افغانان خبرداری ورکوي چې د داعش خراسان څانګې د زیاتوالي له پامه غورځول به په افغانستان کې نوی کړکېچ رامنځته کړي

کابل -- افغانان خبرداری ورکوي چې په افغانستان کې د داعش خراسان څانګې سره په مقابله کې پاتې راتلل کیدای شي د لا زیاتې ناامنۍ او بې ثباتۍ لامل شي.

په کابل کې د داعش خراسان څانګې له خوا د وږي د ۱۲مې د ځانمرګي برید مسؤلیت اخیستلود دې ډلې د مخ پر ودې حضور په اړه د افغانانو وېره راپارولې ده.

په پېښه کې د یوې ښځې په ګډون لږ تر لږه شپږ ملکي وګړي ووژل شول او ۱۳ نور ټپیان شول.

په ايټاليا کې مېشت د پوځي چارو شنونکي، محمد نعیم غیور، سلام ټایمز ته وویل، د داعش خراسان څانګې خطر باید جدي ونیول شي.

هغه وویل، د افغان چارواکو له خوا د هغوی جدي نه نیولو «د داعش خراسان څانګې ته فرصت ورکړی چې... ځان پیاوړی کړي،»

غیور وویل، «د دې ډلې د ځپلو لپاره باید یوه رښتینې مبارزه وشي،»

د افغانستان د امنیت څار ادارې په کابل کې د وږي د ۱۲مې له برید مخکې په یوه راپور کې ویلي وو، چې د داعش خراسان څانګې په تېرو دریو کلونو کې په افغانستان کې ۶۳ وژونکي بریدونه ترسره کړي دي.

ملګرو ملتونو په تېرو درې کلونو کې څو ځلې د داعش په اړه خبرداری ورکړی و.

په داسې حال کې چې په کابل کې چارواکي په مکرر ډول په افغانستان کې د دې ډلې شتون او وده ردوي، د داعش خراسان څانګې د بیا راژوندي کېدلو په اړه نړۍ والې اندیښنې په ډېرېدلو دي.

زیاتېدونکی ګواښ

د ځینو افغان شنونکو په وینا، په تیرو دریو کلونو کې د داعش خراسان څانګې، القاعدې او نورو په څېر ترهګرو ډلو په ټول هېواد کې وده کړې ده.

په نیمروز ولایت کې مېشت د پوځي چارو شنونکي حمزه بلوچ وویل، دې ډلو، په ځانګړې توګه د داعش خراسان څانګې او القاعدې افغانستان په خپل خوندي پټنځای باندې بدل کړی دی.

هغه وويل، «له افغانستان څخه تروريزم ټوله نړۍ له خطر سره مخامخ کوي... هغه کولی شي د نړۍ وال امنيتي بحران لامل شي،»

هغه وویل، افغان چارواکي په غرونو کې د ترهګرو پټنځایونو د له منځه وړلو لپاره «پرمختللي هوايي ځواک او پوځي وړتیاوې نه لري. ترهګر له دغه حالت څخه پوره ګټه پورته کوي.»

بلوچ وویل، ترهګرو ته ماتې ورکول سیمه ییزې او نړۍ والې همکارۍ ته اړتیا لري.

د متحده ایالاتو د دفاع وزارت د وږي په ۶مه وویل چې د افغانستان وضعیت په فعاله توګه څاري او له نړۍ والو همکارانو سره کار کوي چې له دغه هېواد څخه د تروریستي ګواښونو پر وړاندې مبارزه وکړي.

ملکي تلفات

په تېرو درېیو کلونو کې په افغانستان، ایران او روسیه کې د داعش خراسان څانګې ترهګر په عمده توګه ملکي وګړي وژني.

په افغانستان کې، شیعه مسلمانان د داعش خراسان څانګې اصلي هدفونه دي.

په افغانستان کې د داعش خراسان څانګې له خوا په وروستیو ۶۳ بریدونو کې، په عمده توګه په کابل، هرات او بلخ ولایتونو کې، ډېر قربانیان شیعه ملکیان دي.

په هرات کې د پوهنتون یوه محصل عباس حسیني چې ۲۸ کاله عمر لري، وویل، د داعش خراسان څانګه د خلکو اول نمبر دښمنه ده.

هغه وویل، «په څومره کالونو کې چې زما یادېږي، د داعش خراسان څانګې یوازې بې ګناه خلک په نښه کړي دي. دې ډلې په جوماتونو کې لمونځ کوونکي، په روغتونونو کې ناروغان او په موټرو کې مسافر وژلي دي،»

هغه زیاته کړه، «دا د اوسنیو واکمنو دنده ده چې له داعش سره مبارزه وکړي، او که دوی وړتیا نه لري، دوی باید د نړۍ والې مرستې غوښتنه وکړي. موږ، خلک ... یوازې ژوندي پاتې کېدل غواړو، او حکومت باید زموږ امنیت تامین کړي،»

د غبرګولي په میاشت کې د سلام ټایمز یوې سروې څرګنده کړه چې له ۶۵٪ څخه زیات افغانان په هیواد کې د داعش خراسان څانګې د بریدونو او فعالیتونو په اړه اندېښمن دي.