د فاطمیون پخوانی جنګیالی وایي چې ملېشې سوریایي ځوانانو ته دوکې ورکولې او خپلې ژمنې یې ماتولې

د سوریې د جګړې له امله د دیر الزور ښار د خرابېدلو او بالاخره له هېواد څخه تر وتلو وروسته، د فاطمیون لوا دغه ۲۵ کلن جنګیالي د خپلو ډېرو همزولو په څېر خپلې زده کړې بشپړې نه کړې.

خو وروسته له هغه چې د سوریې رژیم ځواکونو او متحدو ملېشو یې د سیمې کنټرول ترلاسه کړ، دغه ځوان، چې ځان یې د مصطفی اللهیب په مستعار نامه معرفي کړ، فکر وکړ چې هغه د کار او ثبات ترلاسه کولو فرصت لري.‌

هغه المشارق ته وویل، «رژیم هغو سیمو ته چې د دیرالزور او البو کمال خلک په کې اوسېدل استازي ولېږل څو هغوی وهڅوي چې په خپله خوښه ستانه شي.»

هغه وویل، «هغوی ژمنه وکړه چې امنیتي ځواکونه به نور هغوی ونه ځوروي او نه به یې جبري عسکري خدمت ترسره کولو ته مجبور کړي.»

هغه وویل، استازو ژمنه وکړه چې سوریایي ځوانانو ته به وظیفې ورکړي، او زیاته یې کړه چې دا یواځې تشې وعدې وې، ځکه چې ځوانان له ستنېدلو څخه وروسته اوس هم د رژیم د امنیتي ځواکونو له خوا تعقیب کیږي چې عسکري خدمت ترسره کړي.

اللهیب وویل، تقریبا په عین وخت کې له سپاه پاسداران سره تړلیو ملېشو ځوانانو ته مخه کړه او ترې ویې غوښتل چې له هغوی سره ملګري شي او د لوړو تنخواګانو او له رژیم څخه د خوندي کولو ژمنې یې ورسره وکړې.

د ملېشې په منځ کې درزونه

هغه وویل، «زه، د ډېرو نورو ځوانانو په څېر، تقریبا یو نیم کال مخکې له فاطمیون ملېشې سره ملګری شوم، او فکر مې کاوه چې زه به خپل کاري ساعتونه د دیر الزور په سیمه کې تېروم او له خپلې کورنۍ ته به نږدې یم.»

اللهیب وویل، که څه هم چې فاطمیون لوا ژمنه کړې وه چې د ملېشې سوریایي غړي به د هغوی له استوګنځیو سره نږدې پوستو کې په کار ګوماري، «موږ د بادیې (ختیځې دښتې) بېلابېلو سیمو ته ولېږل شوو.»

هغه زیاته کړه، «زموږ پوستې له خطرناکو سرکونو سره نږدې وې چې د تېلو په څېر کارګو وړونکو کاروانونو به ترې استفاده کوله، او وخت په وخت به ترهګرو پرې بریدونه کول، چې موږ یې له خطر سره مخامخ کړي وو او مرګ ژوبله به راته پېښېدله.»

هغه ژر درک کړه چې په فاطمیون لوا کې سوریایانو ته د درېیمې درجې عناصرو په سترګه کتل کیږي په داسې حال کې چې د ملېشې په لیکو کې له لبنانیانو او افغانانو سره د لومړۍ او دویمې درجې عناصرو په توګه چلند کیږي.‌

سربېره پر دې، هغه پوه شو چې د ملېشې سوریایي غړي هغو سیمو ته له ورننوتلو څخه منع شوي ول چې د فاطمیون لوا له خوا کنټرول او خوندي کېدله، او هلته یواځې لبناني او افغان عناصرو ته د ننوتلو اجازه وه.

هغه وویل، هغه مذهبي مراسم چې د افغان عناصرو له خوا ترسره کېدل د سوریایي عناصرو لپاره کاملا ممنوع ول، او یادونه یې وکړه چې دا او نور توپیري چلندونه په ملېشه کې دننه د درزونو سبب شول.

اللهیب وویل چې په ملېشه کې د منل کېدلو د یوه مخکې شرط په توګه، هغه او د هغه کورنۍ مجبور کړای شول څو داسې کلتوري او مذهبي کورسونه واخلي چې اجباري او فرقه ایز ماهیت یې درلود.

هغه وویل، د هغه ماشومان مجبور کړای شول چې د پېشاهنګۍ او مذهبي کورسونه واخلي، او یادونه یې وکړه چې د دغه ډول مذهبي او کلتوري تلقین له لارې، «د دیر الزور خلکو څخه حقازي کیدله تر څو خپل مذهب بدل کړي.»

هغه وویل، کوچنیانو او ځوانانو ته په ځانګړې توګه د فاطمیون او ولایت فقیقه نظریات ورکول کیږي او دغه نظریات د ایران لارښود علي خامنه اي سره د بیعت غوښتنه کوي.

په دیر الزور کې د سپاه پاسداران نفوذ

اللهیب وویل، که څه هم چې د تلاشۍ په ډېرو پوستو کې د سوریې بیرغ او د ولسمشر بشار الاسد عسکونه لګېدلي، لاکن د دیر الزور سیمه د سوریې رژیم له خوا هېڅ نه کنټرولېږي.

هغه وویل، د هغه پر ځای دغه سیمه د سپاه پاسداران له خوا کنټرولیږي، او د سوریې رژیم د تلاشۍ د ځینو پوستو موجودیت «د دغو ملېشو د حضور لپاره له یوه پوښ پرته بل هېڅ شی نه دی».‌

هغه وویل، د هغه د استخدام پر وخت، فاطمیون لوا هغه ته وویل چې هغه به د میاشتې ۱۵۰ ډالر، خواړه او طبي خدمتونه ترلاسه کوي، لاکن هغه وویل چې هغه یواځې ۴۰ ډالر ترلاسه کړل او داسې وختونه هم راغلل چې تر درې میاشتو پورې یې دا هم ترلاسه نه کړل.

هغه زیاته کړه، خواړه یواځې درې میاشتې وروسته یا په مذهبي مناسبتونو کې توزیع کېدل،‌ او شرط یې دا وو چې ترلاسه کوونکي په مذهبي مراسمو کې برخه واخلي.‌

اللهیب وویل، کله چې هغه د فاطمیون لوا د ژمنو په دروغو پوره پوه شو، د یوه ځایي قومي کس د نفوذ په اساس یې د مرستې غوښتنه وکړه چې هغه د ده د استعفی او بالاخره له ملېشې څخه د وتلو لپاره واسطه شو.