د افغان ځوانانو لپاره ټولنیزې لارې افراطیت ته د سوله‌ ییزو بدیلونو وړاندیز کوي

د افغانستان په کچه سلګونه ټولنیزې مؤسسې فعالیت کوي، چې د ټولنې پراختیا، ټولنیز ثبات، او د اوږدمهاله ملي پرمختګ لپاره په رغنده مدني ګډون تمرکز لري.

دغو بنسټونو د ځوانانو د وړتیاوو لوړولو، د زیان‌ منو کورنیو مرستې، د زده‌ کړې هڅونې، د اخلاقي مذهبي پوهاوي پیاوړتیا، او په بېلابېلو ټولنو کې د سوله‌ ییز ګډ ژوند پر تشویق باندې کار کوي.

دا د ځوانانو لپاره عملي بدیلونه دي چې د افراطي ډلو له نفوذ څخه بهرد موخې، تعلق او ګټورې ونډې په لټه کې دي.

ټولنیزې مؤسسو کې خیریه بنسټونه، تعلیمي کورسونه سپورتي کلپونه، د شعر او کیسو ویلو پروګرامونه، د دیني زده‌ کړو ټولګي، د شخړو د حل کمېټې، او د ولایتي ځوانانو ترمنځ سپورتي سیالۍ شاملې دي.

په دې ټولو ځایونو کې، ځوانان د فعالیتونو په تنظیم، د ټولنو په ملاتړ، او د مثبت ټولنیز چلند د نمونې په وړاندې کولو کې مرکزي رول لري.

د هغوی ګډون د بېوزلۍ په کمولو، د عامه پوهاوي په لوړولو، د روغتیايي ژوند سبک ته په وده ورکولو، او په همکارۍ او ګډ مسؤلیت کې د ټولنې د اړیکو په پیاوړتیا کې مرسته کړې ده.

د بېلګې په توګه، سپورتي کلپونه په هر ولایت کې فعالیت کوي او زرګونه ځوانان له انزوا یا زیان‌ منو اغېزو ژغوري او ټیمي کار، انضباط، او رغنده سیالۍ خوا ته راجلبوي.

په نړیوالو سیالیو کې د افغان لوبغاړو پرله‌ پسې بریاوو ملي ویاړ پیاوړی کړی او د ځوانانو علاقه یې په منظمو سپورتي فعالیتونو کې لا ټینګه کړې ده.

د ځوانانو رول د هېواد په پرمختګ کې

د هېواد د نفوس لویه برخه ځوانان دي چې له بده مرغه د بې‌ کارۍ او ناڅرګندتیا له ستونزو سره مخ دي.

خو، د ځوانانو ګډون په ټولنیزو مؤسسو او عامه خدمتي سازمانونو کې په مستقیم ډول د ملي پرمختګ او ټولنیزې پیاوړتیا سره مرسته کوي.

صالح محمد قدیري، چې د هرات ولایت ټولنپوه دی، وویل، «د ځوانانو ګډون په رغنده فعالیتونو کې کولی شي ټولنه بدله کړي او زیان‌ منونکي ټولنیز چلندونه کم کړي.»

هغه وویل، «دغه ځوانان کولی شي ځان له انزوا وباسي او په روغتیایي ټولنیزو فعالیتونو کې برخه واخلي. د ورزش او زده‌ کړې له لارې، دوی کولی شي خپلې وړتیاوې لوړې کړي او د ټولنې لپاره د خدمت سرچینه شي.»

هغه زیاته کړه، «نن ورځ زموږ د ځوانو ورزشکارانو په نړیوالو ډګرونو کې د بریاوو لیدل ډېر خوشحاله کوونکي دي. هغوی له صفره پیل وکړ او د هڅونې او استقامت له لارې یې دغه بریاوې ترلاسه کړې.»

د ځوانانو ګډون، ټولنیز یووالي ته پیاوړتیا ورکوي، د تاوتریخوالي اړوند زیانونه کموي، او د اقتصادي او کلتوري ودې لپاره فرصتونه رامنځته کوي.

مدني مشارکت د تاوتریخوالي په وړاندې یو خنډ ګڼل کیږي.

په ټولنیزو او خیریه مؤسسو کې د ځوانانو ګډون د هغوی د مسئولیت احساس پیاوړی کوي او د ثباتاو ټولنیز یووالي ټینګښت ته وده ورکوي.

له بلې خوا، د دې مشارکت له لارې، ځوانان کولی شي په ټولنیزو پرېکړو کې برخه واخلي، او خپل رول په هېواد کې د پرمختګ او پراختیا په برخه کې روښانه کړي.

په هرات کې د ټولنیزو چارو شنونکي فیصل جهانگیری، وویل: «فعال ځوانان کولی شي د ټولنو په ځایي اقتصادونو کې اصلي محرک وي او له امله یې د ملي اقتصاد د پراختیا لپاره مرسته وکړي. د ټولنیزو او اقتصادي مؤسسو سره یوځای کېدو له لارې، ځوانان د ټولنې د اقتصاد د بدلون وړتیا لري.»

جهانگیری زیاته کړه، «د ځوانانو پراخه ګډون تاوتریخوالی او ټولنیز انحرافات کموي، په داسې حال کې چې د ټولو وګړو لپاره د اغیزمن مدني ګډون فرصتونه پراخوي.»