د القاعدې نفوذد ۲۰۰۰مې لسیزې په پیل کې له خپل اوج څخه په څرګند ډول راکم شوی، چې دې چارې د دې ډلې د اړوندو څانګو په منځ کې د عملیاتي ستراتیژۍ بدلون ته لاره هواره کړې ده.
د یوې نوې څېړنې له مخې، د القاعدې مرکزي هسته اوس یوازې محدود شمېر کسانو ته رسېږي، او شبکه یې په غیرمتمرکز ډول په افریقا او منځني ختیځ کې تیت او پرک ده، چې دا چاره د لویو بریدونو د ترسره کولو وړتیا محدودوي.
دغه د قوماندې او کنټرول له لاسه ورکول د القاعدې وړتیا محدودوي چې د سپتمبر د ۱۱مې په څیر پیچلي او همغږي بریدونه پلان کړي، کوم چې پراخو سرچینو ته اړتیا لري.
له همدې امله، دا ډله په لویه کچه د انلاین تبلیغاتو له لارې «بې مشرتابه جهاد» او انفرادي بریدونه ترویجوي، څو خلک له مستقیمې لارښوونې پرته خپلواک اقدام ته وهڅوي.
غیر متمرکز ګواښونه
چولو عبدي عبدالله، چې د کینیا وګړی او په القاعده پورې د تړلې ترهګرې ډلې الشباب غړی دی، پر دوو پرله پسې عمري بندونو محکوم شوی.
هغه د فدرالي منصفه پلاوي له خوا، چې خپله محاکمه یې د ۲۰۲۴ کال د نومبر په ۴مه پای ته ورسوله، د امریکا په خاوره کې د سپټمبر د ۱۱مې په څېر د ترهګریز برید د ترسره کولو د توطیې په جرم تورن شوی دی.
دا حکم د ۲۰۲۵ کال د ډسمبر په ۲۲مه د نیویارک د سویلي فدرالي ناحیې د یوې محکمې قاضي صادر کړ.
عبدالله په شپږو فدرالي تورونو مجرم وپېژندل شو، چې پکې یوې بهرنۍ ترهګرې ډلې ته د مادي ملاتړ د برابرولو توطیه او له هېواده بهر د امریکایانو د وژلو توطیه شامله ده.
نوموړی همدارنګه د الوتکې د تښتولو، د الوتکې د نسکورولو، او له ملي پولو د باندې د ترهګریزو کړنو د ترسره کولو په توطیو هم محکوم شو.
د ترهګرۍ لپاره عمري بند
د امریکا د عدلیې وزارت په یوه بیان کې ویلي، «نن عدالت ترسره شو،» دا څرګندونې د ملي امنیت لپاره د لوی څارنوال مرستیال، جان اې. آیزنبرګ، له قوله را اخیستل شوې دي.
هغه زیاته کړه، «عبدالله، چې د الشباب یو ترهګر دی،هڅه کوله زموږ د تاریخ تر ټولو وحشتناک ترهګریز برید بیا تکرار کړي؛ هغه مهال چې د یوې مسافر وړونکې الوتکې د تښتولو او د امریکا په خاوره کې د یوې ودانۍ د په نښه کولو لپاره یې ځان چمتو کاوه.»
نوموړي ټینګار وکړ، «د هغه د عمري بند حکم یو پیاوړی پیغام دی چې هر څوک د امریکا پر وړاندې د برید پلان جوړ کړي، تر ټولو سخته قانوني سزا به وویني.»
د متحده ایالاتو څارنوال، جې کلیټن، وویل، «عبدالله د الشباب یو ډېر ښه روزل شوی عامل و، چې د یوې بې رحمې ترهګرې ډلې په استازیتوب یې د سپټمبر د ۱۱مې د وحشتناکو بریدونو د بیا ترسره کولو هوډ درلود.»
هغه زیاته کړه، «عبدالله وروسته اېف بي آی ته اعتراف وکړ چې د خپل ترهګریز برید پر مهال د مرګ لپاره بشپړ چمتو و»، او په دې توګه یې د خپلو پلانونو په واسطه رامنځ ته شوی خطر روښانه کړ.
د هغه نیول کېدو، اعترافونو او استخباراتي مالوماتو ته لاره هواره کړه، چې اېف بي آی ترې د راتلونکو ترهګریزو بریدونو د مخنیوي لپاره ګټه واخیسته.
