پیل شي.
په مزارشریف کې د افغان ملي اردو د ۲۰۹ شاهین قول اردو ویاند محمد حنیف رضایي وویل، ځانمرګي بمي بریدګر چاودېدونکي مواد د بلخ ولایت په بلخ ولسوالۍ کې د افغان اردو له یوه مرکز سره نږدې په یوه لارۍ موټر کې وچول.
د طالبانو ویاند ذبیح الله مجاهد په ټوېټر وویل، دا برید د هغې ویډیو انتقام دی چې په انټرنټ خپره شوې وه او ښودله یې چې افغان ځواکونه په جنوب کې د طالب عسکرو د جسدونو بې حرمتي کوي.
د دفاع وزارت د هغې ویډیو چې د تېرې میاشتې په نیمایي کې راووتله، پلټنه پیل کړې ده.
رضایي وویل، د وږي د ۴مې برید دوه ملکيان او یو کمانډو ووژل او له ۴۰ څخه ډېر نور کسان یې ټپیان کړل. هغه وویل، ډېر کورونه وران یا ویجاړ شول او عسکرو په خوندي توګه د قربانیانو ژغورلو ته ور ودانګل.
د دفاع وزارت د یادې پېښې پېښېدل تایید کړل.
دا برید په داسې حال کې کیږي چې د پاکستان حکومت له مهمو طالب مرکچیانو سره په اسلام اباد کې ګوري چې په افغانستان کې د سولې د خبرو پیلولو ته یې وهڅوي.
پاکستان ویلي دي چې مذاکرات په افغانستان کې د پرمختګ یواځینۍ لاره ده او هغوی د یوه «تسهیلوونکي» رول ترسره کوي.
طالبانو او د افغانستان حکومت داسې اشارې ورکړې وې چې هغوی چمتو دي چې د تېرې میاشتې په نیمایي کې له اختر څخه وروسته په سملاسي توګه خبرې پیل کړي، خو دغه بهیر د بندیانو د تبادلې په سر په ټپه ولاړ پاتې دی.
د امریکا په څېر یوه ستر نړۍ وال ځواک ته دا د شرم خبره ده چې د ترهګرو د یوه غټ ملاتړي هېواد (پاکستان) ستاینه کوي او فکر کوي چې دغه ترهګر هیواد هڅه کوي چې په افغانستان کې سوله راشي. امریکا باید د پاکستان له خوا د حمایه کیدونکو طالبانو په لاس د لسګونو زره افغان پوځیانو او د سلګونو امریکایي او ناټو پوځیانو د وژلو پوښتنه د پاکستان له ترورست پوځ نه وکړي. امریکا باید ځان دومره ټیټ نه کړي او پاکستان ته دومره وخت ورنه کړي چې نور د افغانستان او امریکا په عظمت باندې لوبې وکړي.
ځواب ورکړئ2 تبصره
د طالبانو د جنګ قربانیان همېشه غریب ملکي خلک دي. په دې برید کې هم اکثر ملکي خلک ووژل شول او ټپیان شول، او د ملکي خلکو ډېر کورونه ویجاړ شول. د افغانستان د خلکو اقتصاد ډېر کمزوری دی، او په هره چاودنه او جنګ کې زیانونه دغو غریبو خلکو ته رسیږي. ټول پوځي بېسونه او مرکزونه باید د خلکو له کورونو څخه لیرې ځایونو ته ولېږدول شي چې د بریدونو او چاودنو په ترڅ کې ملکي خلک ژوبل نشي.
ځواب ورکړئ2 تبصره