افغان علماوو د داعش له خوا د اسلامي سمبولونو کارول وغندل

کابل -- داعش په خپل تور بیرغ کې د شهادت کلیمې څخه کار اخلي څو ځان د یوه اسلامي حرکت په توګه مطرح کړي، په داسې حال کې چې د هغوی کارونه د اسلام ضد دي.

دیني عالمان داعش ډله یوه اسلام ضد او غیر انساني ډله بولي.

د غور ولایت یوه افغان دیني عالم، مولوي شرف الدین حکیمي وویل، «د داعش په بیرغ کې د شهادت کلیمې کارول د اسلام سپېڅلي دین ته ښکاره سپکاوی دی. د دې ډلې کړنې له اسلامي ارزښتونو سره حتی یوه زره هم نږدې والی نه لري.»

حکيمي د داعش له خوا د تروريستي فعاليتونو لپاره د نالوستو او بې وزلو مسلمانانو د غولولو او استخدامولو لپاره له اسلامي سمبولونو څخه کار اخيستل وغندل.

هغه سلام ټایمز ته وویل، «د یادې ډلې له خوا په خپل بیرغ کې د شهادت کلیمې په ګډون د اسلامي سمبولونو کارول یو ظاهري عمل دی. داعش د خپلو غیر انساني کړنو له لارې هڅه کوي ... اسلام ته زیان ور ورسوي.»

د بې ګناه ملکي وګړو وژل

په دې تېره لسیزه کې، داعش تقریبا یواځې بې ګناه ملکي وګړي په نښه کړي دي.

په افغانستان کې، د داعش د خراسان څانګې اکثریت قربانیان مسلمانان دي.

مثلا، د وږي په ۲۲مه د داعش خراسان څانګې وسله والو په دایکندي ولایت کې، چې اکثره اوسېدونکي یې هزاره ګان دي، ۱۴ ملکي وګړي ووژل.

د بشري حقونو د څار ډلې په وینا، دا ډله د عراق په کربلا کې د شیعه سپیڅلو ځایونو له زیارت څخه بېرته راستنېدله.

په هرات کې یوه دیني عالم، مولوي محمد اکرم حنفي وویل، اسلام «نه یواځې د مسلمانانو وژنه، بلکې د بې ګناه غیر مسلمانانو وژنه هم غندي. هیڅوک حق نه لري چې د یوه بې ګناه انسان وینه تویه کړي.»

هغه سلام ټایمز ته وویل، «موږ وینو چې د داعش ترهګره او جنایتکاره ډله په مختلفو هېوادونو کې بې ګناه خلک وژني،»

حنفي وویل، د داعش موخه دا ده چې د خپل تاوتریخوالي او وینو تویولو له لارې په ټوله نړۍ کې د اسلام سخت او وحشتناک انځور وړاندې کړي. په حقیقت کې اسلام د دغې ترهګرې ډلې ټول اعمال ردوي.

دروغ او دوکه

شنونکي وايي، داعش هڅه کوي چې مسلمانان وغولوي، او په دې توګه د خپلې ترهګرۍ د پراخولو لپاره استخدام او مالي ملاتړ جلب کړي.

په سوېډن کې مېشت د مدني ټولنې یوه فعال سید اشرف سادات وویل، «داعش په مختلفو هېوادونو کې د اسلامي نښانونو، لکه په خپل بیرغ کې د شهادت کلیمې، او همدارنګه د قران کریم آیتونو، په کارولو سره د خپلو اعمالو د توجیه له لارې ډېر ځوانان غولولي دي،»

هغه سلام ټایمز ته وویل، «دغه ځوان پیروان، چې د خپل دین په اړه کافي پوهه نه لري، د داعش د فریبکارو شعارونو قرباني شوي دي،»

سادات خبرداری ورکړ چې، په ټولنیزو رسنیو کې د داعش د دروغو خپرول په ټوله نړۍ کې ځوانان په نښه کوي، او د دې رجحان دوام په جدي توګه نړۍ وال امنیت له ګواښ سره مخامخ کوي.

هغه وویل، «په داسې حال کې چې داعش ادعا کوي چې یو اسلامي دولت دی، لاکن د هغوی یو عمل هم له اسلامي ارزښتونو سره سر نه خوري. په هرصورت، د دې ترهګرې ډلې پروپاګند او د دروغو ادعا ځینې مسلمانان غولولي او د دې ډلې د فعالیتونو دوام ته یې اجازه ورکړې ده.»