متحده ایالات د حوثیانو او الشباب ترمنځ د اړیکو د پرې کولو لپاره د نړۍ والې همکارۍ غوښتنه کوي

متحده ایالاتو په سومالیا کې د القاعدې سره تړلې الشباب او په یمن کې د ایران تر ملاتړ لاندې حوثیانو ترمنځ د زیاتېدونکیو اړیکو د پرې کولو لپاره د نړۍ والو هڅو د همغږۍ غوښتنه کړې ده.

په ملګرو ملتونو کې د متحده ایالاتو سرپرست استازي جان کیلي د کب په ۱۳مه وویل، «د سره سمندرګي قاچاقي لارې چې په سومالیا کې مېشتې ترهګرې ډلې له یمن سره نښلوي، نړۍ والې همکارۍ ته اهمیت ورکوي،»

هغه د ملګرو ملتونو له خوا په الشباب باندې د بندیزونو د پرېکړه لیک له تصویبېدلو څخه وروسته وویل، «موږ د الشباب او حوثیانو ترمنځ د زیاتیدونکو اړیکو په هکله په ځانګړې توګه اندېښمن یو،»

نوموړي وویل، «موږ د یمن او الشباب د بندیزونو د ټیمونو، او د افریقا ښکر او عربي ټاپووزمې هیوادونو ترمنځ خبرې اترې هڅوو څو د حوثیانو او الشباب ترمنځ اړیکې روښانه او په نهایت کې پرې کړي.»

کیلي وویل، «د سمندري غلاوو، د وسلو قاچاق او هغو غیرقانوني فعالیتونو پر ضد د مبارزې لپاره هم سیمه ایز ډیالوګ ته اړتیا ده چې ترهګرۍ ته وده ورکوي،»

په پاریس کې مېشت د نړۍ والو چارو شنونکي محمود سلیمي سلام ټایمز ته وویل، په یمن کې د حوثیانو او القاعدې ترمنځ د ګټو د فرصتونو برابري د افریقا ښکر کې د الشباب په څېر ډلو سره اړیکې پراخې کړې دي.

سلیمي وویل، «متحده ایالات چې د الشباب او حوثیانو ترمنځ د همکارۍ له امله په رامنځته شوي ګواښ ښه خبر دی، د دې اړیکې د له منځه وړلو لپاره په فعاله توګه د نړۍ والې همکارۍ لټون کوي،»

هغه وویل، «په دغو هڅو کې د حوثیانو مشرانو باندې بندیزونه لګول، سیمه ایزو متحدینو سره د استخباراتي معلوماتو د شراکت پياوړتیا، او په ستراتیژیکو سیمو کې د پوځي شتون زیاتول شامل دي.»

هغه وویل، «هدف دا دی چې د دواړو ډلو ترمنځ د وسلو او مالي سرچینو اکمالاتي لړۍ ګډه وډه شي او د هغوی عملیاتي وړتیاوې کمزورې شي،»

د څارنې اړتیا

شنونکو وویل، د ایران رژیم په افغانستان کې له القاعدې سره همکاري کړې، او ممکن په ورته ډول الشباب ته په افریقا کې د امریکایي ګټو په نښه کولو لپاره د یوې وسیلې په سترګه وګوري.

په انقره کې مېشت د ترهګرۍ ضد چارو شنونکي نیاز محمد منصوري سلام ټایمز ته وویل، «که څه هم الشباب د پخوا په پرتله کمزوری شوی دی، خو دا د افریقا ښکر کې یو امنیتي ګواښ پاتې دی،»

هغه زیاته کړه، «په سومالیا کې مېشته ډله د نړۍ والې ټولنې دوامدارې پاملرنې او عمل ته اړتیا لري،»

د دې شبکې د ګډوډولو لپاره په وروستيو اقداماتو کې د الشباب او حوثیانو په مشرانو باندې بندیزونه او په سومالیا او یمن کې د پوځي عملیاتو زیاتوالی شامل دي.

منصوري وویل، په اقداماتو کې د الشباب په اډو او د حوثیانو په پوځي هدفونو باندې د متحده ایالاتو هوايي بریدونه، د وسلو د قاچاق پر وړاندې د مبارزې هڅې، او د عدن خلیج او سره سمندر کې د متحده ایالاتو او متحدینو د سمندري ګزمو پراخول شامل دي.

هغه وویل، دا ډله له دننه څخه هم له فشار سره مخامخ ده، او یادونه یې وکړه چې القاعده د حوثیانو سره د همکارۍ له امله ایډیالوژیکي زیان سره مخامخ شوې ده، چې کېدی شي «د القاعدې د مشرتابه او غړو ترمنځ داخلي ویش رامینځته کړي.»