له ښوونځیو څخه ایسارو شویو افغان نجونو آنلاین زده کړو ته مخه کړې ده

| 07-09-2023

زه غواړم زده کړه وکړم او خپل هېواد ته پرمختګ ورکړم.

| 02-12-2023

څومره ژر چې کېږي افغان نجونو ته دې د پوهنتونونو او ښوونځیو دروازې پرانیستل شي او د کار کولو اجازه دې ورکول شي. که د افغانستان اوسني واکمن خپل خیر او د افغان خاورې خیر غواړي او په رښتیا افغانستان سره مینه لري نو په نجونو او ښځو دې شته بندیزونه لرې کړي. ځکه ورځ تر بلې د دوی مخالفان سره همغږي او قوي کېږي. دا چې د هغوی د همغږۍ او قوي کېدو احتمال هم زیات دی او شاید ځیني بهرني هېوادونه یې پوره پوره ملاتړ هم وکړي چې په پایله کې به یې په افغانستان کې بیا یوه لویه جګړه رامنځته شي. نو که جګړه نښلي بیا به یې ارامول ډېر سخت وي. څنګه چې د جمهوریت په دوره کې د جګړې د سون توکي افغانان و او افغان پوځ بیا ډېر تلفات درلودل دغسې به بیا ولس او طالب عسکر او چارواکي تلفات لري. تازه په تازه د طالبانو د حکومت مخالفانو د فبروري په ۱۱مه غونډه کړې او ډېرو مشرانو یې دې غونډې ته آنلاین ویناوې کړي دي. په خپل منځ کې یې پر یووالي ټینګار وکړ او ویلي یې دي، تر څو چې په خپل منځ کې یې اتحاد ثابت کړی نه وي، د بهرنیو هیوادونو له ملاتړه نه شي برخمن کېدای. تاند پښتو خبري وېب پاڼې په یوه راپور کې ویلي چې دغه غونډه په لندن کې جوړه شوې وه او له ترکیې، تاجکستان او نورو هیوادونو څخه د طالبانو مخالفو مشرانو لکه عبدالرب رسول سیاف، عطامحمد نور، محمدمحقق، عبدالرشید دوستم، لطیف پدرام او احمد مسعود ویناوې وکړې. دا هغه کسان دي چې د جمهوریت په وخت کې هم ځیني هېوادونو ترې ملاتړ کاوه او ځینو یې په ګډوډۍ کې پوره پوره لاس درلود. او د داسې نظام په واندې وو چې مجهز پوځ یې درلود. نو که طالب سم نه شي او دې پخوانیو چارواکو بهرنی ملاتړ ترلاسه کړ د طالب جرړې په یوه میاشت کې وباسي، نو ښه ده چې سم شي او د ولس زړونه وګټي.

| 02-11-2023

په پراګ کې د افغانستان سفیر شهزاد اریوبي په خپله فېسبوک پاڼه لیکلي، (نن په ساینسي برخه کې د نجونو او ښځو نړیواله ورځ ده، خو په همدې ورځ متاسفانه لا هم افغانې نجونې د تعلیم له بشري حق څخه محرومې او په کورونو کې ناستې دي. په تېرو شلو کلونو کې افغانو نجونو د تعلیمي برخې تر څنګ په ساینسي برخه کې هم د پام وړ لاس ته راوړنې لرلې. د افغانو نجونو د روبوټيک ټیم یې ښه بېلګه وه چې په بېلابېلو نړیوالو سټيجونو یې د افغانستان نماینده‌ګي وکړله او جایزې یې ترلاسه کړې. په افغانستان کې د نوي تعلیمي کال پيلېدو ته لږ وخت پاتې دی. تمه دا ده چې سږ کال د افغانو نجونو لپاره ښوونځي، پوهنتونونه او نور تعلیمي مرکزونه پرانیستل شي او د ټولنې دا مظلوم او ځورېدلی قشر خپل حقونه ترلاسه کړي. که چېرې داسې ونه شي، نو نړیوال به د اړیکو په تعامل له سره کتنه وکړي. له یوې خوا افغانستان د هیوادونو د بهرنیو پالیسیو له لومړیتوبه وځي او بل خوا ولس هم د خپلو بچو د تعلیم د حق غوښتنه کوي، دا ټول به د دې لامل شي چې کورنۍ او بهرنۍ نارضایتي نوره هم لوړه شي، او خدای‌ناخواسته هیواد به مو یو ځل بیا د انزوا طرف ته لاړ شي.)

