د چین له حکومتي لابراتوار څخه لیک د کووېډ-۱۹ په هکله پوښتنې راپورته کړي دي

بیجینګ -- د چینایي چاروکاو له خوا د هغو راپورونو تایید چې څنګه د یوې دولتي بایو فارماسیوټیکل دستګاه له لیک کید څخه وروسته د چین په شمال لویدیځ کې د یوې باکتریایي ناروغۍ پر وړاندې د زرګونو اوسیدونکیو لابراتواري پایلې مثبت راغلې، ددې هیواد له خوا د خوندیتوب د معیارونو او د کووېډ-۱۹ د منشأه په هکله نوې پوښتنې راپورته کوي.

په لانژو ښار کې روغتیایي چارواکو وویل چې ۳۲۴۵ کسان په بروسیلوسېز ناروغۍ اخته شوي دي. دغه ناروغي معمولا په ناروغۍ اخته حیواناتو یا حیواني تولیداتو سره له تماس څخه پیدا کیږي چې تبه، د مفصلونو درد او سر درد رامنځته کوي.

چینایي مقاماتو اعتراف وکړ چې د حکومت له خوا چلېدونکې بایوفارماسیوټیکل کارخانې د ۱۳۹۸ د چنګاښ او زمري تر منځ د حیواناتو لپاره د بروسیلوسیز واکسینونو په تولید کې تارېخ تېري عفونت ضد درمل کارولي وو. یعنې دغه فابریکه په دې کې پاتې راغلې وه چې باکتریا له منځه وېسي.

په لانژو کې د چین د حیواناتو د روزنځي له بایوفارماسیوټیکل کارخانې څخه راوتلي ککړ ګاز داسې هوایي ذرې چې باکتریاوې په کې وې جوړې کړې، او بادونو دغه ناروغي رامنځته کوونکې ذرې د لانژو د وترنرۍ تحقیقاتي انسټیټیوټ ته ورسولې، چې هلته یې تر تېرې لیندۍ میاشتې پورې شاوخوا ۲۰۰ کسان په ناروغۍ ککړ کړل.

د چین په لابراتوارونو کې غیرخوندي عملیې

دا لومړی ځل نه دی چې په چین کې په لابراتوارونو کې د خوندیتوب معیارونو د خلکو پام ور اړولی.

وروسته له هغه چې کووېډ-۱۹ په نړۍ کې خپور شو، د نړۍ حکومتونو د دغې مرګونې وبا د منشأګانو لپاره لټون پیل کړ. یادې وبا د دوشنبې تر ورځې /د وږي ۳۱مې/ پورې په ګرده نړۍ کې له ۳۰ میلیونو څخه ډېر خلک ککړ کړي او نږدې یو میلیون یې مړه کړي دي.

که څه هم چې اکثر شواهد د چین په وهان کې د خامې غوښې مارکېټ د کروناوایرس د خپرېدا د منشأ په توګه یادوي، لاکن د دغې مسئلې پلټنه اوس هم روانه ده -- او هغه چینایي مقامات چې هڅه کوي چین د دغې وبا د «اتل» په توګه مطرح کړي، د پلټنې پر وړاندې مزاحمت رامنځته کوي.

یوه نظریه دا ده چې کووېډ-۱۹ له داسې یوه لابراتوار څخه چې د حکومت له خوا تمویلېږي راوتلې ده.

د بهرنیو چارواکو هغه ګڼ خبرداري د دې نظریې د تقویه کولو لپاره مستند شواهد دي چې د چین په وهان کې یې د یوه تحقیقاتي لابراتوار په هکله ورکړي وو او ویلي یې وو په داسې حال کې چې دغه لابراتوار د ښاپېرک د کروناوایرس په هکله خطرناکې څېړنې کوي، د هغه خوندي کوونکي معیارونه کافي نه دي.

د کووېډ-۱۹ له خپرېدا څخه دوه کاله مخکې، د متحده ایالاتو د بهرنیو چارو د وزارت چارواکو د وهان د وایرولوجۍ انسټیټیوټ د خوندیتوب او مدیریت د کمزورتیا په هکله خبرداری ورکړ او د لا نورې پاملرنې او مرستې وړاندیز یې وکړ. چارواکو په ځانګړې توګه د «د ښاپېرک د کروناوایرس په هکله د لابراتوار د کار او انسانانو ته یې د احتمالي انتقال» په هکله اندېښنه وښودله، او ویې ویل چې هغه «د یوه نوي سارس [حاده تنفسي ناروغي] ډوله وبا خطر» رامنځته کولی شي.

له خبرداریو څخه په یوه کې داسې وضاحت شوی وو چې په دغه مرکز کې په مناسب ډول د روزل شویو ټکنېشنانو او څېړونکو څومره سخت کمی دی ترڅو دا په لوړه سویه کنټرول شوی لابراتوار په خوندي توګه وچلوي.

په ورته وخت کې، بیجینګ سخته هڅه کوي چې په نړۍ کې د کووېډ-۱۹ په هکله غلط معلومات خپاره کړياو څو ځلېد کروناوایرس ضد واکسین د تحقیق په غلا کولو باندې نیول شوی دی.