د کندوز ښار د سرک جوړونې پروژې کاري فرصتونه رامنځته کوي او د لارویانو لپاره ژوند اسانوي

کندوز -- د سرکونو د څلورو نویو پروژو، چې تېره میاشت پیل شوې، په بشپړېدلو سره به د کندوز ښار اوسیدونکي په اوړي کې د دوړو او په ژمي کې د خټو له ستونزو څخه پرته کار او ښوونځي ته تګ راتګ وکړای شي.

ښار ته د یوې اضافي ګټې په توګه، دا پروژې چې د کندوز ښار د اوسیدونکو په غوښتنه او د ملګرو ملتونو د پروژوي خدمتونو ادارې (یو اېن او پي اېس) له خوا له ۲۳۰۰۰۰ ډالرو څخه د زیاتې بودجې په تمویل سره پیل شوي، له ۱۰۰۰۰ څخه ډیر ځایي کاري فرصتونه رامنځته کړي.

د کندوز ښاروال ګل محمد الیاس سلام ټایمز ته وویل، د وري په ۱ د کندوز ښار په بېلابېلو برخو کې د څلورو پروژو د رغونې چارې پیل شوې.

هغه وویل، د هغو پروژو په لړ کې به چې «له دوو څخه تر څلورو میاشتو پورې وخت کې بشپړې شي»، خراب شوي سرکونه ترمیم او بیا ورغول شي، فرعي کوڅې به پخې شي، خام سرکونه به جوړ کړای شي او د بدرفت کانالونه به پاک شي چې ورسره به تګ راتګ اسان شي.

هغه وويل، «د دغو پروژو په پلي کېدلو سره له لسو زرو څخه زياتو بې روزګارو کسانو ته د کار زمينه برابره شوې،» او يادونه یې وکړه چې هغوی د خپل کار په بدل کې د پيسو د ترلاسه کولو ترڅنګ د خپلو سیمو په پرمختګ کې هم برخه اخلي.

الیاس وویل، کار به «د مولوي سراج الدین شهید په کوڅه، د څلورمې ناحیې په سره حوا کوڅه او د دریمې ناحیې د بي بي عایشې صدیقې لېسې ته څېرمه کوڅه کې» تمرکز وکړي.

هغه وويل، همدارنګه په کارته هلال کوڅه او د سيد نعيم عسکر او د پنځمې ناحيې د سر دورې په ځينو سيمو کې هم د رغونې او بيارغونې کارونه پيل کیږي.

تګ راتګ ښه کېدل

د کندوز اوسېدونکو او هغو کسانو چې د ښار د سرکونو په پروژو کې کار کاوه سلام ټایمز ته وویل، هغوی د دغه نوښت هرکلی کوي.

د کندوز ښار د لومړۍ ناحيې اوسېدونکي سيف الدين چې ۴۷ کاله عمر لري، وويل، خوښ دى چې د سيمې ترانسپورتي ستونزې هوارېږي.

هغه وويل، «زموږ کوڅه نږدې يو کيلومتر اوږده ده. دا خامه وه، غټې کندې په کې وې، او په ژمي کې به موټر ورځو په کې نښتي ول.»

هغه وویل، «په ژمي کې خلک د کندو او د لارې د خرابوالي له امله په کوڅه کې پلي نشوای تللی چې ښار ته لاړ شي.»

۳۵ کلن نوید احمد، چې دی هم د کندوز ښار په لومړۍ ناحیه کې اوسېږي، وویل، د هغې کوڅې چې دی په کې ژوند کوي، حالت پخوا خراب و، خو ویې ویل چې نوی سرک به ډېرې ستونزې هوارې کړي.

هغه وويل، د سرک جوړونې د پروژې په بشپړېدلو سره به د هرچا لپاره تګ راتګ اسان شي، او يادونه یې وکړه چې د ښوونځي زده کوونکي به اوس «بې له دې چې کالي او بوټان یې په خټو ککړ شي» وکولی شي چې ښوونځي ته لاړ شي.

ځایي دندې

د کندوز یو شمېر اوسیدونکو وویل، د کار پیدا کولو او د محلي ترانسپورت د ښه کیدلو سربیره، ساختماني پروژو ګاونډیو هیوادونو ته د ځوانانو د غیرقانوني مهاجرت یو ګټور بدیل رامنځته کړی دی.

د کندوز ښار د درېيمې ناحيې اوسېدونکي ٣٣ کلن رحيم الله وويل، ډېرو ځوانانو چې له سختو شرایطو سره مخامخ ول، د کار په لټون پسې هېواد پرېښی دی ځکه چې په هېواد کې دننه بې کاري ده.

هغه وويل، «له بده مرغه، زموږ زياتره ځوانان چې ايران او پاکستان ته د کار لپاره تللي دي، د هغو هېوادونو د حکومتونو په تېره بيا په ايران کې له ګڼو ستونزو او تبعيض سره مخامخ دي.»

رحيم الله چې په درېيمه ناحيه کې د سرحوض کوڅې په پروژه کې کار کوي، وويل، «که د مرستندويو ادارو له خوا ورته نورې پروژې پلې شي، ځوانان به هيڅکله هم خپل کورونه پرې نه ږدي.»

هغه وويل، «زه په ټولو ځوانانو غږ کوم چې هغوی د دې پر ځاى چې د کار لپاره ګاونډيو هېوادونو ته لاړ شي، خپله انرژي دې په خپل هېواد کې ولګوي. دا به د دوی د خپل هیواد په جوړولو کې مرسته وکړي، او د دوی عزت به خوندي شي.»

د کندوز ښار د لومړۍ ناحيې اوسېدونکي ٤٣ کلن جمعه الدين نظري وويل، چې د ده په ګډون د دې سيمې ټولو اوسېدونکيو په دې پروژه کې برخه اخیستې ده.

هغه وويل، «موږ د کارته هلال کوڅې د بيارغونې غوښتنه وکړه، چې په کې په سلګونو کورنۍ ژوند کوي. پخوا په اوړي کې د دوړو او په ژمي کې د خټو له امله په دې سرک باندې تګ راتګ خورا ستونزمن و.»

نظري وويل، «موږ حتی جومات ته د لمانځه لپاره نشوو تللای،» او زياته یې کړه چې اوسېدونکي خوښ دي چې د سرک د پخولو کار پيل شو.

هغه وویل، «د ښار دننه ډېری کوڅې خرابې شوي دي او جدي بیارغونې ته اړتیا لري.»

نظري وویل، «زه هیله لرم چې مرستندویې ادارې د ښار دننه د حلقوي سرکونو بیارغونې او ترمیم ته جدي پاملرنه وکړي څو خلک په اسانتیا کې ژوند وکړي.»