ډبلیو اېف پي د کندهار ۱۵۰۰ اوسېدونکیو ته دندې او له نشه ییزو توکو څخه د ازاد ژوند فرصتونه برابروي

کندهار -- د خوړو نړۍ وال پروګرام (ډبلیو اېف پي) په کندهار ولایت کې د نشه ییزو توکو د ۱۰۰۰ معتادانو په ګډون د ۱۵۰۰ کسانو لپاره کاري فرصتونه رامنځته کړي دي.

په دې پروژه کې، برخه وال د کندهار ولایت په ارغنداب ولسوالۍ کې یو استنادي دېوال جوړوي څو اوسېدونکي او زراعتي ځمکې له سېلاوونو څخه خوندي کړي.

دا پروژه د تېرې تلې په میاشت کې پیل شوې او تمه ده چې د را روان غبرګولي تر میاشتې پورې دوام ومومي.

د دې پروژې مدیر سلطان احمد وفا وویل، دا پروژه د بشري مرستو د همغږۍ موسسې (سي اېچ ای) له خوا چې یوه افغاني غیرحکومتي موسسه ده، پلې کېږي، او هدف یې دا دی چې معتادانو ته له نشو څخه لرې یو فرصت په لاس ورکړي او بې وزلې کورنۍ له لوږې څخه وژغوري.

هغه وویل، «سېلابونه او د سیند اوبه هر کال په ارغنداب ولسوالۍ کې د سیند په اوږدو کې په سلګونو د استوګنې کورونه او په زرګونو هکتاره ځمکې تخریبوي. استنادي دېوال به د سیند اوبه او سېلابونه مهار کړي.»

هغه زیاته کړه، «په پروژه کې هر کارګر ته د میاشتې ۸۵۰۰ افغانۍ (۹۵ ډالر) ورکول کیږي. د دې پروژې موده اته میاشتې ده، خو کېدی شي چې اوږده شي.»

وفا وویل، پخواني معتادان چې له نشه ییزو توکو څخه ژغورل شوي او په دې پروژه باندې کار کوي، عادي ژوند ته راګرځېدلي دي.

ارغنداب ولسوالي له کندهار ښار سره نږدې پرته ده، او د سرکونو او پلونو په ګډون اکثره بېخبناوې یې د جګړې د کالونو په ترڅ کې ویجاړې شوي دي.

له معتادانو سره د نشه ییزو توکو په پرېښودلو کې مرسته کول

شاه محمد چې ۲۷ کاله عمر لري او د دوه ماشومانو پلار دی، له اوو کالونو راهیسې په نشه ییزو توکو روږدی دی. هغه په ایران کې چې د کار لپاره هلته تللی و، د نشه ییزو توکو استعمال پيل کړ.

محمد وویل، له ایران څخه له را اېستل کېدلو وروسته د بې کارۍ له امله هغه ونه توانېد چې ځان له اعتیاد څخه وژغوري، خو څلور میاشتې مخکې د ډبلیو اېف پي په پروژه کې له کار پیلولو څخه وروسته یې نشه ییز توکي پرېښودل.

هغه وویل، «زه ډېر خوښ یم چې کولی شم هم کار وکړم او هم نشه ییز توکي پرېږدم. په کندهار کې اکثر هغه ځوانان چې له بې کارۍ او په نشه ییزو توکو اعتیاد څخه کړېدل، په دې پروژه کې کار کوي او عادي ژوند ته راګرځېدلي دي.»

هغه وویل، «پخوا زه مجبور وم چې غلا وکړم او د نشه ییزو توکو د پیدا کولو لپاره پیسې پيدا کړم. تر دې چې ما به له خپل کور څخه هم شیان غلا کول او په لږ قیمت به مې خرڅول، خو له هغه وخت نه چې ما کار پیل کړی او د خپلې کورنۍ لپاره پیسې ګټم اوس څو میاشتې کېږي چې نشه ییز توکي مې نه دي استعمال کړي.»

محمد عمر چې ۶۵ کاله عمر لري هم په ارغنداب ولسوالۍ کې د ډبلیو اېف پي په پروژه کې کار کوي.

