د داعش له خوا د استخدام تازه هڅو په افغانستان کې اندېښنې راپورته کړي دي

| 04-14-2022

په افغانستان کې اوسمهال داعش دومره قوي ډله نه ده او نه ترې وېره کېدای شي، لکه څومره چې رسنۍ دې موضوع ته هوا ورکوي. سمه ده چې د ننګرهار په ګډون په یو شمېر نورو ولایتونو کې به د داعش ډلې غړي وي، خو فکر نه کوم چې دوی دې په اوس وخت کې پرمختګ وکړی شي. ځکه خلک جنګ نه غواړي. په هېواد کې چې څومره ځوانان هم دي که کار لري او که وزګار دي، خو ډېره برخه یې په دې نظر دي چې نور باید جګړه ونه شي. وايي واک دې طالب سره وي خو جنګ وطن ورانوي. دا چې په هرات، کابل، کندهار او ځیني نورو ولایتونو کې په دې وروستیو کې څو چاودنې او بریدونه وشول پوره باور لرم چې داعش یې نه شي کولی. دا د پردیو استخبارات دي چې د جمهوریت پر وخت یې هم بریدونه کول او هم یې اوس کوي. د سیمې د هېوادونو په ګډون هېڅ یو هېواد نه غواړي چې افغانستان دې امن اوسي. بس یوازې دېته تکړه دي چې رسنیو کې له افغانانو سره خواخوږي وښيي. نور خپلې ګټې سنجوي چې څه ډول یې لاسته ګټه ورتله هغسې کارونه کوي او هماغه پروژې پلې کوي. دا هم منم چې دلته به اوس د داعش د استخدام کمپاین روان وي، خو په دې هم پوهېږم چې ډېر کم خلک ورته زړه ښه کوي چې ورسره یو ځای شي. هو په یو صورت کې به داعش ته زیات خلک جذب شي چې طالب په خپله پالېسي کې بدلون رانوړي. تر اوسه هم خلک دومره تنګ نه دي، خو که طالبان همداسې په متواتر ډول د خلکو په شخصي ژوند کې کار ولري (ږیره پرېږده، وېښته داسې کړه او هغسې کړه، لمونځ داسې وکړه او هغسې، چادري واغونده حجاب نه ...) او د کارو بار غم یې ونه خوري په زیات شمېر کسان به ورته جذب شي. کنه تر اوسه ټول خلک په دې باور دي چې باید جګړه ودرېږي. خلک ونه وژل شي. هېواد وران نه شي. طالبان باید ولسي ملاتړ خپل کړي، کنه بیا به طالب هم په خپلو کړو پښېمانه وي.

| 04-14-2022

بلکل تاسو ښو ټکو ته اشاره کړې. مګر داعش که نن وي که سبا په زیاتېدو دي. جلب او جذب به یې څنګه نه چټک کېږي چې میلیونونه کسان دې بې روزګاره وي. چې کار نه وي ډوډۍ نشته. د ناروغ درملنه نشته. تعلیم نشته. امنیت خو حتمي ده چې ورسره خرابېږي. نو زه وایم هغه خلک چې نور څوک یې هم په خپلو هېوادونو کې په اسانۍ نه پرېږدي او په خپل وطن کې هم کار ونه لري، نو ماران خو هم نه دي چې خاورې به خوري. د افغانستان نویو واکمنانو ته په کار ده چې اول د خپلو خلکو مشروعیت ترلاسه کړي. بیا د نړیوالو. کنه لوی درد سر به ورته جوړ شي. چې درمل به یې د حکومت له ړنګېدو بل څه نه وي. او که دا ځل د طالبانو حکومت ړنګېږي، بل څوک به نه وي، غیر له همدې بې روزګاره ځوانانو ځکه مجبور دي. چې کار نه وي ذهنونه ګډوډ وي او د ورانۍ غیر بل څه ذهن کې نه راګرځي.

