د ملګرو ملتونو د خوراکي توکو په بدل کې د کار پروژه تخار کې په سلګونو کاري فرصتونه رامنځته کوي

تالقان -- د ملګرو ملتونو د خوړو نړۍ وال پروګرام (ډبلیو اېف پي) په تخار ولایت کې د کار په بدل کې د خوراکي توکو د ورکولو پروګرام بیا پیل کړی او هدف یې دا دی چې له کورنیو سره مرسته وکړي څو په اقتصادي ستونزو برلاسي شي او د سختې لوږې پر وړاندې مقابله وکړي.

په تخار کې د کلیو د بیارغونې او پراختیا ریاست ویاند سمیع الله صمیمي وویل، دغه ریاست د سلواغې په ۳مه د یوه ۵ کیلومتره اوږده سرک د بیارغولو او هوارولو کار پيل کړ چې دا به په چال ولسوالۍ کې د سلګونو کورنیو لپاره د تګ راتګ ستونزې حل کړي.

هغه له سلام ټایمز سره په خبرو کې وویل، «د بیارغونې کار به په دوو میاشتو کې د خوراکي توکو په بدل کې د کار له لارې بشپړ شي.»

صمیمي وویل، له ۱۰۰ څخه ډېر کسان به د دې لپاره استخدام شي چې هره ورځ په دې پروژه کې کار وکړي.‌

هغه وویل، «درېیم سرک چې تر بیا رغونې لاندې دی د چال ولسوالۍ په جیر تبار کلي کې دی.‌ څو کاله کیږي چې هغه سرک په ډېر بد حال کې دی، او خلک د تګ راتګ پر وخت په ځانګړې توګه ژمي کې له ډېرو ستونزو سره مخامخ ول.»

هغه زیاته کړه، «له نېکه مرغه چې دا پروژه تایید شوه او کار روان دی.»

هغه وویل،‌ «هر کارګر به هره میاشت ۵۰ کیلوګرامه اوړه، ۵ لېټره غوړي، ۶ کیلوګرامه نخود، او ۱ کیلوګرام مالګه ترلاسه کړي. دا پروژه به نه یواځې د سیمې په کچه د لاسرسي ستونزې حل کړي بلکې دغه راز به ځایي خلکو ته خواړه هم برابر کړي.»

صمیمي وویل، تمه ده چې دا پروژه ژر د ولایت په مرکز او ۱۷ نورو ولسوالیو کې تطبیق شي.

هغه زیاته کړه، «د دې پروژې هدف دا دی چې په پاتې ولسوالیو کې د ځایي سرکونو بیارغولو، د اوبو د بندونو او د زراعتی کانالونو پاکولو ته لومړیتوب ورکړي.»

د بې وزلۍ او لوږې پر وړاندې مبارزه

ګټه اخیستونکي وایي، دا ډول پروژې د کاري فرصتونو د رامنځته کولو او د بې وزلۍ او لوږې د کمولو په لور مثبت ګامونه دي.

د چال ولسوالۍ یوه اوسېدونکي لال محمد چې ۴۸ کاله عمر لري او په پروژه کې د یوه کارګر په توګه کار کوي، وویل چې هغه په دې پروژه کې د کار له پيلولو څخه مخکې په سختۍ سره دومره پیسې پیدا کولې چې خپله شپږ کسیزه کورنۍ پرې وساتي.

هغه زیاته کړه، «ما ۱۰ کاله د خټګر په توګه کار وکړ.‌ تېر کال کارونه نه ول، او اقتصاد خراب شو، نو هیڅوک هم نه غواړي چې کوم څه جوړ کړي.‌ د خټګرۍ کار، په ځانګړې توګه د ژمي پر وخت بېخي کم شوی دی.»

هغه وویل،‌ «زه له سختو اقتصادي او کاري ستونزو سره مخامخ شوم، خو اوس چې یوه وظیفه لرم نو خوښ یم چې کولی شم نفقه وګټم او د خپلې کورنۍ په دسترخوان باندې حلال خواړه کېږدم.»

خدای بیردي چې ۴۲ کاله عمر لري سلام ټایمز ته وویل چې هغه په دې خوښ دی چې په دې پروژه کې کار کوي.‌

خدای بیردي چې یو بزګر دی، وویل، «زه دا غوره ګڼم چې کار وکړم ځکه چې د دې کار ثمره دوه برابره ده: زه دا فرصت ترلاسه کوم چې فعال واوسم او په عین وخت کې د خپل هېواد په غوړېدلو او پرمختګ کې برخه اخلم.»

هغه وویل، کله چې بې کاره و د خپلې کورنۍ حالت ته اندېښمن و، خو اوس چې «هغوی له موږ سره وعده کړې چې ۵۰ کیلوګرامه اوړه، یوه کوتۍ غوړي، نخود او مالګه به ترلاسه کوو، نو ډېر زیات خوښ یو.»

هغه زیاته کړه،‌ «دا پروژه موږ ته دا وړتیا راکوي چې د خپلو کورنیو د ملاتړ لپاره بدیلې لارې ومومو.»

لاسرسی برابرول

ځایي خلک وایي چې پخوا هغوی د سرکونو د خرابوالي له امله بازارونو او روغتیایي کلینیکونو ته په تګ راتګ کې ډېرې زیاتې ستونزې لرلې، خو اوس هغوی هیله لري چې د دې پروژې په بشپړېدلو سره به دا ستونزې حل شي.

په چال ولسوالۍ کې یوه ځایي مشر ګل محمد خیرزاده چې ۶۲ کاله عمر لري، هغه وخت یاد کړ چې موټرونه به په خټو کې ونښتل او مسافر به، په ځانګړې توګه په ژمي کې له سختو ستونزو سره مخامخ شول.

هغه وویل، «کله چې د سرک د ترمیم او بیارغونې کار پيل شو، ما له خوشحالۍ نه ډېر وژړل. دا یو حیاتي سرک دی چې زموږ شاوخوا ۳۰۰ کورنیو لپاره چې په دې ولسوالۍ کې اوسېږو د تګ راتګ ستونزې حل کړي.»

هغه زیاته کړه، «د کندو له امله د سرکونو حالت خراب و، او مسافرو نشوای کولی چې په ارامۍ سره تګ راتګ وکړي.»

هغه وویل، «زموږ خلک نه پوهېدل چې څنګه خپل ناروغان په ژمي کې د تخار مرکز ته ډاکتر ته بوځي ځکه چې لاره د تګ لپاره برابره نه وه.»

خیرزاده وویل، «اوس موږ خوښ یو چې زموږ سرک بیارغول کیږي او موږ به دا وړتیا ترلاسه کړو چې په ټولو موسمونو کې د تخار مرکز او نورو ښارونو ته تګ راتګ وکړو.»