| 02-11-2023

ځوانان د یوې ټولنې د ملا تېر، انرژي او ژوندې قوه ده چې، تعلیم او تربیه یې ډېره اړینه ده. په حکومتونو د هغوی د اتباعو له حقوقو څخه یو مسلم حق دا دی چې خپلو خلکو ته دې د تعلیم کولو امکانات برابر کړي. که دا کار و نه شي، یقیني ده چې د ټولنې یو لوی قشر به سخت متضرر شوی وي. بله خبر دا ده چې نړۍ تر پخوا په یو لوی توپیر سره بدله شوې. هغه دا چې اوس د پخوا په څېر خلک په تعلیم پسې نه ځي بلکې تعلیم دی چې د هر چا ترکوره رسېدلی، صرف تر لاسه کول یې مهارت او هنر غواړي او دا هنر او مهارت چې د چا زده وي، وګڼه چې تعلیم یې په اسانۍ تر لاسه کړ. دلته مې اصلي هدف د ژبې له زده کړې څخه دی. وړاندې تر دې چې د تعلیم حاصلولو ته مخه کړو، راځئ چې وسیله اول پیدا کړو- معنی دا راځئ لومړی په ژبه پوه شو. په دې هم پوه شو چې د ژبې زده کړه هم نن سبا اسانه شوي، یعنې هر څه انلاین دي. دا هم یقیني ده چې زمونږ اکثریت ځوانان انټرنیټ ته لاسرسی لري. هغه ځوانان چې انټرنیټ ته لاسرسی لري او د تعلیم کولو پخه اراده لري، په خپل موبایل کې دې له پلی سټور څخه د ډوولینګو سافټویر ډاونلوډ کړئ https://www.duolingo.com/learn او یوه بهرنۍ ژبه زده کړئ. کله مو چې یوه نړیواله ژبه زده کړه، پوه شه چې د تعلیم د حصول په برخه کې دې یو لوی قدم واخیسته. تر دې وروسته د نړۍ مختلف هېوادونه په مختلفو برخو کې سکالرشیپونه اعلانوي، د سکالرشیب ریکوایرمنټ وګورئ، اسناد ورته پوره کړئ او ور و یې لېږئ.... البته یو شی بل هم په پام کې ونیسئ، کولی شئ په یو وخت مختلفو سکالرشیپونو ته خپله غوښتنه ور ولېږئ او کوم یو چې درته را مخ ته شو، وخت مه ضایع کوئ، لاس په کار شئ او ورځئ پرې خو تعلیم وکړئ. تعلیم ته نه مه وایئ، تعلیم وکړئ، تعلیم به مو له سیالانو سره سیال کړي

| 02-09-2023

آنلاین روزنه ښه کار دی چې وشي، لاکن دا کار ستونزمن ښکاري. ځکه چې ډیری خلک، په ځانګړې توګه په لیرې پرتو سیمو کې، منظم انټرنیټ نه لري. یعنې دا اسانتیا د یو فیصد نه بلکې د یو فی زر کسانو لپاره هم ګټه نه رسوي. نو اوسني واکمنان بايد ژر تر ژره خپله پرېکړه بدله کړي، چې نجونې له زده کړو منع کوي او نجونو ته اجازه ورکړي، چې خپلو ښوونځيو او پوهنتونونو ته دوام ورکړي. که داسې نه وي، افغانستان به منځنیو پېړیو ته، هغه وخت چې خلکو اساسي امکانات هم نه لرل، ور وګرځي.

| 02-09-2023

ځوانان ته په کار ده چې د پوهې او علم مشالونه د بدیلو لارو په پیدا کولو سره روښانه وساتي او پرېنږدي چې دغه لړۍ ټکنۍ او ځنډ په کې رامنځته شي. که یوه لار پرې تړل کېږي کوښښ دې وکړي چې بله پرانیزي خو تعلیمي لړۍ باید دوام ومومي، ځکه زموږ د ژوند د بقا او روښانه راتلونکې همدا یوه لاره ده که دا چانس له لاسه ورکوو تل به د تورو تیارو شاته ژوند کوو نو په کار ده چې له حالاتو سره مبارزه جاري وساتل شي او تعلیم او پوهه حاصل شي. تعلیم لکه د نورو ملتونو په څېر زموږ د افغان قشر حق دی او په کار ده چې دا حق ورکول شي، هغه چاچې له موږ دا حق اخیستی ورته وویل شي چې نور دې دا د بدختۍ کار ته خاتمه ورکړي او نجونو ته دې هم لکه د هلکانو په څېر ښوونځي او پوهنتونونه پرانیزي.

| 02-09-2023

ځوانان دې د تعلیم حاصلول نه دروي. که د ژوند کولو یوه دروازه بنده شوه بله به خامخا خلاصه او یا خلاصېږي. تعلیم د یوې ټولنې د ځوان قشر لومړنی حق دی. تعلیم دی چې ملتونه یې سیارو ته ورسول. نن سبا نړۍ ډېره پرمختللې ده. زده کړې که حضوري بندې شوې، انلاین یې وکړئ خو سټاپ کوئ یې مه. زده کړې د ملت غوښتنه ده او ممکن په نژدې وخت کې مسلولین هم ورته د یو خاص میکانېزم په جوړېدو سره اجازه ورکړي.

| 02-09-2023

هغه نجونې چې ښوونځي ته نشي تللی، هغوی له زده کړو څخه بې برخې دي. د دې پروګرام له لارې، نجونې کولی شي په هر ځای کې په آزاده توګه زده کړه وکړي. انلاین ټولګیو هغو نجونو ته چې په کور کې بې روزګاره ناستې وې، هیله مندي پیدا کړې، چې نجونې زده کړو ته دوام ورکړي او له زده کړو بې برخې پاتې نشي. دا واقعاً د نجونو لپاره یو ښه فرصت دی چې له تیارې څخه راوځي او ورو ورو د رڼا په لور حرکت وکړي. ډېرې نجونې د هغوی پر مخ د پوهنتونونو او ښوونځیو د دروازو په تړل کېدلو سره، په رواني ناروغیو اخته شوې وې. د دې پروګرام د انلاین ټولګیو په پیلېدلو سره ښايي دا نجونې په تدریس [زده کړه] بوختې شي او له دې رواني ناروغۍ څخه وژغورل شي.