د داعش خراسان څانګې په مزارشریف کې په مني بسونو باندې د مرګونو بمي بریدونو مسؤلیت پر غاړه واخیست

کابل -- د داعش خراسان څانګې د هغو دوو بمي چاودنو مسؤلیت پر غاړه واخیست چې د پنجشنبې په ورځ /د غوایي ۸مه/ یې په مزار شریف کې لږ تر لږه ۹ کسان ووژل. دا چاودنې په عین ښار کې د شیعه ګانو په یوه جومات باندې له یوې مرګونې چاودنې څخه یوه اونۍ وروسته وشوې.

د خونړیو بمي بریدونو یوې لړۍ چې اقلیت ګروپونه په نښه کوي په تېرو دوو اونیو کې هېواد ته سخت ټکانونه ورکړي دي.

د بلخ ولایت د امنیه قوماندانۍ ویاند آصف وزیري ای اېف پي ته وویل، د پنجشنبې ورځې چاودنې د څو دقیقو په زماني واټن کې د مزارشریف په بېلابېلو ناحیو کې په داسې حال کې وشوې چې خلک د روزه ماتي لپاره کورونو ته روان ول.‌

هغه وویل، «داسې ښکاري چې په نښه شوي کسان شیعه مسافران ول،» او زیاته یې کړه چې په چاودنو کې ۱۳ کسان ټپیان شول.

د بمي چاودنو مسؤلیت د داعش خراسان څانګې پر غاړه واخیستاو ویې ویل چې ۳۰ کسانو ته یې تلفات ور اړولي دي.‌

په ټولنیزو رسنیو خپرو شویو عکسونو کې ښکاري چې په یوه مني بس باندې د اور لمبې ورتاوې دي په داسې حال کې چې بل یې ټوټه ټوټه شوی وو.

د فرقه ییزو بمي بریدونو یوه لړۍ

دغه چاودنې یوه اونۍ وروسته له هغه وشوې چې یوه برید په مزارشریف کې د شیعه ګانو په یوه جومات باندې شوي برید کې لږ تر لږه ۱۲عبادت کوونکي ووژل او په لسګونو نور یې ټپیان کړل.

له هغې چاودنې څخه یوه ورځ وروسته په کندوز کې یو بل بمي برید وشو چې اقلیت صوفي وګړي یې په نښه کړل.

په هغه برید کې چې د جمعې د لمانځه پر وخت وشو لږ تر لږه ۳۶ کسان ووژل شول.

په کابل کې یوه بل برید هم شیعه ګان په نښه کړل چې په کې دوه بمونه په یوه ښوونځي کې وچول شول او ۶ تنه زده کوونکي یې ووژل.

په مزارشریف کې په جومات باندې د برید مسؤلیت داعش پر غاړه واخیستو خو تر اوسه هېڅ ډلې هم په کندوز یا د کابل په ښوونځي کې د بمي بریدونو پړه نه ده منلې.

د داعش خراسان څانګې په اکثریت سني افغانستان کې په مکرر ډول شیعه ګان او د صوفیانو په څېر اقلیتونه چې د اسلام یوه روحاني بڼه تعقیبوي، په نښه کړي دي.

شیعه افغانان چې تر ډېره هزاره ګان دي، د افغانستان د ۳۸ میلیونو وګړو له ۱۰ څخه تر ۲۰٪ پورې جوړوي.

افغان مقاماتو د پنجشنبې په ورځ وختي ای اېف پي ته وویل چې د وروستیو بریدونو په تړاو یې څو کسان نیولی دي.