ځواب ورکړئ

| 04-13-2022

څلورمه برخه: درنو مشرانو! ستاسې د قدرت اته میاشتي پوره کیږي. په داسې حال کې چې د افغانستان د خاورې په سلو کې سل مو هم تر کنټرول لاندې ده، خو تر اوسه پورې نه کوم کُفري او نه اسلامي هیواد، حتی پاکستان، په رسمیت پېژندلي یاست. نن ورځ نړۍ د یوه لوی کور حیثیت لري. په دونه لوی کور کې څوک یوازې ژوند نه شي کولای. یوازې افغانستان او اسلامي امارت د ټولې نړۍ څخه ګوښه او تجرید دی. دا د افغانستان بین المللي حیثیت ته سپکاوی دی او چاره یې یوازي تاسې کولای شئ. د اسلامي اِمارت د بهرنیو چارو وزیر ښاغلي متقي یوه ورځ وویل چې نړۍ زموږ څخه څه غواړي؟ موږ څه باید وکړو چې نړۍ مو په رسمیت وپيژني؟ زه ګومان کوم چي دا سوال باید پخپله ستاسې او پخپله له متقی صاحب څخه وشي. تاسې په نړۍ کې بل داسې هیواد پېژنئ چې په دنیا کې یې هېڅوک په رسمیت نه پيژني؟ د دې علت تر بل هر چا تاسې ته پخپله معلومیږي. درنو مشرانو په دې هم پوهېږم چي زما دا پرانیستی لیک، که احیاناً تر تاسې ورسېږي، هیڅ اغېزه نه لري، خو ما خپلې غاړې خلاصې او وجداني مسوولیت مي سپک کړ. یو ځل بیا هم درته وایم چي د ولسونو نارضایت ستاسې د سقوط او پر هیواد باندې د یوې بلې فاجعې د نازلېدلو پیلامه ده. په خپل قدرت مه مغرورېږئ. دا یوازې ستاسې کمال نه وو چي تاسې د هیواد چارې په لاس کې واخیستلې او نن ورځ په ټول هیواد کې داسې غښتلی سیاسي رقیب نه لرئ چې له هغه څخه ووېرېږئ. دا د مخکني رژیم منتهی فساد او له هغه څخه د خلکو شل کلن نارضاییت وو چي ستاسي بري ته یې لاره هواره کړه؛ او اوس هغه نارضایت ستاسې څخه هم موجود او پرله پسې مخ پر زیاتېدلو دی. د خلکو نارضایت، عامه لوږه او بېکاري او له ټولې نړۍ څخه ستاسې سیاسې تجرید ستاسې د سقوط او کندې ته د لوېدلو پیل دی.

| 04-13-2022

درېیمه برخه: د دې پرځای چې د هیواد بې ساري اقتصادي ستونزو حلولو او یوې لارې پیدا کولو ته توجه وکړئ، خپله توجه مو د محتسبینو ادارې ته متمرکزه کړئ او هغوی پرته د خلکو له آزارولو څخه بل کار نه لري. موږ هره ورځ په ټولنیزو رسنیو کې د افغانستان د خلکو د لوږې، بېکارۍ او ګدايي ګرۍ ويډیوګاني ګورو. موږ هره ورځ وینو چې د هېواد ځوانان د ایراني او پاکستاني مقاماتو له ټولو سپکاویو سره سره بیا هم هغو هیوادونو ته تښتي. تاسې دې مهمي حیاتي مسئلې ته د توجه کولو پر ځای خپل ټول قوت د رباب ماتولو او د موسیقۍ د هنرمندانو وژلو ته متوجه کړی دی. د سړک پر غاړه طالب یا د امر بالمعروف نفر ولاړ وي او د موټروان تر زنې لاس لاندې کوي او وايي که ږیره پرېږدې څومره به ښه ښکارې. دا د انسان پر شخصیت باندي تېری دی. دا چې هغه موټروان له ویرې څه نه شي ویلای دا بېله خبره ده. تاسې د نجونو پر مخ د مکتبونو دراوزې تړلي دي، پوهنتونونه مو رخصت کړي دي او بیا د ترقۍ نارې وهئ. په جهان کي داسي بل کوم اسلامي هیواد هم شته چې د نجونو ښوونځي ونه لري؟ او د نجونو له ښونځیو پرته ترقي او حتی د هیواد ژوندي پاته کېدل ممکن دي؟ پر سړکونو باندي د ځوانانو وېښتان قیچي کوئ او د خلکو په مخ کي یې توهینوئ. دا نه یوازي پر انساني کرامت باندې تېری دی، بلکې د حق متعال پر حدودو باندې هم ښکاره تجاوز دی. تاسې ځانونه د اسلام د دین علمبرداران بولئ؛ مګر دا راته ویلای شئ چې تاسې ته کوم کتاب د مسلمان ولس د دغه راز توهینولو او له هغوی سره د دغه راز سلوک کولو اجازه درکړې ده؟

