په سوریه کې د امریکا په برید کې د داعش له خوا په اروپا د بریدونو پلانوونکی ووژل شو

د متحده ایالاتو اردو د دوشنبې په ورځ /د وري ۱۴مه/ په سوریه کې یو «مستقل برید» ترسره کړ چې د داعش یو جګپوړی مشر یې، چې په اروپا کې د یادې ډلې د بریدونو د پلانولو مسؤلیت یې پرغاړه درلود، وواژه.

د امریکا د پوځ مرکزي قوماندانۍ (سینټکام) وویل، چې برید د دوشنبې په ورځ د سوریې په شمال لویدیځ کې د داعش ډلې یو جګپوړی مشر خالد عید احمد الجبوري وواژه.‌

په خبرپاڼه کې ویل شوي، الجبوري «په اروپا کې د داعش د بریدونو د پلانولو مسؤلیت پرغاړه درلود.»

خبرپاڼې زیاته کړه، «هغه د داعش لپاره د مشرتابه جوړښت هم رامینځته کړی و او یادونه یې وکړه چې د هغه مرګ به د لنډې مودې لپاره د دغې ډلې دا وړتیا چې په بهر کې بریدونه ترسره کړي، ټکنۍ کړي.»

په خبرپاڼه کې د برید دقیق ځای نه دی په ډاګه شوی.

د سوریې د بشري حقونو د څار ډله وايي، الجبوري د ادلیب په شمال لوېدیځ ولایت کې وژل شوی چې تر ډېره د اپوزیسیون او افراطي ډلو تر کنټرول لاندې دی.

ویل کیږي، چې هغه د بې پیلوټه الوتکې په برید کې هغه وخت ووژل شو چې په ټیلیفون یې خبرې کولې، او له خپل استوګنځي سره نږدې په ازاده فضا کې یې قدم واهه.

د څارونکیو په وینا، الجبوري چې ځان یې د سوریایي په توګه څرګنداوه، شاوخوا دوه اونۍ وړاندې په دې سیمه کې ځای نیولی و.

امریکایي ځواکونو د سوریې دیموکراتیک ځواکونو (اېس ډي اېف) په ګډون، له ملګرو ځواکونو سره یوځای په وروستیو کلونو کې په سوریه کې د داعش د مشرانو په نښه کولو یو لړ عملیات ترسره کړي دي.

یو دوامدار ګواښ

وروستی برید په داسې حال کې شوی چې لا هم په سوریه کې د داعش بریدونه د خلکو ژوند اخلي.

څارونکې ادارې ویلي چې د ۱۴۰۱ له مرغومې میاشتې راهیسې یې د سوریې په هغو سیمو کې چې د کردانو د خودمختاره ادارې تر کنټرول لاندې دي، د بریدونو او چاودنو په ګډون د داعش ۴۶ عملیات مستند کړي دي.

په خبرپاڼه کې ویل شوي، چې په دې بریدونو کې د پنځو ملکي وګړو په ګډون ۳۳ کسان وژل شوي دي.

د سوریې په ختیځه دښته (بادیه) کې، داعش د تورو ترافلو په راټولونکو باندې وحشیانه بریدونو ته دوام ورکړی چې په دې فصل کې تر اوسه له ۱۵۰ څخه زیات کسان وژل شوي دي.

څارونکي ادارې وویل، د ځینو غاړې پرې کړای شوي، په داسې حال کې چې نور تښتول شوي او بیا وژل شوي دي. د څلورو کسانو جسدونه په دې اونۍ کې موندل شوي دي.

له پولې پورې غاړه په عراق کې، د عراق پوځ د کب په میاشت کې د هیواد په لویدیځ او ختیځ کې د داعش پر څو پټنځایونو باندې بریدونه وکړل، چې د بهرنیو جنګیالیو او د دې ډلې د مشرانو په ګډون یو زیات شمیر افراطیان یې ووژل.

عراقي چارواکو او نورو سرچینو وویل چې داعش کمزوری شوی او د پیسو له کمښت سره مخامخ دی، خو بیا هم په خپله لکۍ کې نېش لري، ځکه دا توان لري چې ملکي وګړو ته زیان ورسوي.

د مرکزي قوماندانۍ قوماندان جنرال مایکل ایریک کوریلا په یوه اعلامیه کې وویل، «داعش لا هم د سیمې او له سیمې څخه بهر یو ګواښ دی.»

کوریلا وویل، «که څه هم چې دا ډله له مینځه وړل شوې، لاکن بیا هم د دې توان لري چې په سیمه کې عملیات ترسره کړي او داسې هیله لري چې له منځني ختیځ څخه بهر برید وکړي.»

داعش په وروستیو کلونو کې، د هغه برید په ګډون چې د ۱۳۹۴ د لړم په میاشت کې په پاریس او د هغه په لمنو کې وشو او یو بل چې د ۱۳۹۵ د چنګاښ په میاشت کې د فرانسې په نیس ښار کې وشو، په اروپا کې د یو شمېر وژونکو بریدونو مسؤلیت اخیستی و چې ۱۳۰ کسان په کې ووژل شول.

په همدغه کال، په بلجیم کې درېیو ځانمرګو بریدونو تر ۳۰ ډېر کسان ووژل.

د ۱۳۹۶ د زمري په میاشت کې، په بارسیلونا او د هسپانیا په نورو ځایونو کې شویو بریدونو کې چې داعش یې مسؤلیت ومانه، ۱۶ کسان ووژل شول.