د طالبانو د نظامي روزنې عکسونو د سولې د ارادو په هکله شکونه راپورته کړل

کابل -- د طالبانو تبلیغات چې جنګیالي یې د نظامي روزنې په حال کې ښیي د افغانانو تر منځ شکونه راپورته کوي چې اورپکي د سولې په هکله څومره جدي دي .

د طالبانو ویاند ذبیح الله مجاهد د دوشنبې په ورځ /د وري ۱۱مه/ په ټوېټر باندې یو شمېر عکسونه خپاره کړل چې یاغیان په نامعلومو ځایونو کې د مارش کولو او د وسلو چلولو پر وخت ښیي. له یوه عکس سره لیکل شوي چې په بدخشان ولایت کې دی.

مجاهد په خپل پوسټ کې ویلي، اورپکي د دې لپاره روزنه ترلاسه کوي چې وکولی شي د اسلامي حاکمیت د قایمولو په وړاندې خنډونه له منځه وېسي.

په یادو عکسونو او ویناوو باندې سمدلاسه انتقادونه پیل شول.

په ولسي جرګه کې د کابل ولایت پخواني استازي او د سیاسي چارو شنونکي داود کلکاني وویل، «کله چې طالبان وایي چې هغوی د خپل اسلامي حاکمیت په وړاندې خنډونه له منځه وړي، د دې معنی دا ده چې یاده ډله غواړي چې د سولې پروسې څخه د داسې یوې وسلې په توګه کار واخلي چې له هغوی سره د اسلامي امارت د بیا قایمولو د هدف په ترسره کولو کې مرسته وکړي.

کلکاني وویل، «طالبان یواځې په الفاظو کې د اسلامي حاکمیت ادعا کوي ځکه چې د هغوی عملونه کاملا د اسلام پر خلاف دي.»

هغه وویل، «افغانستان تر ټولو ښه اسلامي نظام لري او اساسي قانون داسې تصریح کوي چې، هېڅ قانون نشي كولى چې د اسلام د سپېڅلي دين د معتقداتو او احكامو مخالف وي. طالبان یواځې د اسلامي حاکمیت د شعارونو په ورکولو سره عام خلک غولوي.»

هغه زیاته کړه، «زه فکر کوم چې طالبان په خپلو مغزونو کې له سولې څخه پرته نورې ارادې لري؛ هغوی چې د سولې او مذاکراتو په هکله خبره کوي یواځې ځان ښودنه کوي.»

کلکاني وویل، «هغوی پلان لري چې د نویو روزل شویو غړو په وسیله دا دولت رانسکور کړي، خو دا کار ناشونی دی. هغوی باید خپل فکرونه بدل کړي ځکه چې د هغوی په مخکې یواځینی مناسب انتخاب خبرې کول او سوله دي.»

د رښتنولۍ نشتوالی

د طالبانو دا تبلیغات وروسته له هغه مخې ته راغلل چې اورپکو د وري په ۱۰مه د افغان حکومت له خوا جوړ شوی مرکچي ټیم رد کړ او ادعا یې وکړه چې یاد ټیم ټولشمول نه دی.

پر ځای یې، اورپکې ډلې یواځې له دې سره توافق وکړ چې د افغان حکومت له یوه تخنیکي ټیم سره وګوري او د بندیانو د تبادلې د جنجالي مسئلې په هکله خبرې وکړي.

دغو ویناوو او عکسونو داسې شکونه رامنځته کړي چې طالبان د سولې د خبرو مېز ته د نه راتګ لپاره یواځې بهانې جوړوي.‌

په کابل کې د یوه خصوصي پوهنتون د ماسټرۍ د دورې محصل احمد فهیم نوري چې ۳۵ کاله عمر لري، وویل، «د طالبانو له خوا په ټولنیزو رسنیو باندې د هغوی د جنګیالیو له عکسونو سره شوی پوست د سولې د یقیني کولو او د جګړې د پای ته رسولو په برخه کې د یادې ډلې نه صداقت په ګوته کوي.»