| 04-13-2022

دویمه برخه: له بده مرغه چې شپږویشت کاله وروسته تاریخ په یوه بل شکل تکرارېږي. زه یقین لرم تاسې پوهېږئ چې په وطن کي لوږه او بېکاري خپل وروستي سرحد ته رسېدلې ده. د دې مدعا ښه ثبوت له یوې خوا پر سړکونو او بازارونو کي د خیرات خورو ښځو، ځوانانو او ماشومانو کتارونه او له بلې خوا ایران ته د افغان مهاجرینو سېل دی چې د ګاونډي هیواد ایران د ټول غیر انساني سلوک سره سره بیا هم خلک د خوارۍ مزدورۍ او یوې ګولې ډوډۍ د پیدا کولو لپاره د هغه هیواد ټول زحمتونه او غیر انساني سلوک پر ځانونو باندې مني او له خپلو کلیو او ښارونو څخه ورتښتي. دا د افغانستان تاریخ او حیثیت ته څپېړه ده. محترمو مشرانو! تاسې له یوې خوا وایاست چې افغانان باید له وطنه ونه ووځي او له اِمارت سره همکاري وکړي؛ مګر له بلې خوا مو د وزارتونو په مخکې وسله وال طالبان درولي او ږیرخریلي مامورین دفترونو ته نه پرېږدي. د دې معنا دا ده چې تاسې ته لیاقت او د انسان شخصیت نور هیڅ اهمیت نه لري او د ښه سړيتوب او لیاقت معیار یوازې ږیره ده. ستاسې د لوړو زده کړو وزیر وايي چې په تېرو شلو کلونو کې چې هر چا تعلیم او تحصیل کړی وي هغه د هیواد په درد نه خوري. آیا د یوه حکومت د عالي تحصیلاتو وزیر باید دغه راز بې مسوولیته خبري وکړي؟ زه ګومان نه کوم چي د دغه سویې څښتن سړی دې د یوه عادي مدیریت د چوکۍ صلاحیت او وړتیا ولري.

| 04-13-2022

د افغانستان د اسلامي اِمارت مشرانو ته د عبدالباري جهاني پرانیستی لیک، د ۱۴۰۱ لمریز کال د وري (حمل) ۲۳مه: اوله برخه: درنو مشرانو السلام علیکم. زړه ته مې نه لوېږي چې زما دا لیک دې تر تاسي پورې ورسیږي او یا دې، د رسېدلو په صورت کې څوک اهمیت قدر ورکړي؛ خو زه خپله وجداني وظیفه پر ځای کوم. درنو مشرانو! شپږویشت کاله مخکې، چې ستاسې اکثریت ځوان ملګري به یا زېږېدلي نه وو او یا به ماشومان وو، ما د محترم وکیل احمد متوکل صاحب په مخکې، په کندهار کې، مُلا محمد عمر اخند ته وویل چې « تاسې له مخکیني حکومت څخه د خلکو د نارضایت او په نتیجه کې، له تاسې څخه، د خلکو د ملاتړ په زور راغلي او قدرت ته رسېدلي یاست. موږ ته په امریکا کې آوازه را ورسېده چې کله تاسې د اسماعیل خان سره په جګړه لګیا واست یوې سپین سرې ښځي د خپل پوړني په پلو کې ماش درته راوړي و او ویل یې ما په کور کي دغه څه درلوده دا واخلئ او طالبانو ته یې ورکړئ. دا د همدغه ولس صمیمیت او احساسات وو چې تاسې یې قدرت ته ورسولئ. خو زه چې افغانستان ته راغلی یم؛ ما ستاسې څخه یو سړی هم خوښ نه دی لیدلی او ټول درڅخه ناراضه دي. که تاسې خلک په دغه شکل ناراض وساتئ، ستاسې سرنوشت به هم د پخواني حکومت په څېر وي.» ما ملاصاحب ته، په دغه ارتباط، نورې ډیرې خبرې هم وکړې او ډېر مثالونه مې ورته راوړل. متوکل صاحب شاهد دی چې ملاصاحب زما د خبرو جواب نه درلود او هېڅ یوه خبره یې هم ونه کړه.