هغه له ۱۰ کالونو ډېر وخت نشه ییز توکي کارول، خو اوس، چې په دې پروژه کې کار کوي، د نشه ییزو توکو استعمال یې پرېښی دی.

عمر وویل له هغه وخت راهیسې چې هغه کار پیل کړی او د هغه اوه کسیزه کورنۍ له فقر او د نورو له احتیاج څخه خلاصه شوې ده، په ژوند کې یې ننګونې کمې شوي دي.

هغه وویل، «د رواني فشار او بې کارۍ له امله زه مجبور وم چې نشه ییز توکي وکاروم، خو اوس چې زه په کار کولو باندې بوخت یم، په تېرو څلورو میاشتو کې مې حتی یو ځل هم نشه ییز توکي لیدلي نه دي.»

هغه وویل، «په دې پروژه کې د کار کولو یو شرط دا و چې نشه ییز توکي باید پرېښودل شي، چې دغه شرط له ما سره د تل لپاره د نشې په پرېښودلو کې مرسته وکړه.»

عمر زیاته کړه،‌ «د نشه ییزو توکو پرېښودل زما د ماشومانو راتلونکی روښانوي. که ما د نشه ییزو توکو کارولو ته دوام ورکړی وای، زما ماشومان به زما په څېر په نشو اخته شوي ول.»

له تصور نه وتلي فقر څخه وژغورل شو

د ارغنداب ولسوالۍ اوسېدونکي وایي چې د ډبلیو اېف پي د پروژې په پیلېدلو سره د هغوی په ولسوالۍ کې د فقر کچه کمه شوې ده.

په یاده ولسوالۍ کې د فیصل په نامه یوه ۴۶ کلن بزګر وویل، په باراني موسم کې سېلابونو د هغه زراعتي ځمکه چې له سیند سره نږدې پرته ده، خرابوله.

فیصل هم په دې پروژه کې کار کوي او ویې ویل چې هغه خوښ دی چې د استنادي دېوال په بشپړېدلو سره به د هغه پټي له سېلابونو څخه خوندي شي.

هغه وویل، «دا پروژه زموږ لپاره ډېره ګټوره ده ځکه چې موږ په کې له کار کولو څخه پیسې ترلاسه کوو او ورسره زموږ زراعتي ځمکې هم له سېلاب څخه ساتل کیږي.»

هغه وویل، «سږ کال ما د وچکالۍ له امله ډېر لږ فصل واخیست. که دا پروژه نه وای، زه نه پوهېږم چې ما به خپل ژوند څنګه سمبالاوه. زه ډېر خوښ یم چې میاشتنی عاید ترلاسه کوم او زموږ ولسوالي انکشاف کوي.»

فیصل وویل، که د ډبلیو اېف پي مرسته نه وای، ځایي اوسېدونکو دا وس نه درلود چې استنادي دېوال او عامه اسانتیاوې جوړ کړي او فقر له منځه وېسي.

د محمد عیسی په نامه یوه ۶۳ کلن قومي مشر وویل، د تېر کال په اوږدو کې په دې ولسوالۍ کې بې وزلي او بې کاري ډېر شوي، چې ډېر اوسېدونکي یې په نړۍ واله مرسته باندې تکیه کولو ته اړ کړي دي.

هغه وویل، «د استنادي دېوال پروژې ډېرې کورنۍ له بې وزلۍ څخه ژغورلي دي. په روانو حالاتو کې،‌ چې بې وزلي او اقتصادي ستونزې خپل اوج ته رسېدلي، دغه ډول پروژې ډېرې ګټورې دي.»

هغه وویل، «په دې پروژې سربېره، ځینې غیرحکومتي موسسې او مرستندویې ادارې په ارغنداب ولسوالۍ کې په سلګونو غریبو کورنیو ته مرستې برابروي.»

عیسی وویل، «که دغه ډول مرسته نه وای، ډېر خلک به له لوږې مړه شوي وای. فقر له تصور څخه وتلي حد ته رسېدلی دی.»