هغه وویل، «کله چې هغوی وایي چې نه غواړي له دغه یا هغه مرکچي ټیم سره خبرې وکړي، هغوی بهانې کوي. حقیقت دا دی چې طالبان داسې اراده نه لري چې په افغانستان کې سوله راشي.»

نوري وویل، «طالبانو په وروستیو کې له متحده ایالاتو سره د سولې هوکړه وکړه. هغوی ومنله چې هغوی به بین الافغاني خبرې پیل کړي، او د هغوی بندیان به خوشې کړای شي، خو د یادې ډلې نوی موقف ښیي چې د سولې تړون، په تاوتریخوالي کې کمی او د سولې بین الافغاني خبرو ته تیاری یواځې سمبولیک کارونه وو، ځکه په حقیقت کې طالبان سوله نه غواړي.»

هغه زیاته کړه، «طالبان په داسې حال کې په جګړه تاکید کوي چې ټول افغانان په ټولیز ډول د سولې لپاره چمتووالی کوي.‌ د هغوی نوی موقف دا معنی لري چې یاده ډله د سولې او افغانانو په وړاندې دښمني لري.»

په کابل کې د پوهنتون یوه استاد او د سیاسي چارو شنونکی بصیراحمد یوسفي وویل، د تېر کال په وروستیو کې په تاوتریخوالي کې کمی او پلان شوې بین الافغاني خبرې «مثبت پرمختګونه وو چې د سولې په پروسه کې رامنځته شول او افغانان یې سولې او ثبات ته هیله من کړل، خو د طالبانو وروستیو موقفونو هر څه په بله واړول او د سولې په هکله د هغوی په خلوص یې سوالونه راپورته کړل.»

یوسفي وویل، «د طالبانو عکسونه چې د جنګ لپاره د هغوی چمتووالی ښیي، څرګندوي چې یاده ډله متحده ایالاتو سره د هغوی د سولې د هوکړې شرایطو ته ژمنه نه ده او د جګړې د پای ته رسولو لپاره هېڅ اراده نه لري.»

متشنج هویت

د سیاسي چارو یوه شنونکي او د غزني ولایت پخواني مرستیال والي محمد علي احمدي وویل، «افغان حکومت او متحده ایالاتو افغانستان ته د سولې په راوستلو کې خپلې ارادې او خلوص څرګند کړي دي.»

هغه وویل، «د طالبانو له خوا د نظامي روزنې عکسونو افغانانو او نړۍ ته ثابته کړه چې طالبان سوله نه غواړي او د دې علاقه مند دي چې جنګ ته دوام ورکړي.»

احمدي وویل، «طالبان په دې پوه شوي چې جنګ هغوی ته هویت ورکړی او دا چې هغوی به له جنګ څخه پرته هېڅ هویت یا پرستېژ ونه لري، له دې امله، هغوی د بهانو په جوړولو سره د سولې په لاره کې خنډونه جوړوي.»

په کابل کې د پوځي چارو یوه شنونکي عزیز ستانکزي وویل، «زه فکر کوم چې یو شمېر طالبان له جګړې څخه ستړي شوي او له سولې سره علاقه مندي لري،‌ خو د هغوی په منځ کې ځینې داسې دي چې غواړي د خپلو ګټو د ساتنې لپاره جنګ ته دوام ورکړي.»

هغه وویل، «له دې امله، دغه کسان جنګ او پاروونکیو عملونو ته مخه کوي څو د شخړې لوري جنګ ته ورټېل وهل شي.»

ستانکزي زیاته کړه، «یو شمېر ګاونډي او د سیمې هېوادونه په افغانستان کې له سولې، ثبات او امنیت سره علاقه مندي نه لري. دغه هېوادونه له جګړې او د نشه ییزو توکو له قاچاق څخه پراخ عواید ترلاسه کوي،‌ او د طالبانو د مشرتابه یو شمېر کسان د دغو هېوادونو له استخباراتي ادارو سره ګډې ګټې لري.»

هغه وویل،‌ «د دغو ادارو په حکم سره، هغوی هڅه کوي چې د سولې پروسه چې تر اوسه پورې ښه روانه ده ګډه وډه کړي،» او زیاته یې کړه چې طالبان د ایران او روسیې په ګډون هېوادونو سره اړیکې لري.