د جنګیالیو د جلب او جذب د کمبود په ترڅ کې د داعش خراسان څانګه د خپل اهمیت ساتلو کې پاتې راغلې

کابل -- د پوځي او امنیتي شنونکو په وینا، د داعش خراسان څانګه د نويو غړو د استخدام په وړتیا کې د پام وړ کمښت سره مخامخ ده ځکه چې د یادې ډلې آنلاین حضور د کمېدلو په لوري روان دی.

د ملګرو ملتونو د امنیت شورا د ۱۴۰۲ د زمري په میاشت کې اټکل وکړ چې د داعش خراسان څانګه په افغانستان کې له ۴۰۰۰ څخه تر ۶۰۰۰ پورې جنګیالي او د کورنیو غړي لري.

د عملیاتي فعالیتونو په کمېدلو سره، دغه ترهګر سازمان په خپل نفوذ کې د پام وړ کمښت سره مخامخ شو.

په نیمروز کې مېشت د پوځي چارو شنونکي حمزه بلوچ سلام ټایمز ته وویل، «انټرنیټ او ټولنیزې رسنۍ د داعش خراسان څانګې د ځوانانو د غولولو لپاره لومړنۍ وسیلې وې، خو د دې ډلې وحشیانه کړنو احتمالي جلبېدونکي کسان ترغیب کړي دي. د دوی بریدونه ښیي چې دوی هیڅ اخلاقي یا مذهبي ارزښتونو ته غاړه نه ږدي.»

د داعش خراسان څانګې په وروستیو میاشتو کې هڅه کړې چې د یو نفري بریدونو د مسؤلیت په منلو سره خپل اهمیت پرځای وساتي. داسې بریدونه چې په خپلواکه توګه او له دغې ډلې سره له مخکې تر مخکې تړاو څخه پرته ترسره شي.

شنونکي وړاندیز کوي چې دا ادعاوې د ملاتړ د کمېدلو او عملیاتي شکستونو په لړ کې د قوت د له منځه تګ او اهمیت د مطرح کولو یوه هڅه ده.

بلوچ وویل، د داعش خراسان څانګې د خپلو ملاتړو په منځ کې اعتبار له لاسه ورکړی، او ډیر لږ یې غواړي چې له دغې ترهګرې ډلې سره یوځای شي.

هغه زیاته کړه، «که څه هم د ټولنیزو رسنیو او آنلاین پلیټ فارمونو له لارې استخدام د داعش خراسان څانګې لپاره په زیاتیدونکي توګه ستونزمن شوي، په افغانستان او پاکستان کې د وزګارو او بې تعلیمه ځوانانو د استخدام خطر لا هم موجود دی،»

زیاتېدونکې ستونزې

د دې ډلې د استخدام هڅې په اروپا او متحده ایالاتو کې د بریالیو تروریزم ضد عملیاتو له امله نور هم له ستونزو سره مخامخ شوي چې په پایله کې یې د تېر کال په ترڅ کې ګڼ‌ شمېر بریدونه ناکام شوي او کسان نیول شوي دي.

په نیمروز کې د سیاسي چارو شنونکي عبدالصبور نېکمل په وینا، دا ډول نړۍ وال فشار د احتمالي استخدام مخه نیولې او په لوېدیځ کې یې د داعش خراسان څانګې هیلې شنډې کړي دي.

هغه سلام ټایمز ته وویل، «یواځې سږ کال، په داسې حال کې چې د داعش خراسان څانګه په روسیه او ایران کې د بریدونو په ترسره کولو کې بریالی شوه، په نورو هیوادونو کې د دوی ډیری دسیسې شنډې شوې. دغو ناکامیو خپلو موخو ته د رسېدلو لپاره د دې ډلې مخه نیولې او د ملاتړو په منځ کې یې اعتبار کم کړی دی.»

نېکمل وویل، د داعش خراسان څانګه د نویو غړو په استخدام او د تروریستي عملیاتو په ترسره کولو کې د پام وړ ننګونو سره مخامخ ده.

هغه وويل، «له افغانستان او پاکستان څخه بهر د داعش خراسان څانګې ځینې ملاتړي له دې وېرې له ډلې سره د هر ډول تړاو څخه ډډه کوي چې وبه پېژندل شي او سزا به ورکول شي. ډېر نور دا جرئت نه کوي چې د داعش خراسان څانګې له غړو سره اړیکه ونیسي یا په ټولنیزو رسنیو کې دې ډلې ته وده ورکړي.»

د افغان وېټنېس او په برتانیا کې مېشت د معلوماتو د پیاوړتیا مرکز د وږي میاشتې راپور په ډاګه کړه چې داعش خراسان څانګه د اغېزو کمېدا سره سره په ټولنیزو رسنیو کې د عربي، انګلیسي، پښتو، فارسي، روسی، تاجکي، ترکي، اردو په ګډون په څو ژبو د خپلو تروریستي فعالیتونو د پراخولو هڅو ته دوام ورکوي.