طالبانو له افغان حکومت سره د سولې د خبرو لپاره مشروط مهالوېش وړاندې کړ

کابل -- یاغیانو د پنجشنبې په ورځ /د زمري ۲مه/ وویل، طالبان چمتو دي چې روانه میاشت له لوی اختر څخه وروسته له افغان حکومت سره د سولې خبرې ترسره کړي، په دې شرط چې دواړه لوري د بندیانو تبادله بشپړه کړي.

د جنګي لوریو تر منځ د مذاکراتو د پیلولو لپاره د کب د ۲۰مې نېټې له ترک کولو څخه وروسته، دغه مشروط وړاندیز لومړی ځل دی چې له لارې یې یو لوری د خبرو لپاره مهالوېش په ګوته کوي.‌

دغه پرمختګ د هېواد په بېلابېلو برخو کې د تاوتریخوالي د ډېرېدلو په ترڅ‌ کې رامنځته شو.‌

د طالبانو سیاسي ویاند سهیل شاهین په ټوېټر لیکلي دي، طالبان «احتمالا... تیار دي چې له اختر څخه وروسته سمدلاسه بین الافغاني مذاکرات پیل کړي، په دې شرط چې د بندیانو د تبادلې پروسه بشپړه شي.»

هغه زیاته کړه، که کابل ټول یاغي بندیان مقاماتو ته «د سپارل شوي لست په اساس» خوشې کړي، طالبان چمتو دي چې د افغان امنیتي ځواک پاتې بندیان چې له هغوی سره دي، خوشې کړي.

د بندیانو د تبادلې مسئله،‌ چې د متحده ایالاتو او طالبانو تر منځ تر یوې هوکړې لاندې پرې توافق شوی دی، د سولې د خبرو له پيلېدلو څخه مخکې یو غټ خنډ ثابت شوی دی.

افغان حکومت باید ۵۰۰۰ تنه طالب جنګیالي خوشې کړي، په داسې حال کې چې یاغیانو ژمنه کړې چې له هغوی سره بندي ۱۰۰۰ تنه افغان امنیتي منسوبین به خوشې کړي.

تر اوسه پورې، کابل شاوخوا ۴۴۰۰ طالب بندیان خوشې کړي دي. اورپکي وایي چې هغوی ۸۶۴ حکومتي بندیان ازاد کړي دي.‌

د افغانستان د ملي امنیت د شورا ویاند جاوېد فیصل وویل، یو شمېر خوشې شوي طالب بندیان خطرناک جنګیالي ول چې سمدلاسه د جنګ میدان ته ستانه شول.

هغه په ټوېټر ولیکل، «طالبان ... باید په خپلو ژمنو باندې ودرېږي او ازاد شوي بندیان تاوتریخوالي ته له مخې کولو څخه ایسار کړي.»

هغه د شاهین له ټوېټ څخه لږ وروسته وویل، «تاوتریخوالی ودروئ؛ ژر تر ژره بین الافغاني خبرو ته چمتو شئ.»

تاوتریخوالي ته دوام ورکول

د بندیانو د تبادلې په برخه کې د پرمختګ په ترڅ کې، د افغانستان په بېلابېلو برخو کې د تاوتریخوالي سطحه لوړه شوې، چې په کې طالبان تقریبا هره ورځ د امنیتي ځواکونو پر ضد بریدونه ترسره کوي.

د دفاع وزارت وویل، په ننګرهار ولایت کې د چارشنبې په ورځ /د زمري ۱/ په یوه پېښه کې، لږ تر لږه ۳۱ تنه طالب جنګیالي له امنیتي ځواکونو سره په نښتو کې ووژل شول.

په افغانستان کې د ملګرو ملتونو مرستندوی ماموریت (یوناما) په یو لړ ټویټونو کې «د تاوتریخوالي د تدریجي ډېرښت» په هکله خبرداری ورکړ، او د یادې ادارې مشرې ډیبورا لیونس د اختر په مناسبت د اوربند غوښتنه وکړه.

د غوایي په میاشت کې د روژې په پای کې د کوچني اختر په مناسبت،‌ طالبانو درې ورځې اوربند اعلان کړ چې هغه یې په روانه جګړه کې دویم ځل رسمي اوربند وو.