په انځورونو کې:‌ افغانان د داعش د بریدونو له ګواښ سره سره د رمضان میاشتې عبادتونه ترسره کوي

هرات -- په جوماتونو او نورو عبادت ځایونو باندې د داعش د بریدونو له امله د اندیښنې له زیاتېدلو سره سره، افغانان ماخستن مهال د تراویح لمونځ ته په تللو سره د رمضان لمانځلو ته دوام ورکوي.‌

د هغوی له جملې څخه ډېرو د داعش له خوا ترسره شوي وروستي بریدونه غندلي او پر دې اړتیا یې ټینګار کړی چې د یادې ترهګرې ډلې پر ضد یووالي رامنځته شي.‌

د هرات اوسېدونکي وایي چې په جوماتونو او ښوونځیو باندې د داعش بریدونه ښيي چې دغه ترهګره ډله د اسلامي اساساتو او افغاني ارزښتونو پر خلاف فعالیت کوي او د افغانانو د قتل عام لپاره له بهرنیانو څخه اوامر ترلاسه کوي.‌

په هرات ښار کې یوه دیني عالم مولوي سید احمد محمدي وویل، داعش د اسلام او بشریت دښمن دی.

هغه وویل، «په داسې حال کې چې خلک روژه نیسي او عبادت کوي، داعش په ظالمانه توګه د الله په کور کې بې ګناه مسلمانان په ډله ییزه توګه وژني.‌»

هغه زیاته کړه، «فرق نه کوي چې داعش څومره سخته هڅه کوي چې افغانان سره ووېشي او ووېروي، لاکن افغانان سره یو لاس دي او د دغه ګوډاګي او ترهګر ګروپ د ماتولو لپاره به سره متحد ودرېږي.»

د روژې میاشتې نور فعالیتونه لکه روزه ماتی چې د روژې په میاشت کې د جوماتونو له خوا برابرېږي، بې وقفې روان دی.‌

د بې وزلۍ په زیاتېدلو سره، مرستندویو موسساتو، تجارانو او ځینو خصوصي مرستندویانو د خوړو او نغدو پیسو په بڼه خپل کومکونه زیات کړي څو له بې وزلو افغانانو سره مرسته وکړي چې روژه ونیسي او د روژې په ترڅ کې په ارام ذهن سره عبادت ترسره کړي.‌

له ۶۰۰۰ څخه ډېرو کورنیو سره مرسته

احمد شاه فقیري ټولنیز او خیریه بنسټ چې په هرات کې د خیریه موسساتو له ډلې څخه دی، د روژې په ترڅ کې له ۶۰۰۰ څخه ډېرو کورنیو ته مرستې برابرې کړي دي.‌

دغې خیریه ادارې تر ډېره غریبو ښځو او د پخواني حکومت د امنیتي ځواکونو د وژل شویو غړو له کورنیو سره مرسته کړې ده.

د دغه بنسټ اجرائیه رییس میر احمد بهره وویل، «د دغو کم وسه کورنیو د لاسنیوي په لړ کې د یوه افغان سوداګر په شخصي مرسته د وریژو، اوړو او غوړیو په ګډون په سلګونو ټنه خوراکي توکي پېرودل شوي دي.»

هغه وویل، «دا بې وزلې کورنۍ وار له مخه د دغه بنسټ تر دایمي پوښښ لاندې وې، خو د روژې په ترڅ کې موږ هغوی ته لا نورې مرستې هم برابرې کړې.»

ګل بي بي چې ۴۱ کاله عمر لري، د څلورو ماشومانو مور ده او مېړه یې څلور کاله مخکې وژل شوی دی، وویل چې هغه مرسته چې هغې له دغه بنسټ څخه ترلاسه کړې ده به تر درې میاشتو پورې د هغې د کورنۍ اړتیاوې پوره کړي.‌

هغې وویل، «دې مرستې د روژې په ترڅ کې له لوږې سره دمخامخ کېدلو په هکله زما اندېښنې رفع کړې.‌ دې مرستې چې سوداګرو او خصوصي مرستندویانو کړې د ډېرو کم وسه افغانانو ژوند ژغورلی دی.»