حزب الله افغان جنګیالیو ته په سوریه کې د بې پیلوټه الوتکو د کارولو روزنه ورکوي

کتونکي وایي، د لبنان د حزب الله کارپوهان له پالمیرا سره نږدې د سوریې په بادیه (ختیځه دښته) کې له افغانانو څخه د تشکیل شوې فاطمیون ملېشې غړو ته د بې پیلوټه الوتکو د کارولو روزنه ورکوي.

د رسنیو فعال عمار صالح وویل، د حزب الله کارپوهان له پالمیرا سره نږدې په الطلیله ساحه کې موجود ول چې د فاطمیون لوا غړو ته یې روزنه ورکوله او هغوی ته د بې پیلوټه الوتکو په هکله له تدریس څخه وروسته یې مشقونه ترسره کول.

هغه وویل، دغو کسانو په هغو پټنځایونو کې چې پخوا داعش جوړ کړي وو او کار یې ترې اخیست، د حزب الله منسوبینو ته د الوتکو د مراقبت روزنه ورکوله.

صالح وویل، په بادیه سیمه کې له دغې ساحې څخه چې تمرینونه په کې کېدل په مکمل ډول د ممانعت پټۍ تاو شوې وه،‌ او سوریایي عناصرو ته اجازه نه ورکول کېدله چې دننه ور ننوځي.

په دې روزنه کې د فاطمیون غړو ته په دې هکله ښوونه شامله وه چې څنګه له ابابیل – ۳ او د یوه نامعلوم موډل له کوچنۍ الوتکې څخه کار واخلي.

صالح وویل، په بادیه سیمه کې د ایران تر ملاتړ لاندې ملېشو ته په منظمه توګه روزنه ورکول کیږي، چې له امله یې مالداران او شپانه له ډاره تېښتې ته اړ شوي دي.‌

هغه یادونه وکړه چې، دغه ډار او فشار د سیمې چې له تاریخي پلوه بېلابېل قومونه په کې اوسېدل، د ټولنې او د اوسېدونکیو خلکو د شمېر حالت بدل کړی دی.

حزب الله او فاطمیون خپل حضور پراخوي

د شییار تورکو په نامه یوه شنونکي چې له سپاه پاسداران سره تړلیو ملېشو باندې تمرکز کوي، وویل، د حزب الله او فاطمیون ملېشې تر منځ اړیکې ډېرې نږدې دی.

هغه وویل، «دغه ګوند پخوا کارپوهان راوستي وو چې د فاطمیون عناصرو ته د سنایپر کارولو، د توپونو چلولو او د ځانګړیو ځواکونو د چمتو کولو په هکله روزنه ورکړي.»

هغه وویل، د حزب الله او فاطمیون تر منځ همکاري په ۱۳۹۵ کې هغه وخت پیل شوه چې په سوریه کې په لومړي ځل د افغان ملېشې حضور معلوم شو.

نوموړي وویل، «هغه ځانګړی کنټرول چې دا دوه ډلې یې په بادیه باندې لري د سپاه پاسداران د نورو پلوي ملېشو، په ځانګړې توګه سوریایانو د ممانعت په هکله پوښتنې راپورته کوي.»

تورکو وویل، په پالمیرا کې د حزب الله نفوذ د روسي ځواکونو وتلو ته په پام سره ډېر پراخ شوی دی. اوس حزب الله او فاطمیون په ټوله سیمه باندې کنټرول لري، خپلې د استخدام هڅې یې پراخې کړي، او په لسګونو د وسلو زېرمې او تر ځمکې لاندې پټنځایونه لري.

هغه زیاته کړه، حزب الله په بادیه سیمه کې د وسلو ډېر غټ ډیپوګان لري، چې ډېر شمېر توغندي او د راکټونو او نورو وسلو د تولید وسایل په کې ځای پرځای شوي دي.

سوریایي قانون پوه بشیر البسام په سوریه کې سپاه پاسداران پورې د تړلیو ملېشو له خوا د بې پیلوټه الوتکو استعمال وننګاوه، او زیاته یې کړه چې دا کار «سوریه او سوریایان له یوه لا ډېر سخت حالت سره مخامخ کوي.»

هغه وویل، «پوښتنه دا ده چې، ولې دا ملېشه ګروپونه په بې پیلوټه الوتکو باندې سمبال کړای شي؟»

البسام وویل، د ایران رژیم د خپلو ملېشو حضور او د هغه له خوا د بې پیلوټه الوتکو توظیف په سوریه کې په ځمکه د ادعا شویو ترهګریزو ګواښونو په استناد سره توجیه کوي، لاکن دا یوه غلطه بهانه ده، ځکه چې په میدان کې هېڅ ترهګریز ګواښونه نشته.‌

هغه وویل، په حقیقت کې، د ایران کارونه به سوریه له لا نورو نړۍ والو بندیزونو سره مخامخ کړي، ځکه چې په دغه هېواد کې د سپاه پاسداران حضور او د هغه له خوا د بې پیلوټه الوتکو استعمال ترینګلتیاوې رامنځته کوي.

په سوریه کې د حزب الله کارونه د ایران تر ملاتړ لاندې حوثیانو د هغو بریدونو یاد تازه کوي چې د ایراني توغندیو او بې پیلوټه الوتکو په کارولو سره یې په سعودي عربستان او متحده عرب اماراتو باندې ترسره کړل.‌