یو ایرانی چارواکی د فاطمیون د 'رضاکارانو' په اړه د تهران د ادعا خلاف څرګندونې وکړې

کابل -- یوه ایراني چارواکي اعتراف وکړ چې تهران بې وزله افغان کډوال د پیسو په وعدو غولوي چې په سوریه کې د فاطمیون لوا د برخې په توګه جنګ وکړي. دا کار د رژیم د هغې ادعا خلاف دی چې وایي دغه ډله له اجیرانو څخه نه بلکې له رضاکارانو څخه جوړه شوې ده.

د اسلامي انقلابي ګارډ یوه پخواني غړي پروېز فتاح چې د اسلامي انقلاب د مستضعفان بنسټ د رییس په توګه کار کوي، په یوه ویډیو کې چې په ټولنیزو رسنیو په پراخه توګه شریکه شوې ده، ویلي دي، رژیم افغانان د پیسو په بدل کې سوریې ته د جنګ لپاره لېږل.

فتاح په یوه تلویزیوني ننداره کې په خپله یوه ویډیو کې چې د خپراوي نیټه یي معلومه نده وویل، «ما له سپاه کوپراتیف فاونډېشن سره کار کاوه چې حاجی قاسم سلیماني رانه مرسته وغوښتله او ویې ویل چې هغه پیسې نه لري چې هغه میاشت یې په سوریه کې د فاطمیون جنګیالیو ته ورکړي.»

د هغه هدف د اسلامي انقلابي ګارډ د قدس ځواک قوماندان تورن جنرال قاسم سلیماني وو چې د متحده ایالاتو یوې بې پیلوټه الوتکې د مرغومي په ۱۳مه په بغداد کې په یوه برید کې وواژه .

هغه زیاته کړه، «سلیماني نشوای کولی چې خپلو د فاطمیون جنګیالیو ته اجوره ورکړي.» هغه وویل، «زه خجالت یم. ما هغوی دلته راوستل او اوس نشم کولی چې پيسې ورکړم.»

سلیماني په ایران کې د ایران له ستر مذهبي مشر آیت الله علي خامنه اي څخه وروسته تر ټولو ډېر ځواکمن مشر بلل کېده.

د ناوړه استفادې ثبوت

د فتاح دا اعتراف، چې پخوا د برېښنا وزیر وو، د ایرانی مقاماتو د هغو انکارونو خلاف دی چې ویل یې رژیم د فاطمیون لوا جنګیالیو ته پیسې نه ورکوي. پرځای یې، ایران اصرار کاوه چې افغانانو د سوریې په جګړه کې د رضاکارانو په توګه برخه اخیستې ده.

دغه څرګندونې همدارنګه د ایراني رژیم مالي ستونزې په ګوته کوي چې له ډېرېدونکیو ناراضو خلکو او ګډوډ اقتصاد سره مخامخ دي.

د فتاح خبرې په ایران کې کم اهمیته وبلل شوې.‌

د شرق په نامه ایرانۍ ورځپاڼې د وري په ۱۷مه د فتاح څرګندونې حیرانونکې وبللې او ویي لیکل، «داسې ښکاري چې د مستضعفان بنسټ رییس داسې پوهه نه لري چې په یوه تلوېزیوني ننداره کې د خبرو کولو لپاره ورته اړتیا ده.»

په افغانستان کې، د سیاسي چارو شنونکي لکه اکبرجان پولاد چې په کابل کې میشت د سیاسي چارو شنونکی دی، دغه اعتراف له بې وزلو افغانانو څخه د ایراني رژیم د ناوړه استفادې کلک ثبوت بولي.

هغه وویل، «پخوا، ایراني مقاماتو په بېلابېلو وختونو کې ویل چې افغانان د سوریې جګړې ته د رضاکارانو په توګه او له کومو مالي تشویقیو څخه پرته تللي چې له زیارتونو، د سیده ذینب جومات او نورو مقدسو ځایونو څخه دفاع وکړي.»

پولاد زیاته کړه، «خو د هغه پرخلاف د دغه ایراني چارواکي خبرې ښیي چې د ایران حکومت د افغانانو د ژوند په خطر کې اچولو او هغوی ته په سوریه کې د جنګ کولو لپاره د پیسو ورکولو له لارې د افغان کډوالو له بې وزله حالت څخه ناوړه استفاده کوي.»

هغه وویل، «د دغه ایرانی چارواکي خبرې ښیي چې ایران په سوریه او نورو هېوادونو کې د خپلو ګټو د ساتنې لپاره د فاطمیون لوا په څېر نیمه نظامي ډلو کې دومره پراخه پانګونه کړې چې اوس د تمویل له داسې ستونزو سره مخامخ دی چې نشي کولی د فاطمیون جنګیالیو ته پيسې ورکړي.»

د ایران لپاره د متحده ایالاتو ځانګړي استازي بریان هوک د تېر لړم په میاشت کې وویل، ایراني رژیم د سوریې د کورني جنګ په ترڅ‌ کې د سوریې د ولسمشر بشارالاسد د رژیم په پیاوړي کولو او په سوریه کې د تهران د نفوذ په پراخولو نږدې ۱.۲ تریلیونه افغانۍ (۱۶ میلیارده ډالر) لګولي دي.

د فاطمیون لوا یوه پخواني غړي چې یو وخت په سوریه کې توظیف شوی وو، وویل، «د فاطمیون لوا هر جنګیالی د میاشتې ۶۳۰۰۰ افغانۍ یا ۸۲۸ ډالره (۳.۵ میلیونه تومان) له ایران او ۹۰۸۲ افغانۍ یا ۱۲۰ ډالر له بشارالاسد څخه ترلاسه کوي.‌

د احمد په مستعار نامه یوه پخواني غړي وویل، «ایران د میاشتې ۲ میلیون څخه تر ۱۲ میلیون تومان قوماندانانو ته ورکوي.‌ ایران هغوی ته بانکي کارډونه صادر کړي، او د هغوی اجورې د هغوی اړوندو بانکي حسابونو ته لېږل کیږي.»

هغه وویل، ایرانی رژیم د فاطمیون لوا هغو جنګیالیو ته چې لږ تر لږه درې ځلې په سوریه کې جنګ ته تللي دي د دایمې استوګنې اسناد ورکوي.

احمد وویل، «هغه افغانان چې د فاطمیون د برخې په توګه جنګ کوي نه اخراج کیږي، او هغوی دا حق ترلاسه کوی چې په ایران کې کور، موټر او داسې نور واخلي.»

هغه زیاته کړه، خو اکثر غړي حتی روزنه هم نه ترلاسه کوي.

هغه وویل، «هغه [فاطمیون] له شاملولو څخه وروسته هیچاته هم روزنه نه ورکوي -- په سملاسي توګه یې جګړې ته لېږي.»

د اسد جنایتونه

په کابل کې د سیاسي چارو یوه شنونکي فضل من الله ممتاز وویل، د فاطمیون لوا غړي اوس د هغو وحشتونو لوری دی چې د سوریې د حکومت له خوا ترسره کیږي.‌

هغه وویل، «کله چې په ۱۳۹۰ کې عرب پسرلی پیل شو، د ایران رژیم مبارکۍ ور ولېږلې، خو کله چې عرب پسرلی سوریې ته ورسېد، ایران خپل نظامیان او د فاطمیون لوا جنګیالي سوریې ته ولېږل چې د سوریې د خلکو مخه ونیسي

ممتاز وویل، اسد «د لسګونو زره سوریایانو په وژلو سره فجیع جنایتونه ترسره کړل. ایرانیان او فاطمیون لوا د اسد د جنایتونو لوری تشکیلوي.»

هغه وویل،اوس،‌ چې د سوریې حکومتي ځواکونه په سوریه کې ځمکې لاندې کوي او د ایران له خوا حمایه کېدونکیو ملېشو ته لږه اړتیا لري ښایي تهران هڅه وکړي چې له فاطمیون څخه په افغانستان کې استفاده وکړي.

ممتاز وویل، «ایران له کالونو راهیسې د خپلو نایبو ډلو له لارې به افغانستان کې جنګ او مداخله کوي. هغوی د آرین بانکاو پیسو وینځلو له لارې ترهګرې ډلې حمایه کولې. اوس یوه کلتوري جنګ ته د ودې ورکولو لپاره په افغانستان کې په لسګونو رسنۍ تمویلوي.»

هغه وویل، «موږ ډاریږو چې یوه ورځ به هغوی د فاطمیون لوا جنګیالي افغانستان ته راولېږي او یوه بله کورنۍ جګړه به پیل کړي.»

په ډله ییزو قبرونو کې خښ شوي

ممتاز وویل، «پلټنې ښیي چې له ۲۰۰۰۰ څخه ډېر افغانان -- چې اکثر یې تنکي ځوانان دي -- د سوریې جنګ کې وژل شوي یا ټپي شوي دي.»

هغه زیاته کړه، «د هغوی یو شمېر په سوریه کې، او یو غټ شمېر یې په ایران کې په ډله ییزو قبرونو کې خښ شوی دي.»

په کابل پوهنتون کې د ټولنپوهنې یوه پروفیسر داود راوش د فاطمیون لوا د دغو غړو د کورنیو د پاتې غړو په هکله اندېښنه څرګنده کړه.‌

راوش وویل، «یوه د اندېښنې خبره چې د ټولنې لپاره ننګونې رامنځته کوي د فاطمیون د وژل شویو جنګیالیو کورنۍ دي.»

هغه زیاته کړه، «په سوریه کې جګړې په زرګونو افغانې کورنۍ بې سرپرسته یا بې برخلیکه پرېښي دي. ښایي چې ایران دغو کورنیو ته څو ورځې یو څه ورکړي خو هغوی به دا کار د اوږدې مودې په مخه ونه کړي.»

راوش د محرومو ښځو او ماشومانو فقر ته په پام سره وړاندوینه وکړه چې، «وروسته له هغه چې هغوی [د فاطمیون د وژل شویو غړو کورنۍ] افغانستان ته راستنې شي، هغوی به په ټولنه باندې بار جوړ شي. د هغوی مېرمنې او ماشومان به بېلابېل ډول جرمونه ترسره کړي او عامه نظم به مختل کړي.»