ترهګرې ډلې هڅه کوي چې په افغانستان کې ځمکه لاندې کړي

کابل -- امنیتي ځواکونه د هغو ترهګرو کړیو د ځپلو لپاره خپلو هڅو ته دوام ورکوي چې خورې ورې موجودې دي، او غواړي د افغانستان په بېلابېلو برخو او ګاونډیو سیمو کې خپل حضور وساتي.

د ترهګرو ډلو پاتې شوني هڅه کوي چې د دغه جګړه ځپلي هېواد په امنیتي برخه کې له خلاوو څخه ګټه پورته کړي، البته د هغوی هڅې په پراخه کچه بې اغېزې پاتې دي.

په تهران کې مېشت افغان سیاسي شنونکي محی الدین احمدي وویل، «له ۱۴۰۰ لمریز کال راهیسې، په هیواد کې د قدرت خلا او امنیتي ننګونې زیاتې شوي دي،»

هغه زیاته کړه، «په دې شرایطو کې، د داعش د خراسان څانګې په څیر ترهګرې ډلې د خپل نفوذ د پراخولو او په سیمه کې د تروریستي عملیاتو د ترسره کولو لپاره له بې ثباتۍ څخه د ګټې اخیستنې لټه کوي،»

سیمه ایزو امنیتي ځواکونو ډېر ګواښونه له منځه وړي، البته خورې ورۍ کړۍ داسې هڅو ته دوام ورکوي چې په ځینو سیمو کې د پښې اېښودلو ځایونه ومومي.

په یوه تازه پیښه کې، د داعش خراسان څانګې د لیندۍ په ۳مه په بغلان ولایت کې د صوفیانو پر یوه زیارت برید وکړ، چې ۱۰ تنه ذاکران یې د هغوی د اونیزو مراسمو په ترڅ کې ووژل.

دا برید، چې په لمانځه بوخت ملکي وګړي یې په نښه کړل، د زیان منونکو ځایونو د په نښه کولو یوه نمونه زیاتوي. د ۱۴۰۰ لمریز د زمري میاشتې راهیسې، دې ډلې په صوفي ځایونو کې د څلورو نورو بریدونو ادعا کړې.

د بغلان یوه اوسېدونکي محی الدین حلیمي وویل، «د داعش خراسان څانګه یوه وحشي ترهګره ډله ده چې یوازنۍ موخه یې د بې ګناه او بې دفاع خلکو وژل دي. د هغې کړنې په بشپړه توګه د اسلام ضد او غیر انساني دي.»

د ترهګرۍ ضد هڅې دوام لري

د ستراتیژیکو څېړنو لپاره د نږدې ختیځ جنوبي آسیا مرکز په وینا، دې ډلو هڅه کړې چې «د حکومت له کمزورتیا او امنیتي خلا څخه په استفادې سره عملیاتي پټنځایونه جوړ کړي،» خو په دې برخه کې یې لږه بریا ترلاسه کړې ده.

وروستي استخباراتي معلومات ښیي چې د دوی عملیات محدود دي، او د ترهګرۍ ضد هڅې د دې لپاره روانې دي چې د دایمي اډو د جوړولو مخه ونیسي.

د پاکستان په باجوړ ولسوالۍ کې د لړم په مياشت کې د جماعت اسلامي د ځايي څانګې د عمومي منشي صوفي حميد وژنه له پولې پورې غاړه د هغوی یوه نامنظمه هڅه ده.

شنونکي ټینګار کوي چې د دې ګواښونو د کمولو لپاره همغږی نړۍ وال اقدام دوام لري، او هیڅ یو هیواد په یوازې سر دا بار په غاړه نه اخلي.

اساسي اقدامات وار له مخه خپل نتایج ښیي.

په تاشکند کې مېشت افغان پوځي شنونکي محمد موسی هدفمند سلام ټایمز ته وویل، «په دې کې د پولو د څارنې پیاوړي کول، د افغانستان په موقت حکومت باندې له ترهګرۍ سره د مبارزې لپاره د دیپلوماتیک فشار زیاتول او د بشري مرستو ملاتړ شامل دي،»

په داسې حال کې چې پرله پسې بریدونه پر ملکي وګړو اغیز کوي، ولسونه لا هم خپل مقاومت ته دوام ورکوي.

د کابل اوسېدونکي نجیب الله ساغري سلام ټایمز ته وویل، «د داعش، القاعدې او نورو نایبو ګروپونو په ګډون ترهګر نه یوازې د خپلو دسیسو لپاره بې ګناه خلک قرباني کوي، بلکې د هېواد زیربنا هم ویجاړوي،»

هغه وویل، «د افغانستان خلک باید د دغو ډلو پر وړاندې متحد